ரூ.1000 கோடியில் சிறப்பு சாலை: ஸ்டாலின் துவங்கி வைத்தார்

நகர்ப்புற உள்ளாட்சி அமைப்புகளில் ரூ.1000 கோடி மதிப்பீட்டில் 201011 ஆம் ஆண்டுக்கான சிறப்பு சாலைகள் திட்டத்தை துணை முதல்வர் மு.க.ஸ்டாலின் தொடங்கி வைத்தார்.

நகர்ப்புற உள்ளாட்சி அமைப்புகளில் கடந்த 4 ஆண்டுகளில் பாதாள சாக்கடை திட்டம், குடிநீர் மேம்பாடு போன்ற உள்கட்டமைப்பு வசதிகள் பெரிய அளவில் மேற்கொள்ளப்பட்டு வருகின்றன.
.
இதன் காரணமாக பழுதடைந்த சாலைகள் தற்காலிக அடிப்படையில் சரிசெய்யப்பட்டது. அதிக மழை காரணமாகவும் சாலைகள் பழுதடைந்து உள்ளாட்சி அமைப்புகளின் பொது நிதி மூலமாக நகர்ப்புற உள்ளாட்சி அமைப்புகளின் நிதி வசதிக்கேற்ப பழுது நீக்கம் செய்யப்பட்டு பராமரிக்கப்பட்டது. எனினும் போதிய நிதி வசதியின்மை காரணமாக முழுமையான அளவில் பழுதுபட்ட சாலைகளை சரிவர பராமரிக்க இயலாத நிலை ஏற்பட்டது.


மாநகராட்சிகள், நகராட்சிகள், பேரூராட்சிகள் அடங்கிய 718 நகர்ப்புற உள்ளாட்சி அமைப்புகளால் பராமரிக்கப்படும் 36,759 கி.மீட்டர்நீள சாலைகளில் 19, 581 கி.மீட்டர் நீள சாலைகள் பழுதடைந்துள்ளதாக அறியப்பட்டது. இதில் சுமார் 5 ஆயிரம் கி.மீட்டர்நீளமுள்ள சாலைகள் மிகவும் பழுதடைந்துள்ளதால் இதற்கு ரூ.1000 கோடி தேவைப்படும் என்று கணக்கிடப்பட்டது. இதனை கருத்தில் கொண்டு ரூ.1000 கோடி மதிப்பீட்டில் 201011 ஆம்ஆண்டில் செயல்படுத்தத்தக்க வகையில் சிறப்பு சாலைகள் திட்டம் கடந்த சுதந்திர தின விழா பேருரையில் முதலமைச்சரால் அறிவிக்கப்பட்டது.


இந்த திட்டத்தை துணை முதலமைச்சர் மு.க.ஸ்டாலின் தொடங்கி வைத்தார். தமிழக வரலாற்றில் தனியாக சாலை மேம்பாட்டுக்கு இவ்வளவு பெரிய தொகை இதுவரை வழங்கப்பட்டதில்லை. 9 மாநகராட்சிகள், 149 நகராட்சிகள், 560 பேரூராட்சிகளில் உள்ள முக்கிய சாலைகள் கான்கிரீட் சாலைகளாகவும், தரமானதாகவும் அமைக்கப்படும். இதற்கான நிதி ஒதுக்கீட்டையும், நிர்வாக ஆணைகளையும் மு.க.ஸ்டாலின் வழங்கினார்.