வளர் இளம்பெண்களுக்கு ஊட்டச்சத்து வழங்கும் திட்டம்

புதுடெல்லி :

நாட்டில் 11 வயது முதல் 18 வயது வரை உள்ள வளர் இளம்பெண்களுக்கு ஊட்டச்சத்து மற்றும் பொருளாதார ரீதியாக அதிகாரம் அளிக்கும் திட்டத்துக்கு, பொருளாதார விவகாரங்களுக்கான மத்திய அமைச்சரவை குழு அனுமதி அளித்துள்ளது. நாட்டில் 11 முதல் 18 வயது வரை உள்ள வளர் இளம்பெண்களின் நலனுக்கு சிறப்பு திட்டத்தை அமல்படுத்த அமைச்சர்கள் குழு மத்திய அரசுக்கு பரிந்துரைத்திருந்தது. அதன்படி, வளர் இளம்பெண்களின் உடல்நலன் மற்றும் பொருளாதார நிலையை உறுதிப்படுத்த, ராஜிவ் காந்தி பெயரில் தேசிய திட்டம் செயல்படுத்தப்பட உள்ளது. இத்திட்டத்தின்படி, நாட்டில் உள்ள எல்லா மாநிலங்களில் இருந்தும் முதற்கட்டமாக 200 மாவட்டங்கள் தேர்ந்தெடுக்கப்பட உள்ளன. ஒருங்கிணைந்த குழந்தைகள் மேம்பாட்டு சேவை திட்டத்தின் கீழ், அங்கன்வாடிகள் மூலம் இத்திட்டம் செயல்படுத்தப்பட உள்ளது.இத்திட்டத்தின்படி வளர் இளம்பெண்கள் ஊட்டச்சத்து பெறுவதற்கு, ரேஷனில் தேவையான பொருட்கள் வழங்கப்படும். ரேஷன் பொருட்களுக்கு பதில், சமைத்த ஊட்டச்சத்து உணவை வழங்க எந்த மாநிலமாவது விரும்பினால், உணவின் தரம் உறுதி செய்யப்படும். இந்த 2 வழிகள் தவிர வளர் இளம்பெண்களின் மேம்பாட்டுக்கு பணமாகவே வழங்குவதற்கான வாய்ப்புகள் குறித்தும் மத்திய அரசு ஆய்வு செய்யும்.பதினோராவது ஐந்தாண்டு திட்டத்தின் மீதமுள்ள ஆண்டுகளில் இத்திட்டத்தை செயல்படுத்த, ஸி4,500 கோடியை மத்திய அரசு ஒதுக்கி உள்ளது. 2010&11ம் ஆண்டு பட்ஜெட்டில் இத்திட்டத்தை செயல்படுத்த ஸி1,000 கோடி ஒதுக்கப்பட்டுள்ளது. இதன் மூலம் ஆண்டுக்கு 1.15 கோடி வளர் இளம்பெண்கள் பயனடைவார்கள் என்று எதிர்பார்க்கப்படுகிறது.இத்திட்டத்தை செயல்படுத்துவதற்கு அங்கன்வாடி மையங்களில் உள்கட்டமைப்பு, மற்ற வசதிகள் இல்லாதபோது, அருகில் உள்ள பள்ளிகள், பஞ்சாயத்துகள், சமூகநல கூடங்களில் மாற்று ஏற்பாடுகள் செய்யப்படும். இத்திட்டத்தின் முக்கிய அம்சங்கள்:= இத்திட்டத்துக்கான செலவில் மத்திய, மாநில அரசுகள் 50:50 சதவீதம் ஏற்றுக் கொள்ளும். வளர்பெண்களுக்கு தலா 600 கலோரி மற்றும் 18&20 கிராம் புரோட்டீன் அடங்கிய ஊட்டச்சத்து தினமும் வழங்கப்படும். = ஆண்டின் 300 நாட்களுக்கு இதுபோல் ஊட்டச் சத்து வழங்கப்படும்.= இத்திட்டத்தின்படி, 11 வயது முதல் 14 வயது வரை பள்ளியில் படிக்கும் வளர் இளம்பெண்களுக்கு ஊட்டச்சத்து வழங்கப்படும். 15 வயது முதல் 18 வயது வரை எல்லா வளர் இளம்பெண்களுக்கும் ஊட்டச்சத்து வழங்கப்படும்.= இத்திட்டத்தை சிறப்பாக செயல்படுத்த தன்னார்வ தொண்டு நிறுவனங்களுடன் ஒப்பந்தம் ஏற்படுத்தப்படும்.இத்திட்டத்துக்கு பொருளாதார விவகாரங்களுக்கான மத்திய அமைச்சரவை குழு நேற்று ஒப்புதல் அளித்தது. விரைவில் இத்திட்டம் அமலுக்கு வரும் என்று எதிர்பார்க்கப்படுகிறது.