தீவிரவாதத்திற்கு எதிரான படம்-'நிமிடங்கள்' பற்றி கீதாகிருஷ்ணா

நிமிடங்கள் என்ற படத்தின் பாடல் வெளியீட்டு விழாவுக்கு வந்திருந்தவர்களுக்கு பெருத்த ஆச்சர்யம்! வழக்கமான சினிமா விழாவாக அல்லாமல் ஒரு கருத்தரங்கம் போலிருந்ததுதான் அந்த அதிர்ச்சிக்கு காரணம். சென்னை சட்டப் பல்கலைக்கழக துணை வேந்தர் மற்றும் கிரிமினாலஜி பேராசிரியர்கள் பலரும் வந்திருந்தார்கள். தங்கள் துறை சார்ந்த விஷயஙகளை அவர்கள் பேச பேச ஒரு கட்டத்தில் இது சினிமா விழா என்பதையும் மறந்து ரசிக்க ஆரம்பித்தோம்.

இவர்கள் வந்து பாடல்களை வெளியிடுகிற அளவுக்கு இந்த படத்திற்கும் இவர்களுக்கும் என்ன சம்பந்தம்? வேறொன்றுமில்லை. இந்த படம் சர்வதேச தீவிரவாதத்தை பற்றிய படம்! சலங்கை ஒலி, சிப்பிக்குள் முத்து போன்ற காலத்தால் அழிக்க முடியாத படங்களை இயக்கிய கே.விஸ்வநாத்திடம் உதவி இயக்குனராக பணியாற்றிய கீதாகிருஷ்ணாதான் இப்படத்தையும் இயக்குகிறார்.

இதற்கு முன்பு தமிழில் பிரபுதேவா, சிம்ரன் நடித்த டைம் படத்தை இயக்கியவரும் இவர்தான். நாகார்ஜுனா, ஷோபனா ஆகியோர் நடித்த பல படங்களை தெலுங்கில் இயக்கி வெற்றிப்பட இயக்குனராகவும் அங்கே அறியப்பட்டவர் கீதாகிருஷ்ணா. தவிர, நு£ற்றுக்கும் மேற்பட்ட விளம்பர படங்களையும் இயக்கியிருக்கிறாராம் இவர்.

செலுங்கு ஹீரோ சஷாங், கன்னட நடிகை பியாங்கா தேசாய் இணைந்து நடித்திருக்கிறார்கள். முக்கிய கேரக்டரில் சுமன் நடித்திருக்கிறார்.

உலகம் முழுக்க பரவிவிட்ட தீவிரவாதத்தினால் இன்று நிம்மதியை இழந்து தவிக்கிறார்கள் மக்கள். காலையில் எழுந்து பேப்பரை பிரித்தால் கண்ணில் படுவதெல்லாம் குண்டு வெடிப்புகளும் உயிர் பலியும்தான். இப்படிப்பட்ட தீவிரவாதத்தினால் உலக பொருளாதாரத்திற்கு பாதிப்பு ஒரு பக்கம் என்றால் இன்னொரு பக்கம் ஒவ்வொரு தனி மனிதனின் நிம்மதியும் பறிபோகிறது. அப்படி உணர்வு ரீதியாக பாதிக்கப்பட்ட ஒருவன் தீவிரவாதத்திற்கு எதிராக கிளர்ந்து எழுந்தால் என்னாகும் என்பதுதான் படத்தின் கதை என்கிறார் கீதா கிருஷ்ணா.
நன்றி :தமிழ்சினிமா