உங்கள் குழந்தை ஒல்லியா இருக்கா?

கார்த்திக் · கார்த்திக் Thu 16 Sep 2010 - 19:58

பிறக்கும் குழந்தைகள் அனைத்துமே நல்ல குழந்தைகள்தான்! ஒரு சில குழந்தைகள் ஒல்லியாக இருப்பதால் பயந்து விட வேண்டாம். குழந்தை குண்டாக இல்லாமல் இருப்பதற்கு பல காரணங்கள் உண்டு.
தாய் வழியிலோ அல்லது தந்தை வழியிலோ யாராவது ஒல்லியாக இருப்பார்கள். இப்படி ஒல்லியாக இருக்கும் குழந்தைகள் நன்றாக சாப்பிடுவார்கள்... நன்றாக விளையாடுவார்கள்.
குழந்தை ஒல்லியாக இருக்கிறதே என்று கவலைப்படும் பெற்றோர், எந்த நேரமும் அந்த குழந்தையை சாப்பிடச் சொல்லி வற்புறுத்துவார்கள்.
இல்லாவிட்டால் குழந்தையை வற்புறுத்தி உணவை திணிப்பார்கள். இதனால் குழந்தைக்கு உணவு என்றாலே ஒருவித அலர்ஜி ஏற்பட்டுவிடும். பசியும் படிப்படியாக குறைந்து கொண்டே இருக்கும். அதேபோல், குழந்தை சாப்பிடவில்லை என்பதற்காக, விரும்பும் உணவுகளை கொடுப்பதும் கூடாது.
குறிப்பாக இனிப்பான உணவுகளை குழந்தைகள் விரும்புவார்கள். அதிகமாக கொடுக்கக் கூடாது. ஐஸ்க்ரீம், சாக்லேட், பிஸ்கட் உணவுகளையும் அதிகமாக உண்ண கொடுக்கக் கூடாது. பெரியவர்கள் சாப்பிடும் உணவுகளையும் கொடுக்கக் கூடாது.
வசதியில்லாத குடும்பங்களில், குழந்தைக்கு தேவையான சத்துணவுகளை கொடுக்காமல் வேறு எதையோ கொடுப்பார்கள். இதனாலும் குழந்தைகள் மெலிவதுண்டு. குறிப்பாக குழந்தைகளுக்கு பாலை அப்படியே கொடுத்தால் செரிக்காது என்ற தவறான நம்பிக்கை உண்டு.
குழந்தைகளுக்கு கொடுக்கப்படும் பாலில் தண்ணீரை கலக்க வேண்டாம். தண்ணீர் கலந்த பாலில் ருசி கெட்டுவிடும். இதனால் குழந்தைகள் குடிக்காமல் திணறும். நாம் உடனே பாலில் அதிக சர்க்கரையை சேர்ப்போம்.
இது குழந்தைகளின் குடலை கெடுத்துவிடும். இதனால் குழந்தைகளுக்கு அதிகம் பசிக்காது... காற்று நிரம்பி வெளியேறும். அடிக்கடி மலம் வெளியேறும். அதேபோல் பாலுக்கு பதிலாக டீ, காபி தரக்கூடாது. இப்படி கொடுப்பதால் குழந்தைகளுக்கு சத்து குறைந்து மெலியத் தொடங்கி விடும். குண்டாக இருந்த குழந்தை திடீரென மெலிந்தால் உடனே டாக்டரிடம் காண்பிப்பது நல்லது.
சில குழந்தைகள் பிறக்கும் போதே குண்டாக இருப்பதுண்டு. இல்லாவிட்டால் பிறந்த சில மாதங்களில் குண்டாகி விடும். இதற்கு அடிப்படை காரணமும் பரம்பரையே. இதை சிலர் வியாதி என்று தவறாக நினைப்பதுண்டு.
நீரிழிவு நோய் இருக்கும் பெண்களுக்கும் குண்டாக குழந்தைகள் பிறக்கலாம். சில குழந்தைகளுக்கு எப்போதும் பசி இருந்து கொண்டே இருக்கும். இவர்களுக்கு நல்ல சத்தான உணவை கொடுக்க வேண்டும்.
உங்களுடைய குழந்தை குண்டாக இருக்கிறதா... அல்லது ஒல்லியாக இருக்கிறதா என்று நீங்கள் கவலைப்பட வேண்டிய அவசியமில்லை. குழந்தை சத்தாக... நல்ல ஆரோக்கியமாக இருக்கிறதா என்று கவனித்து வளர்த்தாலே போதும்!