ஆண்கள் 'மசாஜ்' மையங்களில் பெண்கள் பணிபுரிய தடையில்லை : ஐகோர்ட்

செரின் · செரின் Sun Aug 02, 2009 2:05 pm

சென்னை: ஆண்களுக்கான 'மசாஜ்' மையங்களில் பெண்கள் பணிபுரிய தடையில்லை என்றும், அதேபோல் பெண்களுக்கான மசாஜ் மையங்களில் ஆண்கள் பணிபுரியலாம் என்றும் சென்னை உயர் நீதிமன்றம் தீர்ப்பளித்துள்ளது.

'இன்ஃப்லுயன்ஸ் லைஃப் ஸ்டைல்' என்ற மசாஜ் மையத்தின் இயக்குநர் வி.நரேஷ்குமார் தாக்கல் செய்த மனு மீது இந்த உத்தரவு பிறப்பிக்கப்பட்டுள்ளது.
அவர் தாக்கல் செய்த மனுவில், 'சென்னை பூந்தமல்லி நெடுஞ்சாலையில் தாசப்பிரகாஷ் ஓட்டலுக்கு அருகே இன்ஃப்லுயன்ஸ் லைஃப் ஸ்டைல் என்ற பெயரில் நாங்கள் மசாஜ் மையம் நடத்தி வருகிறோம். இங்கு பயிற்சி பெற்ற நிபுணர்கள் நியமிக்கப்பட்டு உள்ளனர். ஆணுக்கு பெண்ணும், பெண்ணுக்கு ஆணும் என்று இருபாலருக்கும் மசாஜ் செய்யப்படுகிறது.

இப்படி ஆணுக்கு பெண்ணும், பெண்ணுக்கு ஆணும் மசாஜ் செய்வதில் எந்த சட்டவிரோதமும் இல்லை. உலகம் முழுவதும் இந்த நடைமுறைதான் பின்பற்றப்பட்டு வருகிறது.எனவே, இதுபோன்ற மசாஜ் பார்லர் நடத்துவதற்கு சட்டப்பூர்வமாக தடை இல்லை. முக்கியமான மருத்துவமனைகளிலும் இதுபோன்ற மசாஜ் செய்யப்படுகிறது. எனவே, எங்கள் நிறுவனத்தை தொடர்ந்து அமைதியாக நடத்துவதில் போலீசார் தடையிட கூடாது என்று உத்தரவிட வேண்டும்,' என்று மனுவில் கூறப்பட்டிருந்தது.

இந்த மனு நீதிபதி கே.சந்துரு முன்னிலையில் வெள்ளிக்கிழமை விசாரணைக்கு வந்தது. அப்போது, போலீசார் தாக்கல் செய்த பதில் மனுவில், 'சென்னை மாநகர போலீஸ் சட்டப்படி 'மசாஜ்' மையம் நடத்துவதற்கு போலீஸாரிடம் இருந்து உரிமம் பெற வேண்டும். 'மசாஜ்' மையம் என்ற பெயரில் சட்டவிரோதமான நடவடிக்கைகளில் ஈடுபடுவதை தடுக்க இதுபோன்ற கட்டுப்பாடுகள் அவசியமாகிறது.

'மசாஜ்' மையங்களில் இளம் பெண்களை பணியமர்த்தினால், தவறான எண்ணம் கொண்டவர்களும், சமூக விரோதிகளும் அந்த மையங்களுக்கு வரக்கூடும். எனவே, இளம்பெண்களை பணியமர்த்தியுள்ள 'மசாஜ்' மையங்களை மூடுவதற்கு உத்தரவிடப்பட்டுள்ளது,' என்று மனுவில் தெரிவிக்கப்பட்டது.

இம்மனுவை விசாரித்த பிறகு நீதிபதி அளித்த தீர்ப்பில், ஆண்களுக்கான 'மசாஜ்' மையங்களில் பெண்கள் பணிபுரிவதை எந்த சட்டமும் தடை செய்யவில்லை. எனவே, 'மசாஜ்' மையங்களில் ஆண்களுக்கு பெண்களும், பெண்களுக்கு ஆண்களும் சிகிச்சை அளிப்பதை சட்டப்படி போலீஸார் தடுக்க முடியாது.

அதே நேரத்தில், அந்த மையங்களில் சோதனை செய்யவும், அங்கு சட்டவிரோதமான நடவடிக்கைகள் ஏதேனும் நடைபெற்றால் உரிய நடவடிக்கை எடுக்கவும் போலீஸாருக்கு எந்தத் தடையும் இல்லை என்று நீதிபதி உத்தரவில் தெரிவித்துள்ளார்.