தி.மு.க., பெண் கவுன்சிலரை மிரட்டும் போலி டாக்டர்

நவீன் · நவீன் Thu Aug 19, 2010 4:49 pm

தேனி: மாவட்ட கவுன்சிலரை மிரட்டும் போலி டாக்டர் மீது நடவடிக்கை எடுக்க
வலியுறுத்தி மாவட்ட ஊராட்சி கூட்டத்தில் தீர்மானம் நிறைவேற்றப்பட்டது.
தி.மு.க.,
வை சேர்ந்த மாவட்ட கவுன்சிலர் பாலசரஸ்வதி. இவர், ஜி.கல்லுப்பட்டியில்
வசித்து வருகிறார். சென்ற மாதம் நடந்த மாவட்ட ஊராட்சி கூட்டத்தின் போது,
பெரியகுளம் பகுதியில் போலி டாக்டர்கள் உள்ளதாகவும், அவர்கள் மீது
நடவடிக்கை எடுக்கவேண்டும் என பேசினார். இவர் பேசியது செய்தியாகவும்
வெளியானது. இதை பார்த்த அதே பகுதியை சேர்ந்த ரவிக்குமார் தன்னைப்பற்றிதான்
பேசியதாக கூறி கவுன்சிலர் பாலசரஸ்வதிக்கு கொலை மிரட்டல் விடுத்துள்ளார்.
தேவதானப்பட்டி போலீசார் ரவிக்குமாரை கைது செய்தனர். இந்நிலையில் நேற்று
மாவட்ட ஊராட்சி கூட்டம் தலைவர் ரமாதேவி தலைமையில் நடந்தது.கூட்டத்தில்
பாலசரஸ்வதி பேசுகையில், "ரவிக்குமார் தன்னை தொடர்ந்து மிரட்டுகிறார்.
தனக்காக சாட்சி சொல்ல வந்தவர்களை வீடு புகுந்து தாக்கியுள்ளார். உடனே
வழக்கில் இருந்து வெளியே வந்து விட்டேன் தொடர்ந்து மருத்துவம் பார்ப்பேன்.
உன்னால் என்ன செய்ய முடியும் என மிரட்டுகிறார். அவர் மீது நடவடிக்கை
எடுக்க இந்த மன்றத்தில் தீர்மானம் கொண்டுவரா விட்டால் எனது பதவியை
ராஜினாமா செய்வேன்' என்றார்.தலைவர் ரமாதேவி மற்றும் அனைத்து
கவுன்சிலர்களும் ரவிக்குமார் மீது நடவடிக்கை எடுக்க வலியுறுத்தி தீர்மானம்
நிறைவேற்றினர். பின் கவுன்சிலர்கள் அனைவரும் பாலகிருஷ்ணன் எஸ்.பியை
சந்தித்து புகார் அளித்தனர்.