திருமண விவகாரத்தில் தலையிட போலீசாருக்கு ஐகோர்ட் தடை

மதுரை : திருமண விவகாரத்தில் தலையிடக் கூடாது என சிவகங்கை எஸ்.பி., காரைக்குடி டி.எஸ்.பி.,க்கு மதுரை ஐகோர்ட் கிளை உத்தரவிட்டது.
காரைக்குடியை சேர்ந்த சுப்ரமணியன் மகள் கற்பகவள்ளி தாக்கல் செய்த ரிட்
மனு:பி.இ., முடித்துள்ளேன். எனக்கும் ராமநாதபுரத்தைச் சேர்ந்த டாக்டர்கள்
சுப்ரமணியன்- பிரேமலட்சுமி மகன் டாக்டர் அம்சவர்த்தனுக்கும் கடந்த ஜூன்
26ல் திருமணம் நடந்தது. திருமணத்தின் போது 200 சவரன் நகைகள், கார், ஐந்து
லட்ச ரூபாய், 15 லட்ச ரூபாய் பாத்திரங்கள், வைர மோதிரம் ஆகியவை கணவர்
குடும்பத்தினருக்கு வழங்கப்பட்டன. இந்நிலையில் ராமநாதபுரத்திற்கு என்னை
அழைத்துச் செல்லும் வழியில் திருவாடானை கோவிலுக்குச் சென்றோம். அங்கு 400
சவரன் நகைகளை போடுவதாகக் கூறி ஏமாற்றி விட்டதாக, என் மாமியார் குற்றம்
சாட்டினார். மேலும் 200 சவரன் நகைகளை வாங்கி வரும்படிக் கூறி, என்னை
நடுவழியில் இறக்கி விட்டு சென்றனர். என் நகைகளையும் கொண்டு சென்றனர்.பின்,
ஜூன் 26ம் தேதி விவாகரத்திற்கு அவர்கள் சம்மதிக்கும்படி நிர்பந்தித்தனர்.
அனைத்து பெண்கள் போலீசார் செப்., 2ம் தேதி, என் கணவர் கொடுத்த புகார்
விசாரணைக்காக என்னை அழைத்துச் சென்றனர். அங்கு கணவர் மற்றும் அவரது
குடும்பத்தினர் தூண்டுதல்படி, விவாகரத்திற்கு சம்மதிக்கும்படி போலீசார்
நிர்பந்திக்கின்றனர். டி.எஸ்.பி., எஸ்.பி., இதை கண்டுகொள்ளவில்லை.
திருமண விவகாரத்தில் தலையிட்டு, விவாகரத்திற்கு கட்டாயப்படுத்தக்
கூடாது என எஸ்.பி., டி.எஸ்.பி., மற்றும் போலீசாருக்கு உத்தரவிட வேண்டும்.
விசாரணை முடியும் வரை இடைக்கால தடை விதிக்க வேண்டும், என
தெரிவிக்கப்பட்டது. மனுதாரர் சார்பில் வக்கீல்கள் மோகனசுந்தரம்,
டி.எஸ்.முகமது மொய்தீன் ஆஜராயினர். "மனுதாரரின் திருமண விவகாரத்தில்
தலையிடக் கூடாது,'என போலீஸ் அதிகாரிகளுக்கு நீதிபதி எம்.ஜெயபால்,இடைக்கால
உத்தரவிட்டார். மேலும் மனு குறித்து பதிலளிக்கவும் உத்தரவிட்டார்.