திருட்டுக்கு உடந்தையும் குற்றம்'

சென்னை : "திருடுவது மட்டும் அல்ல, திருட்டுக்கு உடந்தையாய் இருப்பதும்
குற்றம்' என்று வில்லிபாரதச் சொற்பொழிவில் நாகை முகுந்தன் கூறினார்.நாகை
முகுந்தன் சொற்பொழிவில் மேலும் கூறியதாவது:மகாபாரதம் பல வாழ்வியல் அறங்களை
கூறுகிறது. மகாபாரதக் கதையில் கூறப்பட்டுள்ள கதைப்படி, "அஷ்ட வசுக்கள்'
எனும் தேவ குமாரர்கள், வசிஷ்ட முனிவரிடம் இருந்த தெய்வீக, "காமதேனு' பசுவை
கவர்ந்து செல்ல முயன்றனர். இதை தன் ஞான திருஷ்டி மூலம் அறிந்த வசிஷ்டர்,
எட்டு பேரையும், "தேவர் நிலையில் இருந்து, மனிதர்களாக பிறக்கக் கடவது' என
சபித்து விட்டார்.அதிர்ச்சியடைந்த தேவகுமாரர்களில் ஏழு பேர்,"கடைசி
தேவகுமாரனான பிரபாசன் தான், காமதேனுவை திருடினான். நாங்கள் அவனுக்குத்
துணையாகத் தான் வந்தோம்' என மன்றாடினர்.அதற்கு வசிஷ்டர், "திருடுவது
எப்படி குற்றமோ, அதுபோல், திருட்டுக்கு துணை போவதும் குற்றம். எனவே,
உங்களுக்கும் தண்டனை உண்டு. எனினும், நீங்கள் ஏழு பேரும் பூமியில்
மனிதர்களாகப் பிறந்தவுடனே சாப விமோசனம் கிடைத்து, தேவலோகம்
திரும்பிவீர்கள்.திருடிய பிரபாசன் மட்டும், பூமியில் நீண்ட நாள் வாழ்வான்.
அவனுக்கு இல்லறம் அமையாது; நாட்டமும் இருக்காது' என கூறினார்.
அவர்
தான், மகாபாரதத்தில் மூத்த கதாபாத்திரமாக வரும் பீஷ்மர். இதில் இருந்து
திருடுவதும், திருட்டுக்கு உடந்தையாக இருப்பதும் குற்றம் என்பது
தெளிவாகிறது. இதைத் தான் வள்ளுவரும், "உள்ளத்தால் உள்ளதும் தீதே' என்ற
குறளில் குறிப்பிடுகிறார்.மக்கள் மனங்களில் பாவ, புண்ணியம் என்பதில்
நம்பிக்கை ஏற்பட்டாலே சமூகத்தில் கட்டுப்பாடும், பிறர் நலனும்
காக்கப்படும். இந்த எண்ணம் குறைந்ததால், நாட்டில் குற்றங்கள் தற்போது
மலிந்து விட்டன.எனவே மக்கள், நல்ல எண்ணங்களை ஏற்படுத்திக் கொண்டால்,
மண்ணில் நல்ல வண்ணம் வாழலாம்.இவ்வாறு நாகை முகுந்தன் கூறினார்.