அடிக்கடி பழுதாகும் இ.டி.ஏ., மிஷின்அரசு பஸ் கண்டக்டர்கள் அவதி

நாமக்கல்:

சேலம் கோட்ட அரசு பஸ் கண்டக்டர்களுக்கு வழங்கப்பட்ட இ.டி.ஏ.,
இயந்திரம் அடிக்கடி "மக்கர்' செய்வதால், டிக்கெட் வழங்குவதில் சிக்கல்
ஏற்படுகிறது.












தமிழகத்தில் மொத்தம் உள்ள 22 அரசு போக்குவரத்து கழகங்கள், ஏழு கோட்டம்
மற்றும் 16 மண்டலங்களாக பிரிக்கப்பட்டுள்ளன. அவற்றில் மொத்தம் 17 ஆயிரத்து
850 பஸ்கள் இயக்கப்படுகின்றன. 65 ஆயிரத்துக்கும் அதிகமான கண்டக்டர்கள்
பணிபுரிந்து வருகின்றனர். பயணிகளுக்கு டிக்கெட் வழங்குவதை எளிதாக்கும்
வகையில், தொலைதூர பஸ்களில் பணிபுரியும் கண்டக்டர்களுக்கு, கடந்த 2008ம்
ஆண்டு இ.டி.ஏ., இயந்திரம் (கம்யூட்டர் டிக்கெட் மிஷின்) வழங்கப்பட்டது.அந்த
இயந்திரத்தில் கட்டணம் விவரம் பதிவு செய்யப்பட்டுள்ளதால், பயணிகள்
கேட்டும் இடத்திற்குரிய பட்டனை அழுத்தியவுடன் டிக்கெட் வெளியே வரும்.
அதில், பயணி ஏறும் இடமும், இறங்கும் இடமும் குறிப்பிடப்பட்டு, அதற்கான
பயணத்தொகையும் குறிப்பிடப்பட்டிருக்கும். இந்நடைமுறை கண்டக்டர்களுக்கு
வசதியாக அமைந்தது.

























சேலம் கோட்டத்தில் வழங்கப்பட்ட இ.டி.ஏ., இயந்திரங்கள் அடிக்கடி பழுதடைந்து
விடுவதால், முறையாக டிக்கெட் வழங்க முடியாமல் கண்டக்டர்கள்
அவதிப்படுகின்றனர்.இதுகுறித்து அரசு போக்குவரத்துக் கழக கண்டக்டர்கள் சிலர்
கூறியதாவது:சேலம் கோட்டத்துக்கு உட்பட்ட மாவட்டங்களில் வழங்கப்பட்ட
டிஜிட்டல் டிக்கெட் இயந்திரங்கள் தரம் குறைந்தவையாக உள்ளன. அதனால் அடிக்கடி
பழுதடைகிறது. அவற்றில் உள்ள பேட்டரியில் நீண்ட நேரம் சார்ஜ் நிற்பதில்லை.
எனவே, டிக்கெட் வழங்குவதில் சிரமம் ஏற்படுகிறது. கட்டணம் விவரம் சரிவர
பிரிண்ட் ஆவதில்லை. அதனால் பல நேரங்களில், பயணிகள் வாக்குவாதம்
செய்கின்றனர். இதுபற்றி கிளை மேலாளர்களிடம் அவ்வப்போது புகார்
தெரிவித்தும், எவ்வித பயனும் இல்லை.பழுதடைந்த இயந்திரத்தை சரி
செய்யக்கொடுத்தால், திருப்பி வழங்கவும் தாமதமாகிறது. அதனால், பல பஸ்களில்
பழைய முறைப்படி டிக்கெட் வழங்கப்படுகிறது. இந்த இயந்திரங்களை மாற்றி, புதிய
இயந்திரங்கள் வழங்கினால் மட்டுமே இப்பிரச்னைக்கு தீர்வு காண முடியும்,
என்றனர்.