புன்முறுவல் கலாசாரம்: அமெரிக்க மாணவியர் வியப்பு

காலாப்பட்டு: இந்திய மக்களின் புன்முறுவல் கலாசாரம், உணவு பழக்கம்,
கல்விமுறை பிடித்துள்ளதாக அமெரிக்க கலிபோர்னியா யூ.சீ டேவிஸ் பல்கலைக்கழக
மாணவியர் தெரிவித்தனர். அமெரிக்காவிலுள்ள கலிபோர்னியா யூ.சீ. டேவிஸ்
பல்கலைக்கழக மாணவர்கள் 18 பேர் வெளிநாட்டு கல்வி முறை பயண திட்டத்தின்
கீழ், ஒப்பீட்டு இலக்கிய துறை பேராசிரியர் அர்ச்சனா வெங்கடேசன் தலைமையில்,
புதுச்சேரி பல்கலைக்கழக தமிழியல் புலத்திற்கு நேற்று வந்தனர். அமெரிக்க
மாணவர்களுக்கு வரவேற்பு அளிக்கப்பட்டது. பின், ஒரு மணி நேரம் நடந்த
சந்திப்பு நிகழ்ச்சியில், புதுச்சேரி வரலாற்றை அமெரிக்க மாணவர்களுக்கு,
புல முதன்மையர் ஆரோக்கியநாதன் படக்காட்சிகளுடன் விளக்கினார். முனைவர் பட்ட
ஆய்வாளர் பிரபாவதி இதற்கான ஏற்பாடுகளை செய்தார். கலிபோர்னியா யூ.சீ டேவிஸ்
பல்கலைக்கழக மானிடவியல் துறை மாணவி ஷரிபா லிஸ் பிரிட்மென்(20) கூறியதாவது:
புதுச்சேரி சிறிய மாநிலமாக இருந்தாலும், இங்கு நிறைய மக்கள் உள்ளனர்.
இந்திய மக்கள் மிகவும் மகிழ்ச்சியாக சிரித்த முகத்துடன்
காணப்படுகின்றனர். இந்திய மக்கள் புன்முறுவலுடன் சிரித்து பேசுகின்றனர்.
அமெரிக்காவில் இத்தகைய கலாசாரம் இல்லை. அங்கெல்லாம் எதிர்படும் நபர்களிடம்
இதுபோன்று நேருக்கு நேர் பார்த்து பேச மாட்டார்கள். இந்திய மக்களின்
அன்புடன் கலந்த புன்முறுவல் காலாசாரம் எங்களுக்கு மிகவும் பிடித்துள்ளது.
இது இந்தியாவிற்குரிய அற்புதமான விஷயம். புதுச்சேரியின் கட்டட அமைப்பு மிக
அழகாக உள்ளது. தத்துவவியல் துறை மாணவி மியா கர்சியா(20): புதுச்சேரியில்
எங்களுக்கு அற்புதமான வரவேற்பு கிடைத்தது. இந்தியாவின் மற்ற பகுதியில்
இதுபோன்று வரவேற்பு கிடைக்குமா என தெரியவில்லை. இங்குள்ள மக்கள் வண்ணமயமான
ஆடைகள் அணிவது வித்தியாசமாக இருக்கிறது. இந்த விஷயம் அமெரிக்க மக்களிடம்
இருந்து வேறுபடுத்திக் காட்டுகிறது. இந்திய மக்களின் உணவுப் பழக்கம்
பிடித்துள்ளது. தினமும் புதிது புதிதாக சாப்பிட தயாராகி வருகிறோம். இந்திய
மக்களின் இட்லி, தேங்காய் சட்னி, சாம்பார் ஐட்டம் சூப்பராக உள்ளது.
இன்னும் இந்திய பெண்களின் கலாசார உடையான புடவை அணிந்து பார்க்க ஆசையாக
உள்ளது. அரவிந்தரின் கீதா உரையை வாங்கியுள்ளேன். சுற்றுச்சூழல் கல்வி துறை
மாணவி ஜனிஸ் க்ரூ(20): அமெரிக்கா, இந்திய கலாசாரங்களில் கல்வி முக்கிய
இடம் பிடித்துள்ளது. அமெரிக்காவில் பெரும்பாலும் என்ன படிக்கப் போகிறோம்
என்ன செய்யப் போகிறோம் என்பது தெரியாது. ஆனால், இந்திய மாணவர்கள்
கல்லூரியில் சேரும்போதே என்ன படிக்கப் போகிறோம் என திட்டமிட்டு
விடுகின்றனர். அமெரிக்காவில் வகுப்புகள் பெரியதாக இருக்கும். அதனால்
பேராசிரியர்களிடம் அவ்வளவு எளிதாக அறிமுகம் ஆக முடியாது. ஆனால்,
இந்தியாவில் வகுப்பறைகள் சிறியதாக இருப்பதால் பேராசிரியர்களுக்கும்,
மாணவர்களுக்கும் இடையில் சுமுகமான நல்ல அறிமுகம் கிடைத்து விடுகிறது.