டெட்ரோ பேக்கிங்'கில் பதநீர்: முதல்வர் துவக்கி வைத்தார்

சென்னை : பதநீர் இறக்கும் 32 ஆயிரம் தொழிலாளர் குடும்பங்கள் பயன்
பெறும் வகையில் பாதுகாப்பான, "டெட்ரோ பேக்' முறையில் பதநீர் வழங்கும்
திட்டத்தை முதல்வர் கருணாநிதி அறிமுகப்படுத்தினார்.
பதநீரில் கால்சியம், பாஸ்பரஸ், இரும்புச்சத்து போன்றவைகளும்,
வைட்டமின்களும் அடங்கியுள்ளதால், இயற்கையான ஊட்டச்சத்து நிறைந்த உணவாகக்
கருதப்படுகிறது. பதநீர் அருந்துவதால், உட லில் உள்ள எலும்புகள்
வலுவடைகின்றன; பற்கள் உறுதியாகின்றன; உடல் வெப்பத்தைத் தணிக்கிறது.அம்மை
நோயும், கண் நோயும் தடுக்கப்படுகின்றன. வயிற்றுப் புண் மற்றும்
வயிற்றெரிச்சல் குறைகிறது. இத்தகைய சிறப்பு வாய்ந்த பதநீர் தற்போது
பாலிதீன் உறையில் அடைத்து, காலை முதல் மாலை வரை விற்கப்படுகிறது. அதன்
பின், பாதுகாத்து வைக்க முடியாமல் பதநீர் வீணாகிறது.இயற்கை சத்து மிகுந்த
இந்த பதநீரை பல நாட்களுக்கு, 40 நாட்கள் வரை கெடாமல் பாதுகாப்புடன் வைத்து
பருகுவதற்கு ஏற்ப, பதப்படுத்தி அடைக்கப்பட்டுள்ள, "டெட்ரோ பேக்' முறையை
முதல்வர் கருணாநிதி நேற்று அறிமுகம் செய்தார்.
மேலும், பதநீரில் இருந்து தயாரிக்கப்படும் பனங்கற்கண்டு மிட்டாய், பொடி
செய்து நவீன முறையில் பொட்டலம் செய்யப்பட்டுள்ள பனை வெல்லம் ஆகியவற்றையும்
முதல்வர் அறிமுகப்படுத்தினார். பதநீர் மற்றும் இதர பொருட்கள் இம்முறையில்
விற்கப்பட்டால், தமிழகம் முழுவதும் பதநீர் இறக்கும் தொழிலில் ஈடுபட்டுள்ள
32 ஆயிரம் தொழிலாளர்களின் குடும்பங்கள் கூடுதல் வருவாய் பெறும்.இப்புதிய
திட்டம், பதநீர் பருவம் துவங்கும் வரும் நவம்பர் மாதம் முதல்
விரிவுபடுத்தப்படும். நிகழ்ச்சியின் போது, கதர் துறை அமைச்சர்
ராமச்சந்திரன், முதன்மைச் செயலர் ராஜகோபால், பனை பொருள் வளர்ச்சி வாரிய
அலுவலர்கள் உடனிருந்தனர்.
பனை மரம் ஏறும் தொழிலில் பயிற்சி : கோவை வேளாண்மை பல்கலை
உதவியோடு மூன்றாயிரம் தொழிலாளர்களுக்கு நவீன சாதனங்களுடன் பனை மரம் ஏறும்
தொழிலில் பயிற்சி அளிக்கப்படுமென முதல்வர் அறிவித்துள்ளார்.பனை மரம் ஏறி
பதநீர் இறக்கும் தொழிலில் ஈடுபடும் தொழிலாளர் எண்ணிக்கை குறைந்து
வருவதால், இத்தொழிலில் ஈடுபட்டு வரும் தொழிலாளர்களின் நலன் கருதி, பனை
மரங்கள் மிகுந்துள்ள பகுதிகளில் கோவை வேளாண்மை பல்கலை உதவியுடன் நவீன
தொழில்நுட்ப கருவிகளைப் பயன்படுத்தி எளிதாகவும், விரைவாகவும் பனை மரம் ஏறி
தொழில் செய்ய, மூன்றாயிரம் தொழிலாளர்களுக்கு
இலவச பயிற்சிகள் அளிக்கப்படுமென முதல்வர் கருணாநிதி நேற்று அறிவித்துள்ளார்.