அணு உலை விபத்து நஷ்டஈடு: மசோதா ரெடி

புதுடில்லி: அணு உலை விபத்து நஷ்டஈடு மசோதாவில் இடம் பெற்றிருந்த
சர்ச்சைக்குரிய வார்த்தை நீக்கப்பட்டு விட்டதால், அந்த மசோதாவை
பார்லிமென்டில் தாக்கல் செய்வதற்கு இருந்த தடை நீங்கிவிட்டது. இனி எளிதில்
மசோதா நிறைவேறும் என நம்பப்படுகிறது. இந்தியா - அமெரிக்கா இடையே அணுசக்தி
ஒப்பந்தம் கையெழுத்தாகியுள்ளது. இந்த ஒப்பந்தப்படி, அமெரிக்க நிறுவனங்கள்
பல, இந்தியாவில் அணு உலைகளை அமைக்க உள்ளன; அணு உலைகளுக்கான உபகரணங்களையும்
சப்ளை செய்ய உள்ளன. அப்படி சப்ளை செய்யும் அணு உலைகளில் விபத்து
ஏற்பட்டால், நஷ்ட ஈடு வழங்க வகை செய்யும் மசோதா பார்லிமென்டில் தாக்கல்
செய்யப்படுவதாக இருந்தது. ஆனால், மசோதாவில் இடம் பெற்றுள்ள வார்த்தை
ஒன்று, அன்னிய நிறுவனங்களுக்கு சாதகமாக இருப்பதாக இடதுசாரி கட்சிகளும்,
பாரதிய ஜனதா கட்சியும் விமர்சித்தன. அதாவது, அணு உலைகளுக்கு தேவையான
உபகரணங்களை சப்ளை செய்யும் நிறுவனங்களின் கடமையை, நீர்த்து போகச் செய்யும்
வகையில் இருப்பதாக குற்றம் சாட்டின. அதாவது விபத்து நிகழ்ந்தால், அந்த
நிறுவனங்கள் தப்பித்துக் கொள்ளும் வகையில் இருந்தன. இதையடுத்து, இந்த
மசோதா, பார்லிமென்ட் நிலைக்குழுவின் பரிசீலனைக்கு அனுப்பப்பட்டது. இந்த
கமிட்டி இரண்டு நாட்களுக்கு முன், மசோதா தொடர்பான தங்களின் அறிக்கை
மற்றும் பரிந்துரைகளை சமர்ப்பித்தது. அதில், அணு உலை விபத்து நஷ்ட ஈடு
மசோதாவில் இடம் பெறும் சர்ச்சைக்குரிய பகுதிகளையும், வார்த்தையையும் நீக்க
வேண்டும் என, தெரிவிக்கப்பட்டிருந்தது. இந்நிலையில், மத்திய அமைச்சரவை
கூட்டம் பிரதமர் மன்மோகன் சிங் தலைமையில் நேற்று நடந்தது. இந்தக்
கூட்டத்தில் அணு உலை விபத்து நஷ்ட ஈடு மசோதாவிற்கு ஒப்புதல்
அளிக்கப்பட்டது. பார்லிமென்ட் நிலைக்குழு தெரிவித்த யோசனைகள் ஏற்றுக்
கொள்ளப்பட்டு, மசோதாவில் இருந்த சர்ச்சைக்குரிய வார்த்தை நீக்கப்பட்டது.
நஷ்ட ஈடாக 1,500 கோடி ரூபாய் என்று ஏற்கனவே முடிவானதுடன், அணு உலைக்கு
முக்கிய பாகங்கள் தரும் சப்ளையர்கள் காரணத்தால், விபத்து ஏற்படும்
பட்சத்தில் அவர்களையும் அத்தவறுக்கு பொறுப்பாக்க இந்த மசோதா வழி
செய்கிறது. இத்திருத்தத்தில் பா.ஜ., முக்கிய பங்கு வகித்தது என்பது
குறிப்பிடத்தக்கது. இதனால், மசோதாவை பார்லிமென்டில் தாக்கல் செய்ய இருந்த
தடை நீங்கியது. மசோதாவை எப்போது பார்லிமென்டில் தாக்கல் செய்வது என்பதை
லோக்சபாவின் அலுவல் ஆலோசனை கமிட்டி முடிவு செய்யும்.