கிறிஸ்தவ மதத்தை சேர்ந்தவர் ஒபாமா:வெள்ளை மாளிகை விளக்கம்

வாஷிங்டன்:அமெரிக்க அதிபர் பராக் ஒபாமா கிறிஸ்தவ மதத்தைச் சேர்ந்தவர்
என்று வெள்ளை மாளிகை விளக்கம் அளித்துள்ளது.அமெரிக்க அதிபர் எந்த மதத்தைச்
சேர்ந்தவர் என்பது குறித்து மக்களிடையே சந்தேகம் நிலவி வந்தது.
இதுகுறித்து, அண்மையில் சர்வே எடுக்கப்பட்டது. அதில், 18 சதவீத
அமெரிக்கர்கள், ஒபாமா முஸ்லிம் மதத்தைச் சேர்ந்தவர் என்று தெரிவித்தனர்.
34 சதவீதம் பேர், ஒபாமா கிறிஸ்தவர் என்று தெரிவித்தனர். 43 சதவீதம் பேர்,
அவர் எந்த மதத்தைச் சேர்ந்தவர் என்பது தெரியவில்லை என்று
கூறியுள்ளனர்.கடந்த ஆண்டு மார்ச் மாதம் எடுக்கப்பட்ட சர்வேயின் போது, 11
சதவீதம் பேர் ஒபாமா முஸ்லிம் என்றும், 48 சதவீதம் பேர் அவர் கிறிஸ்தவர்
என்றும் தெரிவித்திருந்தனர்.ஒபாமா கிறிஸ்தவ மதத்தைச் சேர்ந்தவர் என்று
வெள்ளை மாளிகை விளக்கம் அளித்துள்ளது.
இதுகுறித்து, வெள்ளை மாளிகையின் ஊடகப் பிரிவு துணைச் செயலர் பில்
பர்டன் கூறியதாவது:பெரும்பாலான அமெரிக்கர்கள் பொருளாதாரம் சீரடையுமா,
ஈரான், ஆப்கானிஸ்தான் போர் எந்த நிலையில் உள்ளது என்பது குறித்து
யோசித்துக் கொண்டிருக்கின்றனர். சிலர், ஒபாமா எந்த மதத்தைச் சேர்ந்தவர்
என்று ஆராய்ந்து கொண்டிருக்கின்றனர். இது தேவையற்ற வேலை.இருப்பினும்,
ஒபாமா எந்த மதத்தைச் சேர்ந்தவர் என்பதை தெரிந்துகொள்ள பலர் ஆர்வமாக
இருப்பதால், அதை தெளிவுபடுத்த வேண்டியது எங்கள் கடமை.அதிபர் ஒபாமா
நிச்சயமாக கிறிஸ்தவர். அவர் தினமும் பிரார்த்தனை செய்கிறார். போதகர்களை
சந்தித்து ஆன்மிகம் தொடர்பாக உரையாடுகிறார். அவர்களது
வழிகாட்டுதல்களையும், ஆலோசனைகளையும் பெறுகிறார்.
மதம் தொடர்பான அவரது நம்பிக்கைகள் அவரது தனிப்பட்ட விவகாரம். அதை
விவாதப் பொருளாக மாற்ற வேண்டியதில்லை.நாட்டில், பல்வேறு பிரச்னைகள்
இருக்கின்றன. மக்கள் அதில், கவனம் செலுத்த வேண்டும். நாட்டில்
பொருளாதாரத்தை சீரமைப்பது, வேலைவாய்ப்புகளை உருவாக்குவது போன்ற பணிகளில்
ஒபாமா கவனம் செலுத்தி வருகிறார்.இவ்வாறு பர்டன் கூறினார்.