கோப்பையை வென்றது சென்னை சூப்பர்கிங்ஸ்

கார்த்திக் · கார்த்திக் Mon Sep 27, 2010 9:19 am

சாம்பியன்ஸ் லீக் கிரிக்கெட் இறுதிப்போட்டியில் சென்னை சூப்பர் கிங்ஸ், வாரியர்ஸ் அணியை தோற்கடித்து சாம்பியன் பட்டத்தை கைப்பற்றியது.

தென் ஆப்ரிக்காவில் சாம்பியன்ஸ் லீக் "டுவென்டி 20' தொடர் நடந்தது. நேற்று நடந்த பைனலில் சென்னை சூப்பர் கிங்ஸ், வாரியர்ஸ்(தென் ஆப்ரிக்கா) அணிகள் மோதின. இரு அணிகளிலும் மாற்றம் எதுவும் செய்யப்படவில்லை.

இதில் டாஸ் ஜெயித்த வாரியர்ஸ் அணி முதலில் பேட் செய்ய தீர்மானித்தது. அந்த அணியின் கேப்டன் டெவே ஜேக்கப்சும், பிரின்சும் தொடக்க ஆட்டக்காரர்களாக களம் இறங்கினார்கள்.

நிர்ணயிக்கப்பட்ட 20 ஓவர்களில் வாரியர்ஸ் அணி 7 விக்கெட் இழப்புக்கு 128 ரன்களே எடுத்தது. திசென் 25 ரன்களும், கிருஷ் 16 ரன்களும், இங்ராம் 16 ரன்களும், பவுச்சர் 5 ரன்களும் எடுத்தனர்.

சென்னை சூப்பர் கிங்ஸ் அணி தரப்பில் முரளிதரன் 4 ஓவர்களில் 16 ரன்கள் விட்டுக்கொடுத்து 3 விக்கெட்டுகளும், அஷ்வின் 16 ரன்கள் விட்டுகொடுத்து 2 விக்கெட்டுகளும், போலிஞ்சர், அல்பி மோர்கல் தலா ஒரு விக்கெட்டும் கைப்பற்றினர்.

தொடர்ந்து 129 ரன்கள் எடுத்தால் கோப்பையை வென்று விடலாம் என்ற எளிய இலக்கை நோக்கி சென்னை சூப்பர் கிங்ஸ் அணி ஆடியது. தொடக்க ஆட்டக்காரர்கள் மைக் ஹஸ்ஸியும், முரளிவிஜயும் நிதானமாக ஆடி, அணிக்கு வலுவான தொடக்கம் தந்தனர்.

சென்னை அணி 19 ஓவர்களில் 2 விக்கெட் இழப்புக்கு 132 ரன்கள் சேர்த்து 8 விக்கெட்டுகள் வித்தியாசத்தில் வெற்றி பெற்று சாம்பியன் பட்டத்தை வென்றது.

சாம்பியன்ஸ் லீக் கோப்பையை கைப்பற்றிய சென்னை அணி ரூ. 12 கோடி பரிசுத் தொகையாக தட்டிச் சென்றது. இரண்டாவது இடம் பெற்ற வாரியர்ஸ் அணி, ரூ. 6 கோடி பரிசாக பெற்றது.

சென்னை அணியின் அஷ்வின் இத்தொடரில் சுழலில் அசத்தினார். மொத்தம் 13 விக்கெட் வீழ்த்திய இவர் தொடர் நாயகன் மற்றும் கோல்டன் விக்கெட் விருதுகளை தட்டிச் சென்றார்.

சாம்பியன்ஸ் லீக் தொடரில் இம்முறை அபாரமாக பேட் செய்த சென்னை அணியின் முரளி விஜய் அதிக ரன் எடுத்து சாதித்தார். இதற்கான தங்கத்திலான "கோல்டன் பேட்' விருதை பெற்றார். விஜய் 6 போட்டிகளில் 294 ரன் எடுத்துள்ளார். இரண்டாவது இடத்தில் வாரியர்ஸ் அணியின் டேவி ஜேக்கப்ஸ்(286 ரன்) உள்ளார் ..