கையை பார்த்து நோய் அறிதல்

கையை பார்த்து ஜோதிடம் தான் பார்க்கலாம் என்று நினைக்காதீர்கள்; உடலில் என்ன கோளாறு எதிர்காலத்தில் வரும் என்பதையும் கண்டுபிடிக்கலாம்!டாக்டர்களில், இரண்டு வகை உள்ளனர். ஒரு வகை, தான் படித்ததை வைத்து நோயாளியின் நோயை கண்டறிவது; இன்னொரு வகை, அனுபவ அடிப்படையில் கண்டறிவது. முதல் வகையினர், படிப்படியாக இரண்டாவது வகையினராக மாறினால் தான், நோயாளிகளுக்கு சுலபமாக நோய் தீரும். அப்படி இல்லாத பட்சத்தில் தான், வயிற்றின் அடி ஓரத்தில் வலி என்றவுடன், சிறுநீரக கற்களாக இருக்குமோ என்று டாக்டரே சந்தேகிக்க வேண்டியிருக்கிறது.


வயிற்றில், வலிக்கு பல காரணங்கள் இருக்கலாம். ஆனால், இதற்கு ஏகப்பட்ட பரிசோதனைக்கு பின், நோயாளிக்கு சாதாரண பாதிப்பு தான் என்று தெரியவந்தபோது, அவரை சார்ந்தவருக்கே எரிச்சலாகி விடுகிறது. ஆனால், உடலில் சில அறிகுறிகள் ஏற்படுகின்றன. அவரவர் உணரும் வகையில், வெளிப்படையாகத்தான் அறிகுறிகள் தென்படுகின்றன.

அசட்டைத்தனம்:

நோய் வரட்டும்; டாக்டரிடம் போவோம்; இப்போதே போய்க்கேட்டால், படுக்கவைத்து விட்டு பணம் பிடுங்கிவிடுவர் என்ற தவறான எண்ணம் பலரிடம் உள்ளது. சந்தேகப்படவும் வேண்டாம்; அஜாக்கிரதையாகவும் இருக்க வேண்டாம். உடலில் ஒரு உபாதை தொடர்ந்து இரண்டு நாள் இருந்தால், டாக்டரிடம் ஆலோசிப்பது நல்லது. அடிக்கடி தலைவலிப்பது, ஜலதோஷம், காய்ச்சல், தோள் வலி, மூட்டு வலி போன்றவை, இரண்டு நாள் தொடர்ந்து இருக்குமானால், டாக்டரை பார்த்து, உறுதி செய்வது தான் சரியானது. இப்படிப்பட்ட அறிகுறிகள் பற்றி டாக்டர்கள் அவ்வப்போது சொல்கின்றனர். அதை அலட்சியப் படுத்தக்கூடாது.

கையில் அறிகுறி இருக்கு:

கைகளில் கை விரல்கள், நகங்கள், உள்ளங்கை போன்றவற்றில் அறிகுறிகள் உள்ளன என்று பிரிட்டன் நிபுணர் கிராகம் ஈஸ்டன் தலைமையிலான நிபுணர் குழுவினர் இப்போது கண்டுபிடித்துள்ளனர். இந்த அறிகுறிகள் இருக்குமானால், உடனே நோய் வந்துள்ளது என்று எண்ணி விட வேண்டாம்; எதிர்காலத்தில் இது போன்ற கோளாறுகள் வரலாம் என்பதற்கான அறிகுறிகள் தான்; போதுமான முன்னெச்சரிக்கை நடவடிக்கை எடுக்க இது ஒரு வாய்ப்பாக அமையும் என்பது தான் நிபுணர்களின் கருத்து.

குவிந்த கை விரலா:

கை விரல்கள் எல்லாம் சிறிய கோபுரம் போல குவிந்த நிலையில் இருக்கிறதா? பெரும்பாலோருக்கு கை விரல்கள் எல்லாம் நுனியில் அப்படித்தான் தெரியும். ஆனால், நுண்ணிய அளவில் பார்த்தால், கோபுரம் போலவே தோன்றும். இதை "கிளப் பிங்கர்' என்று கூறுவர். இத்தகைய நபர்கள் சிகரெட் பிடிப்பவராக இருப்பர்; மதுப்பழக்கம் உள்ளவராக இருக்கலாம். இதானல், இவர்களுக்கு எதிர்காலத்தில் புற்றுநோய் வர வாய்ப்புள்ளது.

நீல நிற நகங்கள்:

விரல் நகங்களில், நீலம் பாய்ந்திருந்தால், ரத்தத்தில் கோளாறு என்று பொருள். உடலில் ரத்த ஓட்டம் சீராக இல்லை; பாதிப்பு உள்ளது என்பதை டாக்டர்கள் கண்டுபிடித்துவிடுவர். இதய பாதிப்பு உள்ளவர்களுக்கு இப்படிப்பட்ட அறிகுறிகள் இருக்கும். விரல் நகங்களில் நீல நிறம் பளீச்சென தெரியும். அப்போது உஷாராக டாக்டரிடம் போய் விடுவது நல்லது.

இரு நிற நகங்கள்:

விரல் நகரங்களில், கீழ்ப்பாதி வெள்ளையாகவும் இல்லாமல் பழுப்பாகவும் இல்லாமல் இருக்கும். அதுபோல, மேல்பகுதி, காவி நிறத்தில் இருக்கும். இப்படி இருந்தால், சிறுநீரக கோளாறு ஏற்பட வாய்ப்புள்ளது என்று பொருள். இந்த அறிகுறி இருக்கும் போது, சிறுநீர் போவதில் பிரச்னை ஏற்பட்டால், டாக்டரிடம் போவது நல்லது.

உள்ளங்கை வியர்வை:

உள்ளங்கையில் வியர்வை அடிக்கடி ஏற்பட்டால், "ஹைபர் தைரோயிடம்' என்று மருத்துவ தியாக கூறப்படுவதுண்டு. தைராய்டு கோளாறு உள்ளவர்களுக்கு இப்படி அடிக் கடி வியர்க்கும். இந்த அறிகுறியை தெரிந்து கொண் டால், உடனே உஷாராகி விடலாமே.

குமிழ்மணி போல:

விரல் முனையில் குழல்மணி போல, மெழுகில் இருந்து வழிந்த மெழுகுத்துளி போல உருவம் இருக்குமானால், மூட்டு கோளாறு ஏற்படும் வாய்ப்பு உள்ளதை அறிந்துகொள்ளலாம். விரல் மூட்டில் விரல் மூட்டு பகுதியில் சிலருக்கு தொட்டால் வலி இருக்கும். இடுப்பு, முழங்காலில், மூட்டு வலி ஏற்பட இந்த அறிகுறியும் ஒரு வகையில் வெளிக்காட்டும். கொழுப்பு மூட்டு: விரல் மூட்டுகளில் கொழுப்பு சேர்வதுண்டு. இத்தகைய கொழுப்பு உள்ளவர்களுக்கு கொலஸ்ட்ரால் உள்ளதற்கான அறிகுறி இது தான். ஒரு வித மஞ்சள் ஏறி இருக்கும் வகையில், இந்த விரலடி இருக்கும்.

சிவப்பேறிய உள்ளங்கை:

உள்ளங்கையில் சிவப்பேறி இருக்கும். இப்படி தொடர்ந்து இருந்தால் கல்லீரல் பிரச்னை ஏற்படப்போகிறது என்று பொருள். இப்படி பல அறிகுறிகள் உள்ளன. ஆனால், நாம் அஜாக்கிரதையாக இருக்கிறோம். இப்போது கூட , விரல்களை பார்க்க ஆரம்பித்து விடுவர் பலர். அது தேவையே இல்லாதது. அடிக்கடி இப்படி அறிகுறி தென்பட்டால் சந்தேகப்படலாம். மற்றபடி, நம் வாழ்க்கை , உணவு முறையை பொறுத்துத்தான் எந்த வியாதியும் அண்டும்.