இப்படியும் கடனை வசூல் செய்யலாம்

கார்த்திக் · கார்த்திக் Tue Sep 28, 2010 10:55 am

கடலூர் : கடனை திருப்பித் தராதவர்கள் பெயரை கரும்பலகையில் எழுதி கடையின் முன் மாட்டி, வராக்கடனை வசூலித்தார் கடலூர் பெட்டிக்கடைக்காரர்.

கடலூர் புதுப்பாளையம் இரட்டை பிள்ளையார் கோவில் தெருவைச் சேர்ந்தவர் செல்வமணி. இவர் அதே பகுதியில் பெட்டிக்கடை நடத்தி வருகிறார். கடைக்கு வரும் வாடிக்கையாளர்களுக்கு கொடுத்த கடன் நீண்ட நாட்களாக திரும்பவில்லை. பலமுறை கேட்டும், ஒருவரும் காதில் வாங்கிக் கொள்வதாக இல்லை. இதனால் கடுப்பான செல்வமணி நேற்று தனது கடையில், கடனுக்கு பொருள் வாங்கி பணம் தராதவர்களின் பெயர் பட்டியலை கரும்பலகையில் எழுதி கடை முன் மாட்டினார். அதிர்ச்சியடைந்த கடன் வாங்கியோரில் பலர் நேற்றே கடனை திருப்பிக் கொடுக்கத் துவங்கினர்.

இதுபற்றி செல்வமணி கூறுகையில், "20க்கும் மேற்பட்டவர்களிடமிருந்து எட்டாயிரம் ரூபாய் அளவிற்கு பாக்கி வரவேண்டியிருந்தது. போர்டு மாட்டிய 3 மணி நேரத்தில் நான்காயிரம் ரூபாய் வசூலாகியுள்ளது. மேலும் போர்டில் எழுதப்படாத சிலரும் கடனை திருப்பித் தந்து விட்டனர். தற்போது ஆறு பேர் மட்டுமே கடனை திருப்பித்தர வேண்டிய பட்டியலில் உள்ளனர்' என்றார்.