காயகல்ப சட்னி

**சிவா** · **சிவா** Fri Jul 31, 2009 7:58 pm

என்னென்ன தேவை?

தூதுவளைக் கீரை, முசுமுசுக்கை கீரை, புதினா கீரை, கொத்தமல்லி இலை, கொழுந்து கறிவேப்பிலை & தலா ஒரு கைப்பிடி, சிறிய வெங்காயம் & 10, தக்காளி & 3, பூண்டு பல் & 3, இஞ்சி & சிறிதளவு, மிளகாய் வற்றல் & 3, தனியா & 1 டீஸ்பூன், சீரகம் & அரை டீஸ்பூன், உளுத்தம் பருப்பு & 2 டீஸ்பூன், நெய், உப்பு---&தேவையான அளவு.

எப்படிச் செய்வது?

கடாயில் நெய் விட்டு, மிளகாய் வற்றல், தனியா, சீரகம், உளுத்தம் பருப்பு ஆகியவற்றை தனித்தனியாக வறுத்து வைத்துக்கொள்ள வேண்டும். பிறகு கடாயில் உள்ள நெய்யில், முதலில் சிறிய வெங்காயம், தக்காளி, இஞ்சி, பூண்டு ஆகியவற்றை ஒன்றன் பின் ஒன்றாகப் போட்டு நன்கு வதக்கியபின், கடைசியில் ஐந்துவித கீரை களையும் போட்டு மீண்டும் வதக்கவும். உப்பு சேர்த்து மிக்ஸியில் அரைத்து எடுத்துக் கொள்ளுங்கள்.

என்ன சிறப்பு?

பருவ மழை தொடங்கியதும் குழந்தைகளும் முதியவர்களும் ஜலதோஷத்தால் தும்மிக் கொண்டிருப்பார்கள். காலையில் இட்லி, தோசைக்கு தொட்டுக்கொள்ளக் கொடுங்கள். சளியும் கபமும் இருக்குமிடம் தெரியாமல் ஓடி விடும்!

மிகவும் சுவையானது என்பதால் சாதத்தோடு பிசைந்தும் சாப்பிடலாம்.