இந்திய பணக்காரர்கள் பட்டியல்: முகேஷ் அம்பானி முதலிடம்

கார்த்திக் · கார்த்திக் Thu Sep 30, 2010 1:59 pm

புதுதில்லி, செப்.30: இந்திய பணக்காரர்கள் பட்டியலில் ரிலையன்ஸ் இன்டஸ்ட்ரீஸ் நிறுவன அதிபர் முகேஷ் அம்பானி மூன்றாவது ஆண்டாக முதலிடத்தில் உள்ளார். அவரது சொத்து மதிப்பு 2700 கோடி அமெரிக்க டாலராகும்.

ஃபோர்ப்ஸ் இதழ் வெளியிட்டுள்ள பணக்காரர்கள் பட்டியலில் இது தெரிவிக்கப்பட்டுள்ளது.

அப்பட்டியலின்படி, 69 இந்தியர்கள் 100 கோடி டாலருக்கும் அதிகமாக சொத்து வைத்துள்ளனர். கடந்த ஆண்டு இது 52 பேராக இருந்தது.

அம்பானிக்கு அடுத்து உருக்கு ஆலை அதிபர் லக்ஷ்மி மித்தல் இரண்டாவது இடத்தில் உள்ளார். அவரது சொத்து மதிப்பு 2600 கோடி டாலராகும்.

பட்டியலில் இடம்பெற்றுள்ள இந்தியாவின் முதல் 100 பணக்காரர்களின் மொத்த சொத்து மதிப்பு 30 ஆயிரம் கோடி டாலராகும். கடந்த ஆண்டு இது 27 ஆயிரத்து 600 கோடி டாலராக இருந்தது.

பட்டியலில் கடந்த ஆண்டு மூன்றாவது இடத்தில் இருந்த முகேஷ் அம்பானியின் சகோதரர் அனில் அம்பானி இந்த ஆண்டு 6-வது இடத்துக்குச் சென்றுள்ளார். விப்ரோ நிறுவன அதிபர் அஸிம் பிரேம்ஜி 4-வது இடத்தில் இருந்து 3-வது இடத்துக்கு முன்னேறியுள்ளார்.