சட்ட விரோத சுரங்கத் தொழில் கமிஷன் அமைத்து நடவடிக்கை

புதுடில்லி:


சட்ட விரோத சுரங்க நடவடிக்கைகளை தடுப்பதற்காக கமிஷன்
அமைக்கிறது மத்திய அரசு. இந்தக் கமிஷன், 18 மாதங்களுக்குள் தன் அறிக்கையை
சமர்ப்பிக்கும். சட்ட விரோதமாக சிலர் சுரங்க நடவடிக்கைகளில் ஈடுபடுவதாக
சமீப காலமாக புகார்கள் அதிகரித்துள்ளன. குறிப்பாக கர்நாடகா, ஒரிசா மற்றும்
ஜார்க்கண்ட் மாநிலங்களில் இதுபோன்ற புகார்கள் கூறப்பட்டன. கர்நாடக மாநில
அமைச்சர்கள் இருவரே சட்ட விரோத சுரங்கத் தொழிலில் ஈடுபடுவதாக குற்றம்
சுமத்தப்பட்டது. இது தொடர்பாக சி.பி.ஐ., விசாரணை உட்பட எந்த விதமான உதவி
கேட்டாலும், செய்யத் தயார் என, மத்திய சுரங்கத் துறை அமைச்சர்
பி.கே.ஹண்டிக், கர்நாடக முதல்வர் எடியூரப்பாவிற்கும் கடந்த நவம்பருக்குப்
பின், நான்கு முறை கடிதம் எழுதியுள்ளார். சுரங்கங்கள் தொடர்பாக புதிய
சட்டம் ஒன்றை உருவாக்க தயாராக இருப்பதாகவும் மத்திய அரசு தெரிவித்தது.
அதேநேரத்தில், சட்ட விரோத சுரங்கத் தொழிலை தடுப்பது குறித்து சுரங்கத்துறை
அமைச்சகத்தின் உயர் அதிகாரிகளுடன் பிரதமர் அலுவலகம் பல முறை ஆலோசனை
நடத்தியது. இதையடுத்து, சட்ட விரோத சுரங்கத் தொழிலை தடுப்பதற்காக கமிஷன்
ஒன்றை அமைப்பது என, மத்திய அரசு முடிவு செய்துள்ளது. இதற்கு மத்திய
அமைச்சரவையும் நேற்று ஒப்புதல் அளித்தது. புதிதாக அமைக்கப்படும் கமிஷன்,
18 மாதங்களுக்குள் அறிக்கை சமர்ப்பிக்க வேண்டும் என, கேட்டுக்
கொள்ளப்படும். கர்நாடகா உட்பட சுரங்க வளம் நிறைந்த மாநிலங்களில் சட்ட
விரோத சுரங்கத் தொழிலை தடுப்பது எப்படி என்பது குறித்து இந்த கமிஷன் ஆய்வு
செய்து அறிக்கை அளிக்கும். பெண்களுக்காக புதிய திட்டம்: நாட்டில்
தேர்ந்தெடுக்கப்பட்ட 200 மாவட்டங்களில் வளர் இளம் பருவ பெண்களின்
பொருளாதார நிலையை மேம்படுத்தவும், அவர்களின் ஊட்டச் சத்து குறைபாட்டை
போக்கவும் புதிய திட்டம் ஒன்றை மத்திய அரசு நேற்று துவக்கியுள்ளது. "வளர்
இளம் பருவ பெண்களுக்கு (11 முதல் 18 வயது உள்ளவர்களுக்கு) அதிகாரம்
அளிக்கும் ராஜிவ் காந்தி திட்டம் (சாப்லா)' என்ற இந்தத் திட்டம் 4,500
கோடி ரூபாய் செலவில் அமல்படுத்தப்படும். இதற்கும் மத்திய அமைச்சரவை நேற்று
ஒப்புதல் வழங்கியது. இத்திட்டத்தின் கீழ், வளர் இளம் பருவ பெண்களுக்கு தனி
ரேஷன் வழங்கப்படும். ஏதாவது ஒரு மாநிலம் சமைத்த உணவைத்தான் வழங்க வேண்டும்
என, வலியுறுத்தினால், அதற்கேற்ற வகையில் ஏற்பாடு செய்யப்படும். இந்த 4,500
கோடி ரூபாய் என்பது 11வது ஐந்தாண்டு திட்ட காலத்தில் மீதமுள்ள
ஆண்டுகளுக்குத்தான். நடப்பு 2010 - 11ம் நிதியாண்டிற்கு ஆயிரம் கோடி
ரூபாய் வழங்கப்படும். இதற்கிடையில், இரும்புத்தாது ஏற்றுமதிக்கு தடை
விதிக்கக் கூடாது என, மத்திய வர்த்தகம் மற்றும் தொழில் துறை அமைச்சகம்
வலியுறுத்தியுள்ளது. இரும்புத்தாது ஏற்றுமதிக்கு தடை விதித்தால், அது
பொருளாதார நடவடிக்கைகளை பாதிக்கும் என்றும் மத்திய வர்த்தகம் மற்றும்
தொழில் துறை இணை அமைச்சர் ஜோதிர் ஆதித்ய சிந்தியா நேற்று
தெரிவித்துள்ளார்.