காஷ்மீருக்கு சுயாட்சி அறிவிப்பு - மத்திய அரசின் கோழைத்தனம் - முரளி தர ராவ்

ஜம்மு காஷ்மீருக்கு சுயாட்சி அந்தஸ்த்து வழங்கப்படும் என பிரதமர் மன்மோகன் சிங் அறிவித்துள்ளமை, மத்திய அரசின் கோழைத்தனத்தை காட்டுவதுடன், காஷ்மீரில் பிரிவினவாதத்தை தான் ஊக்குவிக்கும் என பாஜக செயலாளர் முரளி தர ராவ் கூறியுள்ளார்.

இது குறித்து சென்னையில் செய்தியாளர்களிடம் அவர் தெரிவிக்கையில்,
ஜம்மு காஷ்மீர் மாநிலத்திற்கு சுயாட்சி உரிமை வழங்குவது குறித்து ஆலோசிக்கப்படும் என பிரதமர் மன்மோகன் சிங் அறிவித்திருக்கின்றமை சரியான தருணத்தில் கொடுக்கப்பட்ட அறிவிப்பு அல்ல. இது மத்திய அரசின் வலுவற்ற நிலையை எடுத்துக்காட்டுவதுடன், அரசாங்கத்தினை பிரிவினை வாதிகள் மேலும் மிரட்டக்கூடிய வாய்ப்பை ஏற்படுத்தியுள்ளது.

காஷ்மீர் விவகாரத்தில் ஐக்கிய முற்போக்கு கூட்டணி அரசு செயல் இழந்துவிட்டது. காஷ்மீரில் பயங்கரவாதம், குண்டு வெடிப்பு, கொலைகள் போன்றவை அன்றாட நிகழ்வாகிவிட்டன. இதனால் ஒட்டுமொத்த உலகும் காஷ்மீரை கவனித்து வருகிறது. அம்மாநில முதல்வர் ஒமர் அப்துல்லாவும் பொறுப்பில்லாதவராக செயற்பட்டு வருகிறார்.

இந்த சூழ்நிலையில் தெளிவான சிந்தனையும், செயலுமே அவசியம். காஷ்மீருக்கு சுயாட்சி அந்தஸ்த்து வழங்கப்படும் என உடனடியாக அறிவிப்பது பிரிவினவாதத்தை தான் ஊக்குவிக்கும். அன்னிய சக்திகள் கொடுக்கும் அழுத்தத்தில் தான் பிரதமர் இவ் அறிவிப்பை வெளியிட்டுள்ளாரா என சந்தேகம் எழுந்துள்ளது.

பேச்சுவார்த்தை மூலமான தீர்வுகளை பிஜேபி யும் ஆதரிக்கின்ற போதும், அது நமது ஒற்றுமையை குலைக்கும் வகையில் அமையக்கூடாது என்பதில் அக்கறை கொண்டுள்ளது எனக்கூறினார்.

இதேவேளை காஷ்மீரில் தொடர்ந்து வன்முறையில் ஈடுபட்டு வரும் பெரும்பாலானோர் கல்லூரி மாணவர்கள் எனவும் படித்த நல்ல வேளையில் உள்ள இளைஞர்கள் என அதிர்ச்சி தகவல்கள் வெளிவந்துள்ளன.

இன்று சனிக்கிழமையும் காஷ்மீரின் பல பிரதேசங்களில் தொடர்ந்த வன்முறையில் இருவர் பலியாகியுள்ளனர். இதையடுத்து ஊரடங்கு மீண்டும் அமல்படுத்தப்பட்டுள்ளது. வன்முறைகளை கட்டுப்படுத்த, காவற்துறையினர் நடத்தி வரும் தாக்குதல்களில், கடந்த இரு மாதங்களில் மட்டும் 62 பேர் உயிரிழந்துள்ளனர்.