நாற்காலிச் சண்டையால் கல்வித்துறையின் குட்டு அம்பலம்!

வேலூர்,

ஒரே அரசுப் பள்ளியில் இரு தலைமையாசிரியர்கள் உள்ளதால் இருவரிடையே திங்கள்கிழமை தகராறு ஏற்பட்டது. இதில்,
வேலூரிலிருந்து பதவி உயர்வில் திருவண்ணாமலைக்குச் சென்ற
தலைமையாசிரியைக்கு, ஒரே மாதத்தில் மீண்டும் வேலூருக்கு இடமாறுதல் அளித்த
கல்வித்துறையின் குட்டு அம்பலத்துக்கு வந்தது. வேலூரில் உள்ள
ஈ.வெ.ரா.மணியம்மை மகளிர் மேல்நிலைப் பள்ளியின் தலைமை ஆசிரியராக பணியில்
இருந்தவர் விஜயகுமாரி. இவர், கணவரை இழந்தோருக்கான ஒதுக்கீட்டின்
அடிப்படையில், கடந்த 2009 ஜூன் 1-ம் தேதி அப்பள்ளியின் தலைமை ஆசிரியராகப்
பொறுப்பேற்றார். அதே பள்ளியில் உதவி தலைமை ஆசிரியராகப் பணியாற்றி
வந்த ஸ்ரீகாயத்ரி தேவிக்கு பதவி உயர்வு கிடைத்தது. இதையடுத்து, கடந்த ஜூலை
2-ல் நடைபெற்ற கலந்தாய்வின் போது, திருவண்ணாமலை மாவட்டத்தில் உள்ள
காரப்பட்டு அரசு மேல்நிலைப்பள்ளி தலைமை ஆசிரியராக பணி ஒதுக்கீடு
செய்யப்பட்டது. ஆனால் அவர் பணியில் சென்று சேரவில்லையாம். ஒரே
மாதத்தில் இவரை, திடீரென வேலூர் ஈ.வெ.ரா. மணியம்மை பள்ளியின்
தலைமையாசிரியராக நியமித்து, பள்ளிக் கல்வித்துறை இயக்ககம் உத்தரவு
பிறப்பித்திருக்கிறது. மேலும், இங்கு பணியாற்றி வந்த விஜயகுமாரியை,
திருவண்ணாமலை மாவட்டம் காரப்பட்டு அரசு மேல்நிலைப்பள்ளிக்கு மாறுதல்
செய்தும் உத்தரவு அளித்துள்ளது. கவுன்சலிங் மூலம் இடமாறுதல்
பெற்றவரை, அடுத்த ஓராண்டுக்கு இடமாற்றம் செய்யக்கூடாது எனும் அடிப்படை
விதியை மீறி, காயத்ரிதேவிக்கு ஈ.வெ.ரா.மணியம்மை அரசு மேல்நிலைப் பள்ளியை
கல்வித்துறை இயக்ககம் ஒதுக்கீடு செய்திருப்பதால் அதிருப்தியடைந்த
விஜயகுமாரி, கடந்த 12-ம் தேதி சென்னை உயர்நீதிமன்றத்தில் பணிமாறுதலுக்கு
தடையாணை பெற்றுள்ளார். இதையடுத்து, இரு தலைமையாசிரியர்களும்
திங்கள்கிழமை பள்ளிக்கு வந்துள்ளனர். அங்குள்ள தலைமையாசிரியர் இருக்கையில்
யார் அமர்வது என்பதில் இருவரிடையே தகராறு ஏற்பட்டுள்ளது. "நீதிமன்ற
உத்தரவுபடி, நானே இங்கு தலைமையாசிரியர்' என விஜயகுமாரியும்,
"இல்லை...இல்லை, அரசு அளித்த பணி மாறுதல்படி நானே இப் பள்ளியின்
தலைமையாசியர்' என ஸ்ரீகாயத்திரி தேவியும் கூற, இருவரிடையே தகராறு மூண்டது. இதுகுறித்து
தகவலறிந்த முதன்மைக் கல்வி அலுவலர் ராதாகிருஷ்ணன் பள்ளிக்குச் சென்று
விசாரணை நடத்தினார். காரப்பட்டு பள்ளிக்குச் சென்று பொறுப்பேற்குமாறு
விஜயகுமாரியை அறிவுறுத்தினார். ஆனால், நீதிமன்றத் தடையாணையைக் காட்டிய
விஜயகுமாரி, இட மாறுதலுக்கு மறுப்பு தெரிவித்தார். இதனால், பள்ளித்
தலைமையாசிரியர் அறைக்குப் பூட்டு போட்டுவிட்டுத் திரும்பினார் முதன்மைக்
கல்வி அலுவலர் ராதாகிருஷ்ணன். பின்னர் அவர் செய்தியாளர்களிடம்
கூறும்போது, "சென்னையில் உள்ள பள்ளிக் கல்வி இயக்குநர் அலுவலகத்துக்குத்
தகவல் அளிக்கப்பட்டுள்ளது. மேற்கொண்டு செய்ய வேண்டியது குறித்து
அங்கிருந்து அறிவிப்பு வரும். அதன்பிறகே, இப் பள்ளியின் தலைமையாசிரியர்
பொறுப்பு யாரிடம் என்பது தெரியவரும்' என்றார் அவர்.