அன்பு தோழனுக்கு ஆசையுடன் மடல்

என் இனிய தோழனே எல்லா வலிகளையும் ஒதுக்கி விட்டு துன்பம் துடைக்க வருவாய் என இத்தருணத்தில் நான் எழுதும் முதல் மடல். கூடு கட்டும் பறவை சேகரிக்கும் சுள்ளிகள் போல சிறிது சிறிதாய் சேர்க்கிறேன் உனக்கான என் வார்த்தைகளை உன் அனுமதி இன்றி மடல் வழியாக.... நீ கண் இமைக்கும் நொடி போல் இதோ எனக்கான உனது அன்பு மடல் :


ஜன்னலில் வந்தமர்ந்து உன்னோடு கதை பேச நான் அனுப்பிய குருவிக் கூட்டங்கள் சுகமா? வேப்ப மரத்து அணில் சுகமா? கண்களை முத்தமிட்டுக் கொண்டிருக்கும் பட்டாம்பூச்சிகள் சுகமா? உன்னை எனது நட்பு நந்தவனத்தில் வைத்து இருப்பதால் நீ நலமோடு தான் இருப்பாய் என நம்புகிறேன். ஆனால், இங்கு உன் விழி பார்க்காத நானும், உன் கால்தடம் பதியா வீட்டு வாசலும் சுகமாக இல்லை. தீர்வு தெரிந்தால் சொல்லேன் ....

எனக்காக நீ பரிசளித்த ரோஜா செடியில், பூக்கள் தினமும் பூக்கின்றன. ஆனால் உடனுக்குடனே காய்ந்து விடுகின்றன. காரணம் அதன் மீதுள்ள பனித்துளியை அணைப்பதற்கு கூட பகலவனின் கதிர்கள் நெருங்குவதில்லையாம். பிரிவுகள் சுகம் தான் காத்திருத்தல் தவம் தான் நானும் அறிவேன். காயும் முன் வந்துவிடேன் உன் ரோஜாவின் முகம் காண.........

கண்ணிமை மூடியே தினமும் உன்னை கண்டேன். இன்றோ.... தூக்கம் தொலைத்த இரவுகளில் உன் நினைவுகளோடு. என்னை உறங்க வைக்க நீ பாடிய கனாகாணும் கண்கள் மெல்ல உறங்காதோ பாடல் ஒலித்துக்கொண்டே இருப்பதால் எனது மனமோ அனலிடையே சிக்கிய எறும்பு போல் துடிக்கிறது. உன்னை காணும் வரை நித்தமும் காத்திருப்பேன் நித்திரை விழித்து.பிரளயத்தின் முடிவில் இனிதாய் புதுயுகம் பிறக்கும் எனக்கூறும் பொய்யான வேதம் கூட நம் பிரிவால் மெய் எனத் தெரிகிறது. எனது புலம்பல்களுக்கு விடுமுறை தர எண்ணினால் ஒரு கணம் பேசிவிடேன்...

என் தோள் சாய்ந்து நீ பேசிய தருணங்களும், எனது மடி மீது நீ உறங்குவது போல் நடித்து விளையாடிய தருணங்களும் கண் முன்னாள் மின்னுகின்றன நினைவுகளாய். முதன் முதலில் நான் வாசித்து மூடி வைத்த போது மனதை எதுவோ பிடித்து அழுத்தி எனது தூக்கத்தை கெடுத்த மோகமுள் நாவலை போல் இன்று உன் நினைவுகள்.... அருகில் இருப்பவர்களிடம் கிடைக்காத அன்பு தொலைவில் இருக்கும் உன்னிடம் இருந்து கிடைகிறது.



இப்படிக்கு
தோழமையில் தாய்மையை எதிர்ப்பார்க்கும்
உன் அன்பு தோழி

தோழமை வெளிப்படுத்திய விதம் அருமை தமிழ்

உங்கள் நட்பின் ஆழத்தை மிக உருக்கமாக மடலில் இருந்து நாங்கள் அறிந்து கொண்டோம்.
உங்கள் உள்ளத்தின் ஆசை விரைவில் நிறைவேறி மகிழ்ச்சியடைய என் பிராத்தனைகள் உங்களுக்காக

V.Annasamy wrote:தோழமை வெளிப்படுத்திய விதம் அருமை தமிழ்

சபீர் wrote:உங்கள் நட்பின் ஆழத்தை மிக உருக்கமாக மடலில் இருந்து நாங்கள் அறிந்து கொண்டோம்.
உங்கள் உள்ளத்தின் ஆசை விரைவில் நிறைவேறி மகிழ்ச்சியடைய என் பிராத்தனைகள் உங்களுக்காக

தமிழ் wrote:

V.Annasamy wrote:தோழமை வெளிப்படுத்திய விதம் அருமை தமிழ்