பொதி மூட்டைகளாகும் பள்ளிக் குழந்தைகள்

நவீன் · நவீன் Sat Aug 21, 2010 9:07 am

தாம்பரம் : சென்னை புறநகர் பகுதிகளில் ஆட்டோ, வேன்களில் விதிமுறை மீறி அளவுக்கு அதிகமாக பள்ளிக் குழந்தைகளை ஏற்றிச் செல்கின்றனர். இதனால் விபத்து ஏற்படும் அபாயம் உள்ளது. பஸ் வசதி இல்லாத பல பள்ளிகளில் படிக்கும் மாணவ, மாணவிகள் தனியார் ஆட்டோ, வேன்களில் பள்ளி சென்று வருகின்றனர். குறிப்பிட்ட நேரத்தில் வீடு தேடி வந்து விடுவதால், ஆட்டோ, வேன்களிலேயே தங்கள் குழந்தைகளை அனுப்பி வைக்க பெற்றோர் விரும்புகின்றனர். பல வீடுகளிலும் கணவன், மனைவி இருவரும் வேலைக்கு சென்று விடுவதால், அவசரத்துக்கு வேறு வழியின்றி பலரும் குழந்தைகளை ஆட்டோ, வேன்களில் பள்ளிக்கு அனுப்பி வைக்க வேண்டிய நிர்பந்தத்தில் உள்ளனர்.இதனால் ஆட்டோ, வேன் டிரைவர்கள் இஷ்டத்துக்கு கட்டணம் நிர்ணயிக்கிறார்கள். மாதம் ^500 முதல் ^1000 வரை மாத கட்டணமாக வசூலிக்கின்றனர். மேலும் தினமும் 2, 3 ஷிப்ட்களில் குழந்தைகளை ஏற்றிக் கொண்டு பள்ளிக்கு அழைத்துச் செல்கின்றனர். அதிகமாக இவர்கள் கட்டணத்தை வசூலித்தாலும், பெற்றோர் வேறு வழியின்றி கொடுத்து விடுகின்றனர். இதை பயன்படுத்திக் கொண்டு, வேன், ஆட்டோக்களில் முடிந்தளவு குழந்தைகளை திணித்து அழைத்து செல்கின்றனர்.ஆட்டோக்களில் பயணிகள் உட்காரும் இருக்கைக்கு எதிர்புறம் ரெடிமேடாக பலகை அமைத்துள்ளனர். அந்த பலகையிலும், பயணிகள் இருக்கையிலும் சேர்ந்து 10க்கும் மேற்பட்ட குழந்தைகளை உட்கார வைக்கின்றனர். ஆட்டோவின் பின்பகுதியையும் விட்டு வைப்பதில்லை. அதிலும், 5 குழந்தைகளை பொதி மூட்டைகளாக அடுக்கிக் கொண்டு செல்கிறார்கள். இதுதவிர டிரைவர் இருக்கையிலும் மாணவர்களை நிற்க வைத்து அழைத்து செல்கின்றனர்.ஆட்டோவில் ஒரு முறைக்கு 15 முதல் 20 குழந்தைகளை அழைத்து செல்கின்றனர். வேன்களில் 50 குழந்தைகளை ஏற்றி செல்கின்றனர். விரைவாக அடுத்த ஷிப்ட்டுக்கு செல்ல வேண்டும் என்பதற்காக குறுக்கு ரோடுகளிலும், சந்துகளிலும் ஆட்டோக்களை அதிக வேகமாகவும் கவனக்குறைவாகவும் ஒட்டிச் செல்கிறார்கள். ஆட்டோ முழுவதும் குழந்தைகளை அடைத்து,புத்தக பை, சாப்பாடு பைகளை வெளியே தொங்கவிட்டுக் கொண்டு மின்னல் வேகத்தில் செல்கின்றனர். இதனால் விபத்து ஏற்பட்டு, அப்பாவி குழந்தைகள் பாதிக்கப்படுகின்றனர். போக்குவரத்து துறை அடிக்கடி கண்காணித்து, அதிக மாணவர்களை ஏற்றிச் செல்லும் வாகனங்களுக்கு அபராதம் விதித்தாலும் சிலர் திருந்துவதில்லை.எனவே, அளவுக்கு அதிகமாக பள்ளி குழந்தைகளை ஏற்றிச் செல்லும் வாகன ஓட்டிகள் மீது போக்குவரத்து மற்றும் காவல்துறையினர் கடும் நடவடிக்கை எடுத்தால் மட்டுமே இதனை தடுக்க முடியும் என சமூக நல ஆர்வலர்கள் தெரிவிக்கின்றனர்.