கோகிலவாணி நினைவாக இயக்கப்படும் மினி பஸ்

நாமக்கல் : தர்மபுரி பஸ் எரிப்பு சம்பவத்தில் பலியான மாணவி
கோகிலவாணியின் நினைவாக அவரது தந்தை, மினி பஸ் இயக்கி வருகிறார். அதில்
பயணம் செய்யும் மாணவ, மாணவியருக்கு பாதி கட்டணமே வசூலிக்கப்படுகிறது.
கொடைக்கானல், "பிளசன்ட் ஸ்டே' ஓட்டல் வழக்கில் அ.தி.மு.க.,
பொதுச்செயலர் ஜெயலலிதாவுக்கு, பிப்., 2, 2000ம் ஆண்டு, தனி நீதிமன்றம்,
சிறை தண்டனை வழங்கியது. இதனால், அக்கட்சியினர் தமிழகம் முழுவதும்
போராட்டத்தில் ஈடுபட்டனர்.அப்போது, தர்மபுரி இலக்கியம்பட்டியில் சுற்றுலா
வந்த கோவை வேளாண் பல்கலை பஸ்சுக்கு, அ.தி.மு.க.,வினர் தீ வைத்தனர். அதில்,
கோகிலாவாணி, ஹேமலதா, காயத்ரி ஆகிய மூன்று பேர், தீயில் எரிந்து சம்பவ
இடத்திலேயே பலியாயினர்.பஸ் எரிப்பு சம்பவத்தில் பலியானவர்களில், நாமக்கல்
ஏ.எஸ்.பேட்டையைச் சேர்ந்த வீராசாமி (65) - சரஸ்வதி (60) தம்பதியின் செல்ல
மகள் கோகிலவாணியும் ஒருவர். அவருக்கு விவேக், இளங்கோ என இரண்டு சகோதரர்கள்
உள்ளனர்.செல்லமாக வளர்த்த ஒரே மகள், வன்முறையாளர்களின் கொடூரச் செயலால்
தீக்கு இரையான சோகம் தாளாமல், அவரது நினைவாக, மோகனூரில் இருந்து
காட்டுப்புத்தூருக்கு 10 ஆண்டுகளாக பஸ் இயக்கி வருகிறார்.
கோகிலவாணியின் தந்தை வீராசாமி கூறியதாவது:ஒரே மகள் என்பதால், செல்லமாக
வளர்த்தோம். படிப்பில் படுசுட்டியான கோகிலவாணி, வகுப்பில் முதல் மதிப்பெண்
பெற்று, படிப்பின் மீது உள்ள ஆர்வத்தை நிரூபித்து வந்தாள். வேளாண்
சம்பந்தப்பட்ட படிப்பை படிக்க அறிவுறுத்தப்பட்ட போது, அதை தட்டாமல் பிளஸ்
2 முடித்ததும், கோவை வேளாண் பல்கலையில் சேர்ந்தாள்.கடந்த 2000ம் ஆண்டு, 12
நாள் கல்விச் சுற்றுலா செல்வதாக என் மகள் கூறினாள். நாங்களும் சென்று வர
அனுமதித்தோம். சுற்றுலா சென்ற மகள், மகிழ்ச்சியாக வீடு திரும்புவாள் என
எண்ணிக் கொண்டிருந்த எங்களுக்கு, கரிக்கட்டையாக வந்த மகளை பார்த்து, இதயம்
கனத்தது.கோகிலவாணியின் இறப்பு, எங்கள் குடும்பத்தை பெரிதும்
பாதித்துள்ளது. இக்கொடுமை யாருக்கும் வரக்கூடாது. மகளின் நினைவாக ஏதாவது
செய்ய வேண்டும் என்பதற்காக, "கோகிலவாணி டிரான்ஸ்போர்ட்' (ஜி.வி.டி.,) என்ற
மினி பஸ், மோகனூரில் இருந்து காட்டுப்புத்தூருக்கு கடந்த 10 ஆண்டுகளாக
இயக்கி வருகிறேன். அதன் மூலம் லாபம் இல்லை; நஷ்டம் தான் வருகிறது.
இருந்தும், அதை பொருட்படுத்தாமல் தொடர்ந்து இயக்கி வருகிறேன்.அந்த பஸ்சில்
பயணிக்கும் பள்ளி, கல்லூரி மாணவ, மாணவியருக்கு பாதி கட்டணம் மட்டுமே வசூல்
செய்யப்படுகிறது. அது மட்டும் இல்லாமல், கோகிலவாணியின் பெயரில் அறக்கட்டளை
துவங்கி, மக்களுக்கு சேவை செய்யும் எண்ணம் உள்ளது.இவ்வாறு வீராசாமி
கூறினார்.பஸ் எரிப்பு சம்பவத்துக்கு பின், கோகிலவாணியின் குடும்பத்தில்
ஒருவருக்கு அரசு வேலை வழங்கப்பட்டது. கோகிலவாணியின் சகோதரர் இளங்கோவன்,
மோகனூர் பி.டி.ஓ., அலுவலகத்தில் தற்போது பணியாற்றி வருகிறார்.