நெட் காதலன் கைவிட்டதால் கை நரம்பைதுண்டித்து மகள், மருத்துவமனையில் தாய் சாவு

கோவை: "நெட்' காதலன் திருமணம் செய்வதாகக் கூறி கடைசி நேரத்தில்
ஏமாற்றிவிட்டதால், அதிர்ச்சியடைந்த காதலி தன் தாயுடன் சேர்ந்து கை நரம்பை
வெட்டி, காஸ் கசியவிட்டு தற்கொலைக்கு முயன்றார். இதில் தாய் இறந்தார்.
இச்சம்பவம் கோவையில் பரபரப்பை ஏற்படுத்தியுள்ளது. திருச்சியைச் சேர்ந்தவர்
பால்ராஜ்(60); நகைக்கடை உரிமையாளர். இவரது மூத்தமகள் பெற்றோர் எதிர்ப்பை
மீறி காதல் திருமணம் செய்து தற்போது பெங்களூரில் வசிக்கிறார். இதே போல்,
இளையமகள் சூர்யாவும், காதலுக்கு தாய் இந்திராணி(55) ஆதரவு தெரிவித்ததால்
குடும்பத்தையே வெறுத்து தனியாக சென்று விட்டார். கணவரின் ஆதரவு இல்லாத
நிலையில், மூன்று ஆண்டுகளுக்கு முன் இந்திராணியும், சூர்யா(26)வும் கோவை
வந்தனர். சாயிபாபா காலனியில் வாடகை வீட்டில் தங்கி, கம்ப்யூட்டர் ஜாப்
ஒர்க் செய்து, வாழ்க்கை நடத்தினர். இந்நிலையில், சூர்யாவுக்கு கிரிவேல்
என்பவரின் அறிமுகம் "நெட்' டில் கிடைத்தது. முகம் கூட பார்க்காமல்
கிரிவேலுவை காதலித்தார் சூர்யா; இதற்கு இந்திராணியும் ஆதரவு கொடுத்தார்.
இருவரும் அடுத்த மாதம் திருமணம் செய்து கொள்ள முடிவு செய்தனர். ஆனால்,
கடந்த வாரம், சூர்யாவை தொடர்பு கொண்ட கிரிவேல், திருமணத்துக்கு பெற்றோர்
எதிர்ப்பு தெரிவிப்பதாகவும், தனக்கு பெண் பார்த்து விட்டதாகவும் கூறி தன்
உறவை முறித்துக் கொண்டார். இதை கேட்டு அதிர்ச்சி அடைந்த சூர்யா தனது
தாயிடம் தெரிவித்து அழுதார். இருவரும் வேறு வழியின்றி தற்கொலை செய்து
கொள்ள முடிவெடுத்தனர். இதற்காக, நேற்று முன்தினம் தாயும், மகளும் தங்கள்
கை நரம்புகளை துண்டித்துக் கொண்டனர். வெளியேறிய ரத்தத்தை பாத்திரத்தில்
பிடித்தனர். விரைவில் ரத்தம் வெளியேறி இறந்து விடுவோம் என
எதிர்பார்த்தவர்களுக்கு இறப்புக்கு பதில் கைதான் வலி எடுத்தது. வலியால்
அலறிய சூர்யா, சமையல் அறைக்குச் சென்று சிலிண்டரில் இருந்த காஸை கசிய
விட்டார். தீக்குச்சியால் பற்ற வைக்க முயற்சித்தபோது, வெளியே கூரியர்
சர்வீசிலிருந்து வந்த நபர், காலிங் பெல்லை அழுத்த, சுவிட்சில் இருந்து
தெரித்த தீப்பொறி, அறை முழுவதும் பரவியிருந்த காஸில் பற்றி வெடித்தது.
இதில் தாய் மகளுக்கு பலத்த காயம் ஏற்பட்டதோடு, கதவு திறந்து கொண்டதில்
வெளியில் நின்றிருந்த கூரியர் சர்வீஸ் ஊழியருக்கும் தீக்காயம் ஏற்பட்டது.
சத்தம் கேட்டு அருகில் இருந்தவர்கள் விரைந்து வந்து, தீக்காயத்துடன்
கிடந்த அம்மா, மகள் ஆகியோரை கோவை அரசு மருத்துவமனையில் சேர்த்தனர். சூர்யா
எழுதி வைத்திருந்த கடிதத்தை போலீசார் கைப்பற்றியுள்ளனர். அதில், தன்
தற்கொலைக்கு நெட் காதலன் கிரிவேல், தன் சகோதரி, அவரது கணவர் உட்பட 20 பேர்
காரணம் எனக் கூறி, அவர்கள் மீது நடவடிக்கை எடுக்க வேண்டும் என
தெரிவித்துள்ளார். இச்சம்பவம் பற்றி சாயிபாபா காலனி போலீசார்
விசாரிக்கின்றனர்.