பள்ளிக் குழந்தைகளை அடைத்துச் சென்ற வாகனம் மீது வழக்கு

சென்னை:
முதல்வர் செல்லும் பாதையில் சிக்னலை மீறிச் சென்ற குவாலிஸ் காரை போலீசார்
விரட்டிப் பிடித்த போது, அதில், பள்ளிக் குழந்தைகளை அடைத்து கூட்டிச்
சென்றது தெரிந்ததால் வழக்கு பதிவு செய்யப்பட்டது. சென்னை, காமராஜர்
சாலையில் நேற்று மாலை 4.30 மணியளவில் முதல்வர் வருகைக்காக போக்குவரத்து
நிறுத்தப்பட்டிருந்தது. நேப்பியர் பாலம் அருகில், போக்குவரத்து துணை
கமிஷனர் மனோகரன் தலைமையில் போலீசார் பணியில் இருந்தனர். அப்போது, மெரீனா
பகுதியில் இருந்து ஒரு குவாலிஸ் கார், சென்னை பல்கலைக்கழகம் அருகில் உள்ள
போக்குவரத்து சிக்னலை தாண்டி வேகமாக வந்தது. இதுகுறித்து, நேப்பியர்
பாலம் அருகில் நின்ற போலீசாருக்கு தகவல் வந்தது. அந்தநேரத்தில் நேப்பியர்
பாலம் பகுதியை அந்த வாகனம் கடந்து சென்றது. வாகனத்தின் கண்ணாடிகள்
முழுவதும் மூடப்பட்ட நிலையில் இருந்ததால் சந்தேகமடைந்த போக்குவரத்து
போலீசார் அந்த வாகனத்தை விரட்டிப் பிடித்தனர். அந்த வாகனத்தை சோதனையிட்ட
போலீசாருக்கு அதிர்ச்சி காத்திருந்தது. அதில், 15க்கும் மேற்பட்ட பள்ளிக்
குழந்தைகள் அடைத்து வைக்கப்பட்டிருந்தனர். கடத்தப்படுகின்றனரோ என்ற
சந்தேகத்தில் வாகன டிரைவர், ராயபுரத்தை சேர்ந்த சுதாகரை(28) பிடித்து
விசாரித்தனர். அப்போது, கடந்த மூன்று மாதங்களாக சென்னை ராயபுரத்தில்
இருந்து பள்ளிக் குழந்தைகளை ராஜாஅண்ணாமலை புரத்தில் உள்ள ஒரு பிரபல
பள்ளிக்கு அழைத்துச் செல்வதாக டிரைவர் பதிலளித்துள்ளார். போலீசுக்கு
தெரிந்தால் வழக்கு போடுவார்கள் என்பதால் ஏ.சி., போடாமல், கண்ணாடிகளை ஏற்றி
அடைத்து வைத்து அழைத்துச் சென்றதாகவும் டிரைவர் கூறியுள்ளார். தொடர்ந்து
போலீசார் டிரைவர் சுதாகர் மீது வழக்கு பதிவு செய்து விசாரித்து
வருகின்றனர். இதுகுறித்து, போக்குவரத்து துணை கமிஷனர் மனோகரன் கூறும்
போது, ""இவ்வாறு போக்குவரத்து விதிகளை மீறி அதிகளவு குழந்தைகளை வாகனத்தில்
அடைத்து கூட்டிச் செல்வது ஆபத்தானதாகும். பள்ளி நிர்வாகமும், குழந்தைகளின்
பெற்றோரும் தெரிந்தே இந்த தவறை செய்கின்றனர். அதனால் தான் நாங்கள் வாகன
டிரைவரை பிடித்து வழக்கு பதிவு செய்துள்ளோம்,'' என்றார்.