பலாத்காரத்திற்கு முயன்று, சிறுமி கொலை: பெரியப்பா கைது

உசிலம்பட்டி: உசிலம்பட்டி அருகே உள்ள வெள்ளைமலைப்பட்டியில் செப்.15 ல், 13 வயது சிறுமி மர்மமான முறையில் காயங்களுடன் கிணற்றுக்குள் பிணமாக கிடந்தார். போலீஸ் விசாரணையில் சிறுமியிடம் பலாத்காரத்திற்கு முயன்ற அவரது பெரியப்பா அது முடியாததால் விஷயத்தை சிறுமி வெளியே சொல்லி விடுவாரோ என பயந்து கொலை செய்து கிணற்றுக்குள் வீசிய கொடிய சம்பவம் வெளிவந்தது.
வெள்ளைமலைப்பட்டியைச் சேர்ந்த பாப்பாத்தியம்மாளுக்கு கருப்பாயி, இந்துராணி என இரண்டு மகள்களும் இரண்டு மகன்களும் உள்ளனர். கருப்பாயியை கொப்பிலிபட்டியைச் சேர்ந்த ஈஸ்வரனுக்கும், இந்திராணியை ஆனையூரைச்சேர்ந்த சின்னக்கண்ணன் என்பவருக்கும் திருமணம் செய்து கொடுத்திருந்தனர்.சின்னக்கண்ணன் இந்துராணி தம்பதிக்கு ப்ரியா(15), தீபா(13) என இரண்டு மகள்கள் உள்ளனர். இருவரும் சமயநல்லூரில் பணிபுரிந்து வருவதால் மகள்கள் இருவரும் வெள்ளைமலைப்பட்டியில் உள்ள பாட்டி வீட்டில் இருந்து வெள்ளைமலைப்பட்டியில் படித்து வந்தனர். ப்ரியா பத்தாம் வகுப்பும், தீபா எட்டாம் வகுப்பும் படித்து வந்தனர். பாப்பாத்தியம்மாளின் மகன்கள் இருவரும் வெளி மாநிலத்தில் முறுக்கு போடும் தொழில் செய்து வந்ததால், அவர்களுடைய நிலங்களை ஈஸ்வரன் பராமரித்து வந்தார். சில்மிஷம்: ஈஸ்வரன் நிலங்களை பார்வையிட வரும்போது, அங்கு பாட்டி வீட்டில் தங்கியிருக்கும் தீபாவிடம் அடிக்கடி சில்மிஷம் செய்து வந்துள்ளார். செப். 15ல் தேர்வு முடிந்தபின் வீட்டுக்கு வந்த தீபா சாப்பிட்டு விட்டு தோட்டத்திற்கு சென்றுள்ளார். பகல் 3.00 மணியளவில் தோட்டத்திற்கு மோட்டார் சைக்கிளில் சென்ற ஈஸ்வரன், தீபாவிடம் தகாத முறையில் ஈடுபட முயன்றுள்ளார். அவரிடம் இருந்து தப்பி ஓடிய தீபா தடுமாறி கீழே விழுந்துள்ளார். இதில் தீபாவின் தலையில் காயம் ஏற்பட்டு ரத்தம் கொட்டியது. அதிர்ச்சியடைந்த ஈஸ்வரன் இப்படியே விட்டால், தீபா தன்னை பற்றி பிறரிடம் கூறிவிடுவார் என முடிவு செய்தார். அருகில் இருந்து பாறாங்கல்லை தூக்கி தீபாவின் தலையில் போட்டார். தலை நசுங்கி பலியான தீபாவை தூக்கிச்சென்று கிணற்றுக்குள் போட்டு விட்டு வீட்டுக்கு வந்து விட்டார்.பின்னர், மீண்டும் தோட்டத்திற்கு சென்று எதுவும் தெரியாதது போல் வழக்கம் போல தண்ணீர் பாய்ச்சி விட்டு புல்அறுத்து வந்துள்ளார்.தீபா காணாமல் போய் தேடும் போதும், இவரும் கூடவே சேர்ந்து தேடியுள்ளார். பெரியப்பா என்பதால் போலீசார்களின் சந்தேகம் இவர்மீது ஏற்படவில்லை. பின்னர், பக்கத்து தோட்டங்களைச் சேர்ந்தவர்கள் மதியநேரத்தில் ஈஸ்வரன் தான் தோட்டத்தில் இருந்துள்ளார் என்று கூறியுள்ளனர். மேலும், சிறுமி ஒருவர் கிணற்றுக்கு பக்கத்தில் தீபாவின் செருப்பு, துப்பட்டா, ரத்தம் என சிதறிக்கிடக்கிறது என அங்கிருந்த ஈஸ்வரனிடம் கூறியபோது, ஈஸ்வரன் சிறுமியை சத்தம்போட்டு அங்கிருந்து அனுப்பியுள்ளார். இது போன்ற தகவல்களால் போலீசார்களுக்கு ஈஸ்வரன் மீது சந்தேகம் ஏற்பட்டது. டி.எஸ்.பி., குலாம், இன்ஸ்பெக்டர் அதிவீரராமபாண்டியன் மற்றும் போலீசார் ஈஸ்வரனிடம் விசாரித்த போது முதலில் எதுவும் தெரியாது என மறுத்த ஈஸ்வரன் பின்னர் தான் தீபாவை கொலைசெய்ததை ஒப்புக்கொண்டார்.உத்தப்பநாயக்கனூர் போலீசார் ஈஸ்வரனை கைது செய்தனர்.13 வயது சிறுமியிடம் அவரது பெரியப்பாவே தகாத முறையில் நடக்க முயற்சித்து அவரை கொலை செய்தது இந்த பகுதியில் பெரும் பரபரப்பை ஏற்படுத்தியுள்ளது.