முதல்வருக்கு கறுப்புக்கொடி : கலெக்டர் அழைத்து சமரச பேச்சுவார்த்தை

சேலம்: சேலம் வரும் தமிழக முதல்வருக்கு எதிர்ப்பு தெரிவிக்கும்
வகையில், தே.மு.தி.க., சார்பில் கறுப்புக்கொடி காட்ட
திட்டமிடப்பட்டிருந்தது. தகவலறிந்து மாவட்ட கலெக்டர் சந்திரகுமார்,
நிர்வாகிகளை அழைத்து சமரச பேச்சுவார்த்தை நடத்தினார்.
பல்வேறு நிகழ்ச்சிகளில் பங்கேற்க தமிழக முதல்வர் கருணாநிதி வரும் 20ம்
தேதி சேலம் வருகிறார். அவர் வருகையையொட்டி தி.மு.க.,வினர் சிறப்பு
ஏற்பாடுகளை செய்து வருகின்றனர். மாநகர் முழுவதும் விழாக்கோலம்
பூண்டுள்ளது.இந்த நிலையில், கந்தம்பட்டி காலனி மக்கள், @அப்பகுதிக்கு
உட்பட்ட திரவுபதி அம்மன் கோயில் நிலத்தில் தங்களுக்கு வீட்டு மனைப்பட்டா
வழங்க வேண்டும், இல்லையென்றால் பொதுமக்கள் திரண்டு வந்து முதல்வரை
சந்தித்து மனு அளிப்போம்' என அறிவித்தனர்.தாசில்தார் சித்ரா மற்றும்
அதிகாரிகள் அப்பகுதி மக்களிடம் பேச்சு நடத்தினர். மாற்று இடத்தில் நிலம்
தருவதற்கு நடவடிக்கை எடுப்பதாக அதிகாரிகள் உறுதியளித்ததை தொடர்ந்து
அவர்கள் சமாதானமாகினர்.இதேபோன்று, "புதிய கலெக்டர் அலுவலகம், சூப்பர்
ஸ்பெஷாலிட்டி மருத்துவமனை பணிகள் முடிவடையாத நிலையில், முதல்வர் அவற்றை
திறக்கக்கூடாது' என, தே.மு.தி.க., சார்பில் கறுப்புக் கொடி காட்ட
திட்டமிட்டிருந்தனர்.தகவல் அறிந்து, சேலம் நாட்டாண்மை கழக கட்டிடத்தில்,
மாவட்ட கலெக்டர் சந்திரகுமார் தே.மு.தி.க., மாவட்ட செயலாளர்கள்
ராதாகிருஷ்ணன், மோகன்ராஜ் மற்றும் நிர்வாகிகளிடம் பேச்சு நடத்தினார்.
பணிகள் விரைந்து முடிக்க நடவடிக்கை எடுக்கப்படும் என்ற உறுதியையும்
அவர்களிடத்தில் தெரிவித்துள்ளார். மாற்றுத்திறனாளிகள் நலச்சங்கம்,
அம்பேத்கர் மக்கள் கட்சி உள்ளிட்ட பல்வேறு அமைப்புகள், கட்சிகள் முதல்வர்
வருகையை கண்டித்து கறுப்புக் கொடி காட்ட திட்டமிட்டுள்ளதாக வரும்
தகவல்களால் மாவட்ட நிர்வாகம் கலக்கத்தில் உள்ளது.