பெண் கற்பழித்து கொலை; மீண்டும் பள்ளி வளாகத்தில் நள்ளிரவில் மர்ம கும்பல்

சென்னை:
சென்னை சைதாப்பேட்டை மாதிரி பள்ளி வளாகத்தில், 35 வயது
மதிக்கத்தக்க பெண் கற்பழித்து கழுத்தை நெரித்து கொலை செய்யப்பட்டு கிடந்த
சம்பவம், பெரும் பரபரப்பை ஏற்படுத்தியுள்ளது. சென்னை சைதாப்பேட்டை பஸ்
நிலையம் பின்புறம் உள்ளது டீச்சர்ஸ் காலனி. இதன் அருகில் அரசு மாதிரிப்
பள்ளி வளாகம் அமைந்துள்ளது. இந்த வளாகத்தின் காவலாளியாக, சைதாப்பேட்டை
ஜோதியம்மாள் நகரைச் சேர்ந்த தயாளன்(52) உள்ளார். நேற்று அதிகாலை 6
மணிக்கு, பள்ளியின் பின்புறம் உள்ள பாழடைந்த கழிவறை பகுதிக்கு தயாளன்
சென்றார். அங்கு, கழிவறை வாசலில் 35 வயது மதிக்கத்தக்க பெண் உடலில்
காயங்களுடன், நிர்வாண நிலையில் பிணமாகக் கிடந்தார். உடல் மீது, "ரோஸ்'
நிறத்தினாலான சேலை போர்த்தப்பட்டிருந்தது. தயாளன், சைதாப்பேட்டை
போலீசுக்கு தகவல் அளித்தார். போலீசார் சம்பவ இடம் சென்று, பெண்ணின் உடலை
கைப்பற்றி பிரேத பரிசோதனைக்கு அனுப்பி வைத்தனர். பெண்ணின் உடல் கிடந்த
இடத்தின் அருகில் மது பாட்டில்கள், பிரியாணி பொட்டலங்கள் மற்றும் ஆணுறைகள்
கிடந்தன. அந்த பெண்ணை இரண்டு மூன்று பேர் சேர்ந்து கற்பழித்து, கழுத்தை
நெரித்து கொலை செய்திருக்கலாம் என்று போலீசார் சந்தேகிக்கின்றனர்.
சைதாப்பேட்டை பகுதியில் இப்பெண் கடந்த சில தினங்களாக சுற்றித்
திரிந்ததாகக் கூறப்படுகிறது. எனவே, கொலையாளிகள் சைதாப்பேட்டையை
சேர்ந்தவர்களாக இருக்கலாம் என கருதப்படுகிறது. கொலை நடந்த இடத்தில்
தடயங்களைச் சேகரித்த சைதாப்பேட்டை போலீசார், கொலை செய்யப்பட்ட பெண் யார்?
என்பது குறித்து விசாரித்து வருகின்றனர். ஏற்கனவே, கடந்த சில மாதங்களுக்கு
முன், இந்த வளாகத்தின் அருகில் உள்ள கால்நடை மருத்துவமனை வளாகத்தில்
ஒருவர் கொலை செய்யப்பட்டு கிடந்தார். அவரை கொலை செய்த பெயின்டரை போலீசார்
கைது செய்தனர். ஆனால், இறந்தவர் பற்றிய விவரம் இன்னும் தெரியவில்லை.
இந்நிலையில், மருத்துவமனை வளாகத்திற்கு அடுத்த வளாகத்தில் தற்போது இந்த
கொலை நடந்துள்ளது, அப்பகுதியில் பெரும் பரபரப்பை ஏற்படுத்தியுள்ளது.
பகலில் பள்ளிக்கூடம்; இரவில் "பள்ளி'யறை:
மக்கள் நெருக்கடி மிகுந்த சைதாப்பேட்டையில் அமைந்துள்ள இந்த பள்ளி வளாகம்,
ஐந்து ஏக்கர் பரப்பளவுடையது. இதில், ஆசிரியர் பயிற்சிப் பள்ளி, மாதிரிப்
பள்ளி, மத்திய சென்னை கல்வி அலுவலர் அலுவலகம், பெண்கள் பல்கலைக்கழக
அலுவலகம் உள்ளிட்டவை அமைந்துள்ளன. இதில், மாதிரிப் பள்ளி கட்டடம் 150
ஆண்டுகளுக்கு மேல் பழமையானது. இந்த வளாகத்தின் சுற்றுச்சுவர் ஆங்காங்கே
சேதமடைந்துள்ளதால், அருகில் உள்ள குடிசைப் பகுதியில் இருந்து இந்த
வளாகத்திற்குள் எளிதாக பலர் வந்து செல்கின்றனர். பகல் நேரத்தில் பள்ளி,
ஆசிரியர் பயிற்சிப் பள்ளி மாணவர்கள் என மாணவர்கள் நடமாட்டம்
அதிகமிருக்கும் இப்பகுதி, மாலை 5 மணியானதும் ஆள் அரவமற்ற பகுதியாக
மாறிவிடும். இதனால், இரவில் சமூக விரோதிகளின், "பள்ளி'யறையாக மாறியுள்ளது.
தினசரி, மது பாட்டில்களுடன், பெண்களை அழைத்து வந்து பலர் உல்லாசம்
அனுபவிப்பதாகக் கூறப்படுகிறது.
கல்வி வளாகமா, திருட்டு வளாகமா?:
சைதாப்பேட்டையில் அமைந்துள்ள இந்த மாதிரிப் பள்ளி வளாகத்திற்கு மிகப்பெரிய
வரலாறு உண்டு. ஆசிரியர் தினத்திற்கு வித்திட்ட முன்னாள் ஜனாதிபதியான
ராதாகிருஷ்ணன் படித்து, பணியாற்றிய பள்ளி இது. அவ்வளவு பாரம்பரியம் மிக்க
இந்த பள்ளியில் தற்போது மாணவ, மாணவியருக்கு பாதுகாப்பற்ற நிலை உள்ளது.
இந்த வளாகத்தில் உள்ள கட்டடங்களில் வாங்கப்படும் புதிய பொருட்கள் மறுநாள்
இருக்காது. கடந்த ஆண்டு புதிய கட்டடம் ஒன்றை இந்த வளாகத்தில் பள்ளிக்
கல்வித் துறை அமைச்சர் தங்கம் தென்னரசு திறந்து வைத்தார். அதில் இருந்த
புதிய இருக்கைகள், மேஜைகள் அனைத்தும் அடுத்த இரு நாட்களுக்குள் காணாமல்
போய்விட்டதாகக் கூறப்படுகிறது. வகுப்பறைகளில் வைக்கப்படும் சாக்பீஸ்கள்
கூட, அடுத்த நாள் இருக்காதாம். இப்பள்ளிக்கு முழுமையான சுற்றுச்சுவர்
அமைத்து, பாதுகாக்க வேண்டும் என்று மக்கள் கோரிக்கை விடுத்துள்ளனர்.