விரைவில் அரசியலில் குதிப்பேன் - விஜய்

விரைவில் அரசியலில் குதிப்பேன்: புதுக்கோட்டையில் நடிகர் விஜய் அறிவிப்பு


புதுக்கோட்டை மாவட்ட தலைமை விஜய் மக்கள் இயக்கம் சார்பில் புதுக்கோட்டையில் இலவச கம்ப்யூட்டர் பயிற்சி மைய திறப்பு விழா நடந்தது. அகில இந்திய விஜய் மக்கள் இயக்க கவுரவ தலைவர் எஸ்.ஏ.சந்திரகேர் தலைமை தாங்கினார்.

மாநில தலைவர் ஜெயசீலன், செயலாளர் ரவி ராஜா, துணைத் தலைவர் ராஜேந்திரன், துணை செயலாளர் குமார் முன்னிலை வகித்தனர். திரைப்பட தயாரிப்பாளர்கள் ராஜா, கோவை தம்பி உள்பட பலர் கலந்து கொண்டனர்.

இலவச கம்ப்யூட்டர் மையத்தை நடிகர் விஜய் திறந்து வைத்து ரசிகர்கள் மத்தியில் பேசியதாவது:-

எனக்குள்ள சமூக சிந்தனை என்னுடைய ரசிகர்களுக்கும் இருக்கிறது. அவர்களுக்குள் இருக்கிற சமூக அக்கறை எனக்கும் இருக்கிறது. எனவேதான் சமூக சிந்தனை, அக்கறைகளை வளர்ப்பதற்கு மக்கள் இயக்கம் தொடங்கப்பட்டுள்ளது.

மக்கள் இயக்கத்தை அரசியல் இயக்கமாக மாற்ற வேண்டும் என்று அனைவரும் கூறுகின்றனர். எனக்கும் அரசியலில் கலக்க வேண்டும் என்ற ஆசை உள்ளது. அதற்கான அஸ்திவாரம் தான் மக்கள் இயக்கம்.

இந்த மக்கள் இயக்கத்துக்கு உறுப்பினர்களை நிர்வாகிகள் அதிக அளவில் சேர்க்க வேண்டும். உறுப்பினர்களை எவ்வளவு விரைவாக சேர்க்கிறார்களோ அதை பொறுத்து அரசியல் கட்சி தொடங்கப்படும். நாகரீகமாக அரசியல் செய்ய நான் விரும்புகிறேன்.

அதனால் நாகரீக அரசியல் பற்றி தெரிந்து கொள்வதற்கு காந்தி, நேரு எழுதிய புத்தகங்களை படித்து கொண்டிருக்கிறேன். கண்டிப்பாக மக்கள் இயக்கம் அரசியல் கட்சியாக மாறும் காலம் வெகு தூரத்தில் இல்லை.

அரசியல் என்பது சினிமாவை போன்றது அல்ல. அரசியல் ஆழமானது. ஆழத்தில் எங்கே விழுவோம் என்று நமக்கு தெரியாது. எனவே அரசியலை பற்றி நன்றாக தெரிந்து கொள்வதற்காகதான் மக்கள் இயக்கம் தொடங்கப்பட்டது.

மக்கள் இயக்கம் என்னும் அஸ்திவாரத்தை பலமாக அமைத்து அரசியல் எனும் கோதாவில் விரைவில் இறங்குவேன். நம்மை யாரும் அசைக்க முடியாது. எந்த புயலையும் சந்திக்கும் தைரியம், மன உறுதியை நான் தயார் செய்து வருகிறேன். என்னுடைய மன உறுதியும் தைரியமும் தான் என்னுடைய இயக்க உறுப்பினர்களுக்கும் இருக்க வேண்டும்.

இவ்வாறு அவர் பேசினார்.

பின்னர் அவர் மேடையில் ரசிகர்- ரசிகைகள் கேட்ட கேள்விகளுக்கு பதில் அளித்தார்.

விழாவில் புதுக்கோட்டை விஜய்மன்ற செயலாளர் கதிரேசன், இளைஞரணி தலைவர் உதயாசக்தி, நகர தலைவர் ராஜா, தர்மபுரி மாவட்ட தலைவர் தாபா.எம்.சிவா உள்பட ஏராளமானோர் கலந்து கொண்டனர்.