ராஜகோபுரத்தில் விரிசலா? அறநிலையத்துறை துணை ஆணையர் விளக்கம்

ஓசூர் : ""ஓசூர் சந்திரசூடேஸ்வரர் கோவில் ராஜகோபுரத்தில் விரிசல்
எதுவும் இல்லை; பக்தர்கள் பயப்பட வேண்டாம்,'' என, இந்து அறநிலையத்துறை
துணை ஆணையர் முத்தையா தெரிவித்தார்.
ஓசூரில் மலை மீது, ஆயிரம் ஆண்டுகள் பழமை வாய்ந்த, சந்திரசூடேஸ்வரர்
கோவில் உள்ளது. இக்கோவிலின் ராஜகோபுரம், சோழர்கள் ஆட்சிக் காலத்தில்
கட்டப்பட்டதாக கல்வெட்டு மூலம் அறியப்படுகிறது.கடந்த 2002ம் ஆண்டு,
சந்திரசூடேஸ்வரர் கோவிலும், ராஜகோபுரமும் புனரமைக்கப்பட்டு கும்பாபிஷேகம்
நடந்தது. இரு வாரத்துக்கு முன், கோவில் ராஜகோபுர தூணில் சிமென்ட்
பூச்சுகளில் ஆங்காங்கே கீறல் விட்டுள்ளதும், கோபுரத்தின் முன்பகுதியில்
முதலாவது மற்றும் இரண்டாவது நிலை அடுக்கு பகுதிகள் இணையும் பகுதியில் உள்ள
கல்லில் லேசான கற்சிதறல் ஏற்பட்டதும் தெரிய வந்தது.நேற்று முன்தினம்,
அறநிலையத்துறை இன்ஜினியர்கள் குழு பார்வையிட்டதாகவும், ராஜகோபுரத்தில்
கீறல் ஏற்பட்டுள்ளதாகவும் தகவல் பரவியது.
ராஜகோபுரத்தை ஆய்வு செய்த இந்து அறநிலையத்துறை துணை ஆணையர் முத்தையா கூறியதாவது:ராஜகோபுர
சிமென்ட் பூச்சிலும், கோபுரத்தின் முதல் மற்றும் இரண்டாம் அடுக்கு இணையும்
பகுதியில் உள்பிரகாரம் உள்ள கல்தூணிலும் சிறிது கீறல் ஏற்பட்டுள்ளது.
தமிழகத்தில் உள்ள 200க்கும் மேற்பட்ட கோவில் ராஜகோபுரங்களில், இது போன்ற
கற்சிதறல் காணப்படுகிறது. இதனால், ராஜகோபுரத்தில் விரிசல் ஏற்படாது.
இன்னும் 200 ஆண்டுகளுக்கு மேல் ராஜகோபுரத்தில் எந்த பாதிப்பும் ஏற்பட
வாய்ப்பில்லை. அதனால், பக்தர்கள் ராஜகோபுரம் குறித்து பயப்பட தேவையில்லை.
கோபுர சிமென்ட் பூச்சு கீறல் மற்றும் கற்கீறல்களை சீரமைக்க நடவடிக்கை
எடுக்கப்படும்.இவ்வாறு முத்தையா கூறினார்.
அறங்காவலர் குழு தலைவர் வரதராஜன் கூறியதாவது:ராஜகோபுரத்தை முன்னாள்
எம்.எல்.ஏ., மனோகரன் தலைமையில் நேற்று முன்தினம், இன்ஜினியர்கள் ஆய்வு
செய்ததாகக் கூறப்பட்ட தகவல் முற்றிலும் தவறு. ராஜகோபுரத்தில் விரிசல்
எதுவும் ஏற்படவும் இல்லை; யாரும் ஆய்வு செய்யவில்லை. மனோகரன் இரு நாளாக
ஓசூரில் இல்லை.அறங்காவலர் குழுவுக்கு தெரியாமல் எப்படி ஆய்வு நடக்கும்?
கோவில் நிர்வாகத்துக்கு எதிரான சிலரில் தூண்டுதலின் பேரில் பரப்பும்
வதந்தியால், பக்தர்கள் பீதியடைந்துள்ளனர். வதந்தியை பரப்பியவர் மீது
அறங்காவலர் குழு கூட்டத்தில் கண்டன தீர்மானம் நிறைவேற்றி, சட்டப்படி
நடவடிக்கை எடுக்கப்படும்.இவ்வாறு வரதராஜன் கூறினார்.