வெளிநாட்டு கழிவு சென்னையில் ‘இறக்குமதி’

மீனம்பாக்கம் : வெளிநாடுகளில் இருந்து கம்ப்யூட்டர் கழிவு பொருட்கள் இந்தியாவுக்கு கடத்தி வரப்படுவதாக மத்திய வருவாய் புலனாய்வு துறையினருக்கு தகவல் கிடைத்தது. மத்திய வருவாய் புலனாய்வு துறை கூடுதல் தலைமை இயக்குனர் ராஜன் தலைமையிலான அதிகாரிகள், கடந்த 2 மாதங்களாக சென்னை துறைமுகம், விமான நிலைய பகுதிகளில் தீவிர கண்காணிப்பில் ஈடுபட்டனர்.இதையடுத்து, ஆஸ்திரேலியா, கனடா, கொரியா, புருனே ஆகிய நாடுகளில் இருந்து வந்த 8 கன்டெய்னர்களை சந்தேகத்தின் அடிப்படையில் சோதனையிட்டனர். இதில் கம்ப்யூட்டர் மானிட்டர் இருப்பதாக குறிப்பிடப்பட்டிருந்தது. சென்னை நங்கநல்லூரை சேர்ந்த வீனஸ் மெட்டல், கொல்கத்தாவை சேர்ந்த ஜே.எம். இண்டர்நேஷனல், சித்தி விநாயக் கார்பரேஷன், ராஜஸ்தானில் உள்ள சிவம் இண்டர் நேஷனல், மும்பையில் உள்ள மகாவீர் எண்டர்பிரைசஸ் ஆகிய 5 நிறுவனங்கள் இறக்குமதி செய்திருந்தன. அதிகாரிகள் அதை உடைத்து பார்த்து சோதனை நடத்தினர்.அதில் கம்ப்யூட்டர் மானிட்டர்கள் எதுவும் இல்லை. கம்ப்யூட்டர் மின்னணு சாதனங்களின் கழிவு பொருட்கள் இருந்தது. இந்த கழிவுப் பொருட்கள் 10 ஆண்டுகளுக்கு முன்பு உபயோகப்படுத்தப்பட்டு பழுதடைந்து கழித்து வைக்கப்பட்டதாகும். இந்த கழிவுகளை மேற்கண்ட 5 நிறுவனங்களும் புதிய கம்ப்யூட்டர் மானிட்டர்கள் என்ற பெயரில் கொண்டுவந்ததை அதிகாரிகள் கண்டுபிடித்தனர். இந்த கழிவுப்பொருட்களை அந்த நிறுவனங்கள் தரம்பிரித்து ஒரு சில பழைய பாகங்களை எடுத்து குறைந்த விலைக்கு விற்பனை செய்வார்கள். மீதி உள்ள பொருட்களை எரித்து அழிக்க திட்டமிட்டிருந்தனர். கழிவு பொருட்களை அதிகாரிகள் பறிமுதல் செய்தனர்.இதுபற்றி மத்திய வருவாய் புலனாய்வு துறை கூடுதல் தலைமை இயக்குனர் ராஜன் கூறுகையில், ‘‘இந்த கழிவு பொருட்களை மேற்கண்ட 5 நிறுவனங்களும் வெளி நாடுகளில் இருந்து இலவசமாக வாங்கி வந்துள்ளன. இது 127 டன் எடை உள்ளது. அதை தரம்பிரித்து அதில் ஓரளவு உபயோகப்படும் பொருட்களை விற்பனை செய்வார்கள். மற்றவைகளை எரித்து அழிக்கவும் திட்டமிட்டுள்ளனர். இறக்குமதி செய்த 5 நிறுவனங்கள் மீதும் வழக்கு பதிவு செய்யப்பட்டுள்ளது. இந்த நிறுவனங்களின் செலவிலேயே கழிவுகளை அந்தந்த நாடுகளுக்கு அனுப்ப முடிவு செய்துள்ளோம்’’ என்றார்.கதிர்வீச்சு அபாயம்கழிவு பொருட்களில் பாதரசம், காரீயம் போன்றவை உள்ளன. அவற்றை எரித்து அழிக்கும்போது பல மைல் தூரத்துக்கு சுற்றுப்புறச்சூழல் பாதிக்கும். அத்துடன் இந்த புகையை சுவாசிப்பவர்களுக்கு நுரையீரல் சம்பந்தப்பட்ட கொடிய நோய்கள் ஏற்படும். புற்றுநோய் போன்ற நோய்கள் உருவாக வாய்ப்பு உள்ளது.இந்த புகை குழந்தைகளையும் வயதானவர்களை பெரிதும் பாதிக்கும். நமது நாட்டுக்கு கதிர்வீச்சு அபாயம் ஏற்படும் வாய்ப்பு உள்ளது. இதை தடுக்கவே நாங்கள் இந்த கம்ப்யூட்டர் கழிவு பொருட்களை கைப்பற்றினோம் என்று மத்திய வருவாய் புலனாய்வு துறை கூடுதல் தலைமை இயக்குனர் ராஜன் தெரிவித்தார்.