சிலை திருடர்கள் கைது; நான்கு சிலைகள் மீட்பு

சென்னை: ""சிலைகளை திருடுவது பொருளாதார குற்றம் மட்டுமல்ல; கலாசாரத்தின்
மீதான தாக்குதல். சிலை திருட்டை தடுக்க கடும் நடவடிக்கை எடுக்கப்படும்,''
என்று பொருளாதார குற்றப்பிரிவு கூடுதல் டி.ஜி.பி., டோக்ரா தெரிவித்தார்.
தமிழகத்தில், கோவில் சிலைகளை திருடுபவர்களை தடுக்கும் விதமாக பொருளாதார
குற்றப்பிரிவு, கூடுதல் டி.ஜி.பி., டோக்ரா உத்தரவின்படி, சிலை திருட்டு
தடுப்புப் பிரிவு இன்ஸ்பெக்டர் காதர்பாட்சா தலைமையில் தனிப்படை
அமைக்கப்பட்டது. தனிப்படை பிரிவினர் தமிழகம் மட்டுமின்றி, ஆந்திரா,
கர்நாடகா மாநிலங்களிலும் கண்காணித்து வந்தனர். நேற்று முன்தினம் மாலை 4
மணியளவில் சந்தேகத்திற்கிடமாக இருவர் மெரீனா கடற்கரையில் உழைப்பாளர் சிலை
அருகில் நிற்பதாக தகவல் கிடைத்தது. அவர்களை தனிப்படையினர் பிடித்து
விசாரித்த போது முன்னுக்கு பின் முரணாக பதிலளித்தனர். அவர்களிடம் ஒரு அடி
உயரமுள்ள பிரதோஷ அம்மன் உலோக சிலை இருந்தது. அவர்கள் திருச்சி,
லால்குடியைச் சேர்ந்த ஜஸ்டின் (37) மற்றும் அரியலூரைச் சேர்ந்த ஆல்ரின்
பிரபு (23) என்பது தெரிந்தது. நடராஜர் சிலை உள்ளிட்ட ஏழு சாமி சிலைகள்,
வெள்ளி கிரீடம் ஆகியவற்றை தஞ்சை மாவட்டம், திருவையாறு அருகில் தில்லை
தலத்தில் உள்ள கிரிதபுரீஸ்வரர் கோவிலில் இருந்து திருடியுள்ளனர்.
அவர்களிடம் இருந்து நான்கு சிலைகள் மீட்கப்பட்டன. இருவரையும் போலீசார்
கைது செய்தனர். மீட்கப்பட்ட சிலைகளின் மதிப்பு 23 லட்ச ரூபாய். இதில்
தொடர்புடைய மேலும் இருவரை போலீசார் தேடுகின்றனர். இதுகுறித்து, கூடுதல்
டி.ஜி.பி., டோக்ரா கூறியதாவது: இந்த சிலைகளை திருடுவோர் பொருளாதார குற்றம்
மட்டும் செய்யவில்லை; கலாசாரத்தின் மீதே தாக்குதல் நடத்துகின்றனர்.
பொருளாதார ரீதியாக இவற்றிற்கு மதிப்பிட்டாலும், இவை கிடைக்காமல் போனால்,
விலை மதிப்பற்றவையாக கருதப்படும். தற்போது கிடைத்துள்ளவை எட்டாம்
நூற்றாண்டைச் சேர்ந்தவை. தமிழகத்தில் ஏழு மாவட்டங்களில் சிலை தடுப்பு
மையம் உள்ளது. விரைவில் மற்ற மாவட்டங்களிலும் இம்மையங்கள்
உருவாக்கப்படும். கடந்த 2008ம் ஆண்டில் 13 வழக்குகளில் 19 பேர் கைது
செய்யப்பட்டு, 4 கோடி ரூபாய் மதிப்புள்ள 27 சிலைகளும், 2009ல் 12
வழக்குகளில் 52 பேர் கைது செய்யப்பட்டு 58.50 கோடி ரூபாய் மதிப்புள்ள 34
சிலைகளும், இந்தாண்டில் இதுவரை ஐந்து வழக்குகள் பதியப்பட்டு 16 பேரை கைது
செய்து 1.55 கோடி ரூபாய் மதிப்புள்ள 23 சிலைகள் மீட்கப்பட்டுள்ளன.
இவ்வாறு
டோக்ரா கூறினார். "இன்டர்போல்' உதவி! தமிழகம் முழுவதும் சிலை திருடி,
வெளிநாட்டுக்கு கடத்தும் கும்பலின் முக்கிய நபரான சஞ்சீவி அசோகனை கொச்சி
மாவட்டத்தில் தமிழக சிலை திருட்டு தடுப்பு போலீசார் கைது செய்தனர். அவர்
குண்டர் சட்டத்தில் அடைக்கப்பட்டுள்ளார். அவரிடம் நடந்த விசாரணையில்,
தஞ்சை, திருச்சி உள்ளிட்ட பகுதிகளில் கோவில்களில் திருடப்பட்ட 25 சிலைகள்
அமெரிக்காவில் உள்ள கபூரிடம் உள்ளதாகவும், அங்கு அவர் விற்க முயற்சி
செய்து கொண்டிருப்பதும் தெரிந்தது. கபூரை பிடிக்க "இன்டர்போல்'
அனுமதிக்காக சிலை திருட்டு தடுப்புப் பிரிவினர் காத்திருக்கின்றனர்.