வெள்ள நிவாரணப் பொருட்கள் பாகிஸ்தான் சந்தையில் விற்பனை!

**சிவா** · **சிவா** Fri Sep 17, 2010 10:16 am

பாகிஸ்தானில் வெள்ள நிவாரணத்துக்காக வெளிநாடுகள் அளித்த உதவிப் பொருட்கள் சந்தையில் குறைந்த விலையில் விற்கப்பட்டு வருகின்றன.

பாகிஸ்தானில் சிந்து மற்றும் பஞ்சாப் மாகாணங்களில் கடந்த இரண்டு மாதங்களுக்கு முன்பு ஏற்பட்ட வெள்ளப் பெருக்கால் பல ஆயிரம் கிராமங்கள் மூழ்கின. இன்னும் இந்த கிராமங்களில் வெள்ளம் வடியவில்லை. ஆறு லட்சத்துக்கும் அதிகமான மக்கள், வீடுகளை இழந்துள்ளனர். பாதிக்கப்பட்ட மக்களுக்கு அமெரிக்கா, சீனா, இந்தியா உள்ளிட்ட நாடுகள் நிவாரணப் பொருட்களை வழங்கி வருகின்றன.

வெள்ள நிவாரணத்துக்காக வெளிநாடுகள் வழங்கிய உணவுப் பொருட்கள் மற்றும் உபகரணங்கள் பெஷாவர் உள்ளிட்ட சந்தைகளில் குறைந்த விலையில் விற்கப்பட்டு வருகின்றன. லாரியில் கொண்டு வரப்பட்டு சந்தையில் இந்த பொருட்கள் இறக்கப்படுவதால், இந்த நடவடிக்கைக்கு சில அதிகாரிகளும் உடந்தையாக உள்ளதாக வியாபாரிகள் கூறுகின்றனர்.

இன்னும் சில இடங்களில் மக்களிடமிருந்து நிவாரணப் பொருட்களை கொள்ளையர்கள் பறித்துச் செல்வதாக கூறப்படுகிறது. மீனவர்களின் படகிலிருந்து திருடர்கள் சிலர் இன்ஜின்களை கழற்றி எடுத்துச் சென்று விட்டதாகவும் புகார்கள் கூறப்படுகின்றன. நிவாரணப் பொருட்களை கள்ளச்சந்தையில் விற்பதை தடுக்க கண்காணிப்பு கமிட்டி அமைக்கப்பட்டுள்ளதாகவும், நிவாரணப் பொருட்களை விற்ற இரண்டு பேர் கைது செய்யப்பட்டுள்ளதாகவும் அரசு அதிகாரி ஒருவர் தெரிவித்துள்ளார்.