குற்றங்கள் நடந்த பின்பே சட்டங்கள் விழிக்கின்றன!

- ஆறு. நாகப்பன்

வருமுன் காப்பது, வந்தபின் கண்டுபிடிப்பது ஆகிய இரண்டும் காவல்துறைப் பணிகளில் அடிப்படையானவை. இவை இரண்டில் வந்த பின் கண்டு பிடிப்பதை விட வருமுன் காப்பதுதான் மிக மிக முக்கியமானது. பொது மக்களுக்குப் பயன் தருவது. நாட்டின் அமைதியும் அழகும் வரு முன் காக்கும் பணியால் மட்டுமே உருவாகும்.

மலேசியாவில் வருமுன் காப்பதில் காவல் துறையினர் தோல்வி அடைந்துள்ளனர். இதனை புதிய காவல்துறை தலைவர் டான்சிரீ இஸ்மாயில் ஒமார் உறுதிப்படுத்தியுள்ளார்.

சொசிலாவத்திக் குழுவினர் கொலை விவகாரத்தில் ஏற்கனவே செய்யப்பட்ட புகார்களை விசாரிப்பதில் காவல்துறையினர் அலட்சியமாக இருந்திருந்தால் சம்பந்தப்பட்டவர்கள் மீது நடவடிக்கை எடுக்கப்படும் என்று காவல்துறை தலைவர் கூறியுள்ளார்.

கொலைகளைத் தடுத்திருக்கலாம்

இன்னும் ஒரு படி மேலே போய் சொசீலாவாத்தி குழுவினர் கொலையில் ஏற்கனவே செய்யப்பட்ட புகார்கள் உடனடியாக விசாரிக்கப்பட்டிருந்தால் இந்தக் கொலைகள் நடக்காமல் தடுத்திருக்கலாம் என்றும் அவர் கூறியுள்ளார்.

காவல்துறை தலைவர் இப்போது சொல்லியிருக்கும் இந்த உண்மை கல்வி அறிவு அதிகம் இல்லாத பாமர மலேசியர்களுக்கும் முன்பே தெரியும். இவர்களில் பலர் வரும் முன் காக்காத காவல் துறையின் அலட்சியத்தால் பலவற்றை இழந்தவர்கள். பொருள் இழப்பு, உயிர் இழப்பு உட்பட.

கடந்த இருபது ஆண்டுகளில் மலேசியாவில் குற்றச்செயல்களின் எண்ணிக்கை படுவேகமாக வளர்ந்துள்ளது. வீதிக்கொள்ளை, வீட்டுக் கொள்ளை, ஆடு கொள்ளை, மாடு கொள்ளை வங்கிக்கொள்ளை, வாகனக் கொள்ளை, தெருச் சண்டைகள், தெருக்கொலைகள், வெட்டுக்குத்துகள், கொலைகள், கற்பழிப்புகள், போதைப்பொருள் விற்பனை, குழந்தைகள் கடத்தல், ஆள் கடத்தல் இப்படிப் பல தினம் தினம் கண் முன்னே நடந்து கொண்டிருப்பதை மக்கள் பார்த்தபடியே உள்ளனர்.

மலேசியா பாதுகாப்பான நாடு அல்ல

மலேசியா அமைதியான வாழ்க்கைக்குப் பாதுகாப்பான நாடு அல்ல என்ற கருத்து தொடர்ந்து வலுப் பெற்று வருகிறது. பொது மக்களின் வரிப் பணத்தைப் பல வகைகளில் கொள்ளையிடும் அரசுத் துறை ஊழல் குற்றங்கள் ஒரு பக்கம் வளர்கின்றன. அவை தவிர பொது மக்களின் உயிர், உடைமை ஆகியவற்றுக்கு இழப்பை ஏற்படுத்தும் குற்றச் செயல்கள் கட்டுப்பாட்டைக் கடந்து வளர்ந்து கொண்டிருக்கின்றன.

வெகு நூதனமான, அரிய வகை குற்றச் செயல்களை வரு முன் காக்க முடியாது என்பதைப் பகுத்தறிவால் ஒப்புக் கொள்ளலாம். மனிதன் தோன்றிய காலத்திலிருந்து நடக்கும் குற்றச் செயல்களைக் கூட நடக்கும் முன் தடுக்க முடியாது என்றால் காவல் துறைக்கு அழியும் மக்கள் வரிப்பணத்தால் என்ன பயன்?

குற்றச் செயல்கள் காவல் துறையில் புகார் செய்யப்படுமானால் அவை செய்தித் தாள்களிலும் புள்ளி விவரங்களிலும் வரும். இவை தவிர புகார் செய்யப்பட்ட குற்றங்கள் விசாரிக்கப்படுவதில்லை என்பதால் புகார் செய்யப்படாத பல குற்றங்கள் துலக்கப்படாமல் இருட்டில் மறைந்து கிடக்கின்றன. இவை காவல் துறையின் மீது மக்களுக்கு நம்பிக்கை இல்லை என்பதை உறுதிப்படுத்துகின்றன.

குற்றங்கள் நடந்த பின்புதான் சட்டங்கள் விழிக்கும் என்றால் அந்தச் சட்டங்களாலும் சட்டத்தின் துணையோடு மக்களைக் காக்கும் பொறுப்பில் உள்ள காவல் துறையாலும் நாட்டுக்கும் மக்களுக்கும் எந்தப் பயனும் இல்லை என்பதே இனி இங்கு முடிவாகும்.

மலசியவிலுமா