ஒரு கோப்பையிலே என் குடியிருப்பு!

ஒரு கோப்பையிலே என் குடியிருப்பு!

ஆயிரத்தி தொள்ளாயிரத்து ஐம்பதுகள் தொடங்கி அறுபது வரை திரை இசை மெல்லிசை வடிவத்தில் பல்வேறு உத்திகளைக் கையாள ஆரம்பித்தது. இந்த முயற்சியில் ஏராளமான கவிஞர்கள், இசை அமைப்பாளர்கள், பின்னணிப் பாடகர்கள், பாடகிகள், வாத்திய இசைக் கலைஞர்கள், திரைப்படத் தயாரிப்பாளர்கள், இயக்குநர்கள், பிரபல நடிகர்கள், நடிகைகள், விமரிகர்கள் எல்லாவற்றிற்கும் மேலாக ரசிகர்கள் தங்கள் திறமைகளையும் எதிர்பார்ப்புகளையும் அள்ளி வீசி மெல்லிசையை அனைவரும் அங்கீகரிக்கும் ஒரு தேர்ந்த இசை அமைப்பாக மாற்றினர்.

இந்தக் கால கட்டத்தில் தமிழ்த் திரை இசைக்கு ஒரு தனி முத்திரையைப் பதிக்க வந்தார் கவியரசர் கண்ணதாசன் (தோற்றம் 24-6-1927; மறைவு 17-10-1981). தன் சிறந்த சொல்லாட்சி, சொற்பிரயோகம், உவமை நயம், புதிய புதிய உத்திகள், சந்தங்கள், இலக்கிய நயம், பொருள் நயம், இசை நயம் ஆகியவற்றால் சுமார் 5000க்கும் மேற்பட்ட பாடல்களை அள்ளிக் கொட்டி 54 வயதிலேயே தன் பயணத்தை முடித்துக் கொண்டார் கவியரசர்.

சேரக் கூடாத இடத்தில் சேர்ந்து நல்ல அனுபவம் பெற்று சேர வேண்டிய இடத்தில் வந்து சேர்ந்து உலகத்திற்கு தன் அனுபவங்களையும் வாழ வேண்டிய நெறிகளையும் அவர் போதிக்க முற்பட்ட காலத்தில் காலன் சற்று அவசரப்பட்டு விட்டான். விளைவு தமிழுக்கு நஷ்டம்!

தன்னைப் பற்றி ரத்த திலகம் படத்தில் (1963ம் ஆண்டு சீனப் போருக்குப் பின்னர் தேசபக்தியை வலியுறுத்தி வெளிவந்த படம்) அவரே தோன்றிப் பாடும் பாடல் (இரண்டு நிமிடம் 39 விநாடிகள் நீடிக்கும் பாடல்) ஒன்று உண்டு:

"ஒரு கோப்பையிலே என் குடியிருப்பு
ஒரு கோலமயில் என் துணையிருப்பு
இசைப் பாடலிலே என் உயிர்த்துடிப்பு
நான் பார்ப்பதெல்லாம் அழகின் சிரிப்பு

காவியத்தாயின் இளையமகன்
காதல் பெண்களின் பெருந்தலைவன் .. (நான் காவியத் தாயின்)
பாமர ஜாதியில் தனி மனிதன் நான்
படைப்பதனால் என் பேர் இறைவன்

நான் மானிட இனத்தை ஆட்டி வைப்பேன் அவர்
மாண்டு விட்டால் அதை பாடி வைப்பேன்
நான் நிரந்தரமானவன் அழிவதில்லை
எந்த நிலையிலும் எனக்கு மரணம் இல்லை"

உமர் கய்யாமின் மதுக் கோப்பை பாடல்களில் மனம் தோய்ந்த கண்ணதாசன் தன் நிலையையும் சற்று சிந்தித்து ஒப்பிட்டுப் பார்த்து தன்னைப் பற்றித் தானே விமரிசனம் செய்து கொண்டு தீர்க்க தரிசனத்துடன் "நான் நிரந்தரமானவன் அழிவதில்லை; எந்த நிலையிலும் எனக்கு மரணம் இல்லை" என்று முத்தாய்ப்பாகக் கூறினார். உண்மைதான். அவர் பாடல்களுக்கு அழிவில்லை; அவர் இயற்றிய பாடல்களில் அவர் வாழ்கிறார்.

பெண்மையின் சிறப்பையும் காதலின் நளினத்தையும் அவர் நூற்றுக் கணக்கான இடங்களில் திறம்படச் சுட்டிக் காட்டுகிறார்!

"காலங்களில் அவள் வசந்தம்
கலைகளிலே அவள் ஓவியம்
மாதங்களில் அவள் மார்கழி
மலர்களிலே அவள் மல்லிகை
பறவைகளில் அவள் மணிப்புறா
பாடல்களில் அவள் தாலாட்டு
கனிகளிலே அவள் மாங்கனி
காற்றினிலே அவள் தென்றல்
பால் போல் சிரிப்பதில் பிள்ளை அவள்
பனி போல் அணைப்பதில் கன்னி
கண்போல் வளர்ப்பதில் அன்னை
அவள் கவிஞனாக்கினாள் என்னை"

பாவ மன்னிப்பு படத்தில் (1961ம் ஆண்டு வெளியான படம்) இடம் பெறும் பாடல் இது. பி.பி ஸ்ரீனிவாஸ் தன் தேனினும் இனிய மெல்லிய குரலால் மிருதுவாகப் பாடிய பாடல் இது. மெல்லிசை மன்னர் எம்.எஸ். விஸ்வநாதன், டி.கே.ராமமூர்த்தி ஆகியோர் இசை அமைக்க தமிழகமெங்கும் பாடல் ஹிட் ஆகி அனைவரையும் ஆட்கொண்டது.

சிறுகூடல் பட்டியில் தோன்றி உயர்நிலைப் பள்ளியிலே தன் படிப்பை முடித்த முத்தையா கருவிலே திரு பெற்றுத் தமிழில் தேர்ந்து கவியரசர் கண்ணதாசனாக மாறி தமிழ் மக்களின் இதயங்களைக் கொள்ளை கொண்டார்.

5000 பாடல்களில் அவர் தந்த தமிழ் நயமும் இசை நயமும் திரை இசை வரலாற்றில் தருவது ஒரு தனி நயம்!

நன்றி: நிலாச்சாரல் கலைராஜன்.

எங்கள் கண்ணதாசன் அழியா பொக்கிஷம் அய்யா.
அவரது படைப்புகள் அத்தனையும் வைரமணி மாலை.....
உலகம் அழியும் வரை அவரது படைப்புக்கள் அழியாது என்பது உறுதி.....
பகிர்ந்ததற்கு வாழ்த்துகள்.......

அருமையான கவியாளன் .........
எல்லோர் மனதிலும் நிலத்து நிற்கும் ஒரு கவியரசு ....


பகிர்வுக்கு நன்றி ஐயா..