வேதாத்திரி மகரிஷி அவர்களின் நூற்றாண்டு விழா - முதல்வர் கருணாநிதி பங்கேற்பு

சென்னையில் ஆகஸ்ட் 14-ம் தேதி (சனிக்கிழமை) அருள்தந்தை வேதாத்திரி மகரிஷி அவர்களின் நூற்றாண்டு விழா நடைபெற உள்ளது. இந்த விழாவை தமிழக முதல்வர் கருணாநிதி தொடங்கி வைக்கிறார்கள்.

நூற்றாண்டு விழா, நேரு உள்விளையாட்டு அரங்கில் காலை 10.30 மணி முதல் இரவு 7 மணி வரை நடைபெறும். இந்த விழாவின் தொடக்க நிகழ்ச்சியில் முதல்வர் கருணாநிதி தலைமை வகித்து விழா மலரை வெளியிடுகிறார். மத்திய அமைச்சர் ஆ.ராசா, வேதாத்திரி மகரிஷியின் உருவப்படம் அச்சிடப்பட்ட சிறப்பு அஞ்சல் தலையை வெளியிடுகிறார்.

இதில் ஆழியாறு அறிவுத்திருக்கோயிலின் தலைவரும், தொழிலதிபருமான பொள்ளாச்சி நா. மகாலிங்கம், நிர்வாக அறங்காவலர் எஸ்.வி. பாலசுப்பிரமணியம் உள்ளிட்டோர் பங்கேற்கின்றனர்.

இதன்பின், உலக அமைதிக்கு அறநெறி மற்றம் பண்பாட்டை கல்வி மூலம் கொண்டு சேர்ப்பது குறித்த கருத்தரங்கு நடைபெற உள்ளது. இதை உயர் கல்வி அமைச்சர் பொன்முடி தொடங்கி வைக்கிறார். பள்ளிக் கல்வித்துறை அமைச்சர் தங்கம் தென்னரசு, கவிஞர் வைரமுத்து, மாநகர மேயர் மா. சுப்பிரமணியன் உள்ளிட்டோர் பங்கேற்கின்றனர்.

பிற்பகலில் நடைபெறும் உலக அமைதிக்கு வேதாத்திரிய சிந்தனைகள் என்ற கருத்தரங்கை, மத்திய அமைச்சர் ஜெகத்ரட்சகன் தொடங்கி வைக்கிறார். சிபிஐ முன்னாள் இயக்குநர் டி.ஆர். கார்த்திகேயன், தமிழ் மையத்தின் நிறுவனர் ஜெகத் கஸ்பார், கவிக்கோ அப்துல் ரகுமான், சுகிசிவம் உள்ளிட்டோர் பலர் இதில் உரையாற்றுகின்றனர்.

மேலும் இந்த நூற்றாண்டு விழாவில் நடிகர் ரஜினிகாந்த், சிவகுமார், சூர்யா ஆகிய முன்னனி நட்சத்திரங்களும் கலந்துகொள்கின்றனர்.

விழாவின் நிறைவாக அமைதிப்புறா என்ற கலைநிகழ்ச்சி நடைபெற உள்ளது.

இந்த நிகழ்ச்சியை நேரில் காண விரும்புவோர் உலக சமுதாய சேவா சங்கத்தின் தலைமையகத்தை தொடர்பு கொண்டு நிகழ்ச்சியில் பங்கேற்று பயன் பெறலாம்.

உலக சமுதாய சேவா சங்கம்
எண். 26, இரண்டாவது கடல்நோக்குச் சாலை,
வால்மீகி நகர், திருவான்மியூர்,சென்னை - 600 041.
போன் 044-24411692, 24456269.

நன்றி, வாழ்க வளமுடன்.