ஊசி போடாமல் 50 பேரை காவு வாங்கிய அரசு டாக்டர்கள்; ராஜஸ்தானில் ஸ்டிரைக் வாபஸ்

புதுடில்லி : நோயாளி உறவினர்களும், டாக்டர்களும் டாக்டர்களும் மோதிக்கொண்ட விவகாரத்தினால் ராஜஸ்தான் மாநிலம் அரசு ஆஸ்பத்திரி பணிகள் அடியோடு பாதிக்கப்பட்டன. உரிய, முறையான சிகிச்சை அளிக்க டாக்டர்கள் இல்லாததால் 50 பேர் உயிரிழந்துள்ளனர். இந்த சம்பவம் மாநிலத்தில் பெரும் தலைவலியை ஏற்படுத்தியிருக்கிறது.
தடியடியில் டாக்டர்கள் காயம் : கடந்த சனிக்கிழமை ஜோத்பூர் அரசு எம்.டி.எம்., ஆஸ்பத்திரியில் டாக்டர்களும், நோயாளியின் உறவினர்களும் அடி தடியில் ஈடுபட்டனர். கலவரம் முற்றிப்போகவே , போலீசார் தடியடி நடத்தி அப்போதைய பதட்டத்தை தணித்தனர். பல டாக்டர்கள் காயமுற்றனர். இதனையடுத்து டாக்டர்கள் நீதி கேட்டு காலவரையற்ற போராட்டத்தில் குதித்தனர். இதனால் ஆஸ்பத்திரியில் முக்கிய பணிகள் முற்றிலுமாக பாதிக்கப்பட்டது.
மூச்சு திணறியவர்கள், விபத்தில் சிக்கியவர்கள், நீண்ட கால நோயாளிகள் என 3 நாட்களில் இது வரை 50 பேர் உயிரிழந்து விட்டனர். இன்னும் உயிர்ப்பலி உயரக்கூடும் என அஞ்சப்படுகிறது. இது தொடர்பாக மாநில சுகாதார துறை அமைச்சர் எச்சரிக்கை விடுத்ததோடு நிற்கின்றது. ஆனால் டாக்டர்கள் தங்களது போராட்டத்தை கைவிடுவதாக இல்லை. மாநிலம் முழுவதும் ஆயிரத்து 200 டாக்டர்கள் பணிக்கு செல்ல மறுத்து விட்டனர். இதனால் பல அரசு ஆஸ்பத்திரிகளில் உயிர்காக்கும் சிகிச்சை நிறுத்தப்பட்டுள்ளது.
பணி நடக்காத சிரமத்திற்கு பொதுமக்கள் பொறுத்து கொள்ள வேண்டும் என டாக்டர்கள் தங்களது அறிக்கையில் கூறியுள்ளனர். மாநில அரசு உரிய நடவடிக்கையில் இறங்க வேண்டும் என பொதுமக்கள் கோரிக்கை எழுப்பியுள்ளனர். உயிரிழந்தவர்களின் குடும்பத்தினர் வீதிக்கு வந்து போராட்டத்தில் குதித்துள்னர், டாக்டர்கள் உருவ பொம்மை எரிக்கப்பட்டு வருகிறது.
எனது மனைவியை இழந்தேன் : ஜோத்பூர் ஆஸ்பத்திரியில் தனது மனைவியை இழந்த துயரம் குறித்து ஜோஷி என்பவர் கூறியதாவது: எனது மனைவி ஆஷா இருதய நோயினால் பாதிக்கப்பட்டிருந்தார். அவச சிகிச்சை தேவைப்பட்டது ஆனால் டாக்டர்கள் யாரும் சிகிச்சை அளிக்காத காரணத்தினால் உயிரிழந்து விட்டார். எனது இளம் குழந்தைகளை நான் எப்படி காப்பாற்றுவேன் என்றார் கண்ணீர் ததும்பிட.
இந்நிலையில் மாநில அரசுடன் ‌நடந்த பேச்சுவார்த்தையை தொடர்ந்து கடந்த 3 நாட்களாக நடந்துவந்த மருத்துவர்களின் போராட்டம் வாபஸ் பெறப்பட்டது.