வாழைப்பழம் மூலம் ஒயின் தயாரிப்பு

ராட்சை பழங்களில் இருந்து “ஒயின்” என்ற மது தயாரிக்கப்படுகிறது. தற்போது வாழைப் பழத்தில் இருந்தும் ஒயின் தயாரிக்கப்பட்டுள்ளது. அருணாசலபிரதேசத்தை சேர்ந்த பங்கஜ், அவரது மனைவி ரிது அவாஸ்தி ஆகியோர் இதற்கான முயற்சியில் ஈடுபட்டு வெற்றியும் பெற்றுள்ளனர்.

பங்கஜ் ரசாயன துறையில் முதுகலை பட்டம் பெற்றவர். மேலும் கான்பூர் தேசிய சர்க்கரை நிறுவனத்தில் 2 ஆண்டு ஆல்கஹால் தொழில் நுட்பம் பயின்றவர்.

இந்த ஒயினை கடந்த 7 ஆண்டுகளுக்கு முன்பு இவர்கள் தயாரித்தனர். கடந்த 2003-ம் ஆண்டு நடந்த கோவா ஒயின் திரு விழாவிலும், 2004-ம் ஆண்டு நடந்த டெல்லி ஒயின் திரு விழாவிலும், பின்னர் ஷில்லாங் ஒயின் விழாவிலும் இதை பொதுமக்கள் பார்வைக்காக வைத்தனர்.

வாழைப்பழ ஒயின் குறித்து பங்கஜ் கூறியதாவது:-

அருணாசலபிரதேச மாநில மலைப்பகுதியில் கிடைக்கும் காட்டு வாழைப்பழங்கள் மிகவும் இனிப்பானவை. அதில் ஒயின் தயாரிக்க பயன்படும் சர்க்கரை அதிக அளவில் உள்ளது. அதனால்தான் யானைகள் அவற்றை விரும்பி சாப்பிடுகின்றன.

இதுதான் எங்களை அதில் இருந்து ஒயின் தயாரிக்க தூண்டுகோலாக அமைந்தது. வாழைப்பழத்தை 45 நாட்கள் ஊறவைத்து ஒயின் தயாரிக்கப்படுகிறது. இதற்கு உத்தரபிரதேசம், ஜார்க்கண்ட், கோவா மற்றும் வட கிழக்கு மாநிலங்களில் அதிக கிராக்கி உள்ளது.

இதுவரை 500 லிட்டர் தயாரித்துள்ளோம். ஒரு பாட்டில் ஒயின் ரூ. 500 முதல் ரூ. 15 ஆயிரம் வரை விற்கப்படுகிறது. இவை தவிர ஆப்பிள், அன்னாசி, ஆரஞ்ச் உள்ளிட்ட பழங்களில் இருந்தும் ஒயின் தயாரித்து இருக்கிறோம். ஆனால் வாழைப்பழ ஒயின் தான் சுவைமிக்கது.

வாழைப்பழ ஒயினுக்கான காப்புரிமை பெற உள்ளோம். அதன் பின்னர் அவை மது கடைகளில் விற்பனைக்கு வரும் என்றார்.

மாலைமலர்

எப்படி தயாரிப்பது சொல்லுங்கள் .....


நல்ல தகவல் நன்றி தோழரே