பொறியியல் துணை கவுன்சிலிங் 22ம் தேதி துவக்கம்

சென்னை:
பொறியியல் துணை கவுன்சிலிங், வரும் 22, 23 மற்றும் 24ம் தேதிகளில்
நடக்கிறது. பி.இ., - பி.டெக்., உள்ளிட்ட பொறியியல் படிப்புகளுக்கான மாணவர்
சேர்க்கை கவுன்சிலிங், சென்னை அண்ணா பல்கலையில் நடந்தது. கடந்த 13ம்
தேதியுடன் முடிவடைந்த கவுன்சிலிங் மூலம், 1 லட்சத்து 10 ஆயிரத்து 741 பேர்
பொறியியல் படிப்பில் சேர்ந்தனர். கவுன்சிலிங்கின் முடிவில், 9,443 இடங்கள்
காலியாக இருந்தன. பொறியியல் கவுன்சிலிங்கிற்கு விண்ணப்பிக்க தவறியவர்கள்,
பிளஸ் 2 உடனடி தேர்வெழுதி பொறியியல் படிப்பில் சேர தகுதி பெற்றவர்களுக்கு,
பொறியியல் படிப்பில் சேர மற்றொரு வாய்ப்பு அளிக்கப்பட்டது. பொறியியல் துணை
கவுன்சிலிங்கிற்கு, கடந்த 14 மற்றும் 16ம் தேதிகளில் விண்ணப்பங்கள்
வழங்கப்பட்டன. இதில் 2,250 மாணவர்கள் விண்ணப்பித்தனர். பொறியியல் துணை
கவுன்சிலிங், வரும் 22, 23 மற்றும் 24ம் தேதிகளில் நடக்கிறது. வரும் 22ம்
தேதி காலை 9 மணிக்கு 135.75, 10:30 மணிக்கு 114.25, மதியம் 12 மணிக்கு
102.75, 1:30 மணிக்கு 94.25, 3 மணிக்கு 86.75, மாலை 4:30 மணிக்கு 73.75
வரையும் "கட்-ஆப்' மதிப்பெண் பெற்ற "அகடமிக்' மாணவர்கள் கவுன்சிலிங்கிற்கு
அழைக்கப்பட்டுள்ளனர். பொறியியல் கவுன்சிலிங்கின் முடிவில், எஸ்.சி.,
அருந்ததியினர் பிரிவில் காலியாகயுள்ள இடங்கள் எஸ்.சி., பிரிவினருக்கு
ஒதுக்கப்படுகிறது. இதற்கான கவுன்சிலிங் வரும் 23ம் தேதி நடக்கிறது. இந்த
கவுன்சிலிங்கில் கலந்து கொள்ள விரும்பும் பொதுப்பிரிவு எஸ்.சி., மாணவர்கள்
தங்களது இடஒதுக்கீட்டு ஆணை, அசல் சான்றிதழ்களுடன் காலை 9 மணி முதல் 10
மணிக்குள் வருகையை பதிவு செய்து பின் கவுன்சிலிங்கில் கலந்து கொள்ளலாம்.
வரும் 24ம் தேதி பிளஸ் 2 தொழிற்கல்வி மாணவர்களுக்கான துணை கவுன்சிலிங்
நடக்கிறது. காலை 9 மணிக்கு, 121.50, 10:30 மணிக்கு 119.17, மதியம் 12
மணிக்கு 115, 1:30 மணிக்கு 100 வரை "கட்-ஆப்' மதிப்பெண் பெற்றவர்கள்
கவுன்சிலிங்கிற்கு அழைக்கப்பட்டுள்ளனர். மதியம் 3 மணிக்கு துணை
கவுன்சிலிங்கிற்கு விண்ணப்பித்த இதர மாணவர்கள் அனைவரும்
அழைக்கப்பட்டுள்ளனர்.