இடம் தந்தால் காங்கேயத்தில் காளை ஆராய்ச்சி மையம் : அமைச்சர் தகவல்

சென்னிமலை:


""தமிழகத்தில் 200 கோடி ரூபாய் செலவில் இரண்டு லட்சம்
மாடுகளுக்கு சினை ஊசி போட நடவடிக்கை மேற்கொள்ளப்பட்டுள்ளது,'' என,
கால்நடைத் துறை அமைச்சர் பொங்கலூர் பழனிசாமி கூறினார்.திருப்பூர் மாவட்டம்
காங்கேயம் அடுத்துள்ள குட்டப்பாளையத்தில் "லைஃப் நெட்வொர்க்' மற்றும்
சேனாபதி காங்கேயம் கால்நடை ஆராய்ச்சி நிலையம் சார்பில் பல்லுயிர்
பாதுகாப்பு மற்றும் கால்நடை இனவிருத்தி தொடர்பான மூன்று நாள் கருத்தரங்கு
நடந்தது. கருத்தரங்கை துவக்கி வைத்து கால்நடைத் துறை அமைச்சர் பொங்கலூர்
பழனிசாமி பேசியதாவது:நம் நாட்டின் பராம்பரியம் மிக்க கால்நடை இனங்களை
பாதுகாக்க வேண்டிய அவசியம் தற்போது ஏற்பட்டுள்ளது. தமிழக அரசு ஆண்டுதோறும்
5,100 முகாம் கால்நடை மருத்துவ முகாம்களை நடத்து வருகிறது. ஒரு
மாவட்டத்துக்கு சராசரியாக 300 முகாம் நடத்தப்படுகிறது. ஒவ்வொரு முகாமிலும்
2,000 கால்நடைகள் பயன்பெறுகின்றன.
கால்நடை சினை ஊசி கட்டணம் குறைக்கப்பட்டுள்ளது. காங்கேயம் இனத்தை
சேர்ந்த மூன்று லட்சம் பசுக்களுக்கு இனவிருத்தி ஊசி போடப்பட்டதில் 58
கன்று குட்டிகள் மட்டுமே பிறந்துள்ளன. விவசாயிகள் கால்நடைகளை முறையாக
பராமரிக்காததாலும், கருப்பை கோளாறுகளாலும் சினை நிற்பதில்லை.
தமிழகத்தில்
மட்டும் 20 லட்சம் பசுமாடுகளுக்கு பல்வேறு காரணங்களால் மலட்டுத்தன்மை
இருப்பது ஆய்வில் தெரியவந்துள்ளது. மலட்டுத் தன்மை கொண்ட பசுக்களுக்கு
வெளிநாட்டில் இருந்து தருவிக்கப்படும் சினை ஊசி போட தமிழக அரசு முடிவு
செய்துள்ளது. ஊசியின் விலை 750 ரூபாய்; பராமரிப்பு செலவு 500 ரூபாய் என
ஒரு மாட்டுக்கு 1,250 ரூபாய் செலவாகிறது. மலட்டுத் தன்மை கொண்ட இரண்டு
லட்சம் பசு மாடுகளுக்கு மட்டும் முதல் கட்டமாக 200 கோடி ரூபாய் செலவில்
ஊசி போட முடிவு செய்யப்பட்டுள்ளது.தமிழகம் பால் உற்பத்தியில் மூன்றாவது
இடத்திலும், கோழி வளர்ப்பில் இரண்டாவது இடத்திலும் உள்ளது.
பாரம்பரியத்தின் அடையாளமாக காங்கேயம் இன கால்நடைகளை காப்பாற்ற வேண்டிய
கடமை நம் அனைவருக்கும் உண்டு. காங்கேயம் இன கால்நடை ஆராய்ச்சி மையத்தை
காங்கேயத்திலேயே அமைக்க அரசு தயாராக உள்ளது. இதற்காக 100 ஏக்கர் நிலம்
தேவைப்படுகிறது. நிலம் வழங்க முன்வந்தால் முதல்வரின் ஒப்புதல் பெற்று
ஆராய்ச்சி மையம் துவக்கப்படும்.இவ்வாறு அவர் பேசினார்.நெடுஞ்சாலைத் துறை
அமைச்சர் சாமிநாதன் முன்னிலை வகித்தார். சேனாபதி கால்நடை ஆராய்ச்சி நிறுவன
நிர்வாகி சிவசேனாபதி சுவாமிநாதன் வரவேற்றார். சரஸ்வதி சேனாபதி
குத்துவிளக்கேற்றினார். எம்.எல்.ஏ.,க்கள் காங்கேயம் விடியல்சேகர்,
மொடக்குறிச்சி பழனிசாமி, முன்னாள் எம்.எல்.ஏ., ராஜ்குமார் மன்றாடியார்,
தமிழ்நாடு கால்நடை பல்கலைக்கழக துணைவேந்தர் தங்கராஜ் ஆகியோர் முன்னிலை
வகித்தனர்.ஜெர்மன், ஸ்பெயின், ஸ்வீடன், இங்கிலாந்து, தென்ஆப்பிரிக்கா
உள்ளிட்ட பல்வேறு நாடுகளை சேர்ந்த கால்நடை வளர்ப்பு நிறுவன பிரதிநிதிகள்
50 பேர் கலந்து கொண்டனர். ஏற்பாடுகளை சேனாபதி காங்கேயம் கால்நடை ஆராய்ச்சி
நிலைய நிர்வாகி கார்த்திகேயா, அரவிந்த் ஆகியோர் செய்திருந்தனர்.