சத்யம் ராஜு வீடு திரும்புவது கேள்விக்குறி சி.பி.ஐ., விசாரணை தொடர்ந்து நடக்குமா?

சத்யம் கம்யூட்டர்ஸ் நிறுவனர் தொடர்ந்து நான்கு மாத காலம் மருத்துவமனையில்
சிகிச்சை பெற வேண்டியிருப்பதால், அவர் எப்போது வீட்டுக்கு திரும்புவார்
என்பது கேள்வி குறியாக உள்ளது. ஐதராபாத்தில் உள்ள சத்யம் கம்ப்யூட்டர்ஸ்
நிறுவனர் ராமலிங்க ராஜு அந்நிறுவனத்தின் கோடிக் கணக்கான ரூபாயைச்
சுருட்டி, பினாமிகளின் பெயர்களில் பல்வேறு சொத்துக்களை வாங்கிக்
குவித்தார். மொரீஷியஸ் போன்ற நாடுகளில் உள்ள வங்கிகளில் பணத்தைப் போட்டு
வைத்தார். இதனால் சத்யம் நிறுவனம், 14 ஆயிரம் கோடி ரூபாய் அளவுக்கு
பேரிழப்பைச் சந்தித்தது. 2009, ஜனவரி 7ம் தேதி தான் செய்த குற்றத்தை
ராஜு ஒப்புக் கொண்டதைத் தொடர்ந்து, 9ம் தேதி அவர் கைது செய்யப்பட்டு,
ஐதராபாத் மத்திய சிறையில் அடைக்கப்பட்டார். சத்யம் நிறுவன ஊழல் வழக்கை
சி.பி.ஐ., விசாரித்து வருகிறது. இந்நிலையில், கடந்த ஆண்டு செப்டம்பர்
மாதம், ராஜுவுக்கு "ஹெபடிடஸ்-சி' வைரஸ் தாக்கியது கண்டறியப்பட்டது. அதன்
காரணமாக அவரது கல்லீரல் பாதிக்கப்பட்டது. இதன் அடிப்படையில், ஆந்திர மாநில
ஐகோர்ட் அவருக்கு 20 லட்ச ரூபாய் பிணையில் ஜாமீன் வழங்கியது. மேற்கொண்டு
கோர்ட் உத்தரவுகள் வரும் வரை ஐதராபாத் நகரை விட்டு அவர் வேறு எங்கும்
செல்லக் கூடாது; மருத்துவமனையிலிருந்து வெளிவந்தவுடன் தினசரி அவர்
கோர்ட்டில் ஆஜராக வேண்டும்; விசாரணைக்கு ஒத்துழைப்பு அளிக்க வேண்டும்
என்பது போன்ற நிபந்தனைகளுடன் கோர்ட் ஜாமீன் வழங்கியுள்ளது. இருப்பினும்
மருத்துவமனையில் 18 வார காலம் ராஜு சிகிச்சை பெற வேண்டும். இந்த சிகிச்சை
பாதியில் நிறுத்தப்பட்டால் கல்லீரல் புற்றுநோய் பாதிக்கும் அபாயம் உள்ளது
என, அவருக்கு சிகிச்சை அளிக்கும் டாக்டர் அஜீத்குமார் தெரிவித்துள்ளார்.
கோர்ட் உத்தரவுபடி ராஜுவின் மனைவியும், ஒன்று விட்ட சகோதரரும் நேற்று
முன்தினம் 20 லட்சம் ரூபாய் பிணைத் தொகை கட்டி, ராஜுவுக்கு ஜாமீன் வாங்கி
விட்டனர். "மருத்துவமனையில் தொடர் சிகிச்சை, கோர்ட்டில் தினசரி ஆஜர்
போன்ற வேலைகள் இருப்பதால் அவர் எப்போது வீடு செல்வார், என்பதை அவரது
குடும்பத்தினர் தான் முடிவு செய்ய வேண்டும்' என, ராஜுவின் வக்கீல்
பரத்குமார் தெரிவித்துள்ளார். தற்போது சிகிச்சை என்ற அடிப்படையில் ஒரு
மருத்துவமனையில் தங்கியபடி அடுத்த சில மாதங்களை அவர் கழித்தால்,
சி.பி.ஐ., விசாரணை முறைப்படி தடங்கலின்றி நடைபெறுமா என்று தெரியவில்லை.