வெளிநாடு சென்று படிக்கும் மாணவருக்கு 50 சதவீத நிதி

சென்னை :

மாணவர் ஆசிரியர் பரிமாற்ற ஒப்பந்தத்தின் கீழ் வெளிநாடு சென்று படிக்க விரும்பும் மாணவர்களுக்கு 50 சதவீத நிதி வழங்கப்படும் என்று சென்னைப் பல்கலை கழக துணை வேந்தர் திருவாசகம் தெரிவித்தார். சென்னை பல்கலை கழகத்தின் இதழியல் துறை, ஜப்பான் நாட்டின் நாம்சான் பல்கலைக் கழகம் ஆகியவை இணைந்து சென்னையில் ஒரு கருத்தரங்கு நடத்தின. இதை சென்னையில் உள்ள ஜப்பான் துணை தூதர் கசுவோமினகோவா தொடங்கி வைத்து பேசியதாவது:இந்தியாவில் பல மாநிலங்கள் உள்ளன. அங்குள்ள மக்கள் ஒவ்வொரு மொழியை பேசுகின்றனர். தனித்தனி மொழி உள்ளது போல அவர்களுக்கு தனி கலாச்சாரம், மதம், இருக்கிறது. ஆனால் அவர்கள் தங்களை இந்தியர்கள் என்று சொல்லிக் கொள்கின்றனர். வேற்றுமையில் ஒற்றுமை என்பதை இந்தியாவிடம் இருந்து நாம் கற்றுக் கொள்ள வேண்டும் என்றார்.சென்னை பல்கலைக்கழக துணை வேந்தர் திருவாசகம் பேசியதாவது: சென்னை பல்கலை கழகத்தில் 72 துறைகள் உள்ளன. இந்த துறைகளில் செய்முறையுடன் கூடிய கல்வியை வழங்குவதில் முன்னிலையில் உள்ளது இதழியல் துறைதான். ஜப்பானில் இருந்து 60 மாணவர்கள் இங்கு வந்து படிக்கின்றனர். அவர்கள் மதுரை அடுத்துள்ள வாடிப்பட்டி கிராமத்துக்கு சென்று அங்கேயே தங்கி அங்குள்ள மக்களின் கலாச்சாரத்தை கற்க உள்ளனர். இந்த முறை ஜப்பான் நாட்டின் பாடத்திட்டத்தில் உள்ளது.சென்னைப் பல்கலைக் கழகம் 114 வெளிநாட்டு பல்கலைக் கழகங்களுடன் ஒப்பந்தம் போட்டுள்ளது. வெளிநாட்டு மாணவர்கள் இங்கு 115 பேர் படிக்கின்றனர். சென்னைப் பல்கலைக் கழகத்துடன் இணைந்த கல்லூரிகளில் 924 பேர் படிக்கின்றனர். ஆனால் இங்குள்ள மாணவர்களில் ஒருவர்கூட மாணவர் பரிமாற்றத்தின் கீழ் வெளிநாடு சென்று படிக்கவில்லை. அப்படி வெளியில் சென்று படிக்க முன்வரும் மாணவர்களுக்கு 50 சதவீத நிதி வழங்க சென்னை பல்கலைக் கழகம் தயாராக உள்ளது.இவ்வாறு அவர் தெரிவித்தார்.சேர்க்கை தேதி 21 வரை நீட்டிப்புசென்னை பல்கலைக்கழக தேர்வுகளில் தோல்வி அடையும் மாணவர்களுக்கு உடனடி தேர்வு முறை கடந்த ஆண்டு அறிமுகம் செய்யப்பட்டது. இதற்கு நல்ல பலன் கிடைத்துள்ளது. உடனடித் தேர்வு எழுத இளநிலை படிப்பு மாணவர்கள் 1558 பேர் பதிவு செய்திருந்தனர். அவர்களில் 1517 பேர் தேர்வு எழுதினர். 1067 பேர் வெற்றி பெற்றுள்ளனர். அதேபோல முதுநிலை பட்டப்படிப்பு மாணவர்கள் 154 பேர் பதிவு செய்தனர். 62 பேர் தேர்ச்சி பெற்றுள்ளனர். இந்த தேர்வில் வெற்றி மாணவர்களும் பல்கலைக் கழக படிப்பில் மீண்டும் சேர வசதியாக ஆகஸ்ட் 21 ம் தேதி வரை சேர்க்கையை நீட்டித்துள்ளோம் என்று திருவாசகம் தெரிவித்தார்.