மலேசியாவில் பொன்னி அரிசி வர்த்தக குறியீட்டுக்கு கோர்ட் தடை

கோலாலம்பூர் : மலேசியாவைச் சேர்ந்த வர்த்தக நிறுவனம், இனி "பொன்னி'
என்ற வார்த்தையை தங்கள் வர்த்தகச் சின்னமாக உபயோகிக்கக் கூடாது என்று
மலேசிய ஐகோர்ட் தீர்ப்பளித்துள்ளது. புவிசார் குறியீடு தொடர்பு வழக்கில்
இந்தியாவுக்கு சாதகமாக வந்த முதல் தீர்ப்பு இது என்பது குறிப்பிடத்தக்கது.

மலேசியாவைச் சேர்ந்த "சியாரிகட் பைசா' என்ற வர்த்தக நிறுவனம்,
2000, ஜூன் 6ம் தேதி, தன் அரிசியின் வர்த்தக சின்னமாக "பொன்னி' என்ற
வார்த்தையை பதிவு செய்வதற்கு மனு தாக்கல் செய்தது. அந்நிறுவனத்தின்
வர்த்தக சின்னமாக அது ஏற்றுக் கொள்ளப்பட்டதாக, 2005 அக்டோபர் 27ம் தேதி
மலேசிய அரசு கெசட்டில் குறிப்பு வெளியானது. அதைத் தொடர்ந்து, மலேசிய
வர்த்தக சின்னப் பதிவேட்டில், பைசா நிறுவனத்தின் வர்த்தக சின்னமாக
"பொன்னி' 2006 ஜனவரி 20ம் தேதி சேர்க்கப்பட்டது.
இதை எதிர்த்து, "இந்திய வேளாண் மற்றும் பதப்படுத்தப்பட்ட உணவு
ஏற்று மதி மேம்பாட்டு ஆணையம்' (ஏ.பி. இ.டி.ஏ.,), தமிழக வேளாண்
பல்கலைக்கழகம் (டி.என்.ஏ.யு.,), இந்திய விவசாயிகள் மற்றும் இரண்டு
ஏற்றுமதியாளர்கள் என ஆறு பேர், இந்த ஆண்டு ஜனவரி 22ம் தேதி, மலேசிய
ஐகோர்ட்டில் மனு தாக்கல் செய்தனர்.
அவர்கள் தங்கள் மனுவில், "பொன்னி என்ற வார்த்தை எங்களுக்குரியது.
தமிழகத்தில் காவிரி டெல்டா பகுதியில் விளைவதால் அதற்கு "பொன்னி' அரிசி
என்று பெயரிடப்பட்டுள்ளது. அப்பெயர், மலேசிய வர்த்தக சின்னப் பதிவேட்டில்
தவறுதலாக இடம் பெற்றுள்ளது. அப்பெயருக்கு பைசா நிறுவனம் உரிமையாளரும்
அல்ல, உருவாக்கியவரும் அல்ல' என்று தெரிவித்திருந்தனர்.
இவ்வழக்கை விசாரித்த மலேசிய ஐகோர்ட் நீதிபதி அசாகர் முகமது தன்
தீர்ப்பில் கூறியிருப்பதாவது: "பொன்னி' என்ற வார்த் தை தமிழகத்தில் ஓடும்
காவிரி ஆற்றின் பெயர். அங்கு விளையும் அரிசியின் பெயர். பைசா நிறுவனம்
அந்த வார்த்தையைக் கண்டுபிடிக்கவில்லை. அதனால் அப்பெயரை அந்நிறுவனம்
பயன்படுத்தும் உரிமையைப் பெற முடியாது.
பைசா நிறுவனம் அப்பெயரைப் பயன்படுத்துவதால் வாடிக்கையாளர்களிடம்
குழப்பம் தான் வரும். எனவே அந்த வார்த்தையை மலேசிய வர்த்தக சின்னப்
பதிவேட்டிலிருந்து நீக்க வேண்டும். அது தவறுதலாக பதிவேட்டில் இடம் பெற்று
விட்டது. இவ்வாறு நீதிபதி தன் தீர்ப்பில் தெரிவித்துள்ளார்.
புவிசார் குறியீடு (ஜி.ஐ.,) தொடர்பான வழக்கில் இந்தியாவுக்கு இது முதல் வெற்றி என்பது குறிப்பிடத்தக்கது.