நெருக்கடியில் சிக்கித் தவிக்கும் வெளிநாடு வாழ் இந்தியருக்கு உதவ நலநிதி: வயலார் ரவி

புதுதில்லி, .

:
வெளிநாடுகளில் பணிபுரியும் இந்திய தொழிலாளர்கள் நெருக்கடி ஏற்பட்டு
தத்தளித்தாலோ அல்லது வேலை இழந்து சிக்கலில் இருந்தாலோ அவர்களுக்கு உதவ நல
நிதி அமைக்கப்பட்டுள்ளது என்று வெளிநாடு வாழ் இந்தியர்கள் விவகாரத்துறை
அமைச்சர் வயலார் ரவி தெரிவித்தார்.மக்களவையில் கேள்வி
நேரத்தின்போது புதன்கிழமை அவர் கூறியதாவது: 42 நாடுகளில் உள்ள இந்திய
தூதரகங்களில் இந்த நல நிதி அமைக்கப்பட்டுள்ளது. வெளிநாடுகளுக்கு வேலை
தேடிச் சென்று வேலை கிடைக்காமல் பணம், பொருள், தங்க இடமின்றி தவிப்போர்,
வேலை இழந்து தத்தளிப்போர் போன்றவர்களுக்கு அவசர உதவி அளிக்க இந்த நிதி
பயன்படுத்தப்படும். இந்த நிதியிலிருந்து உணவு, தங்கும் வசதி, மருத்துவ
வசதி, ஊர் திரும்ப விமான டிக்கெட் வசதி செய்து தரப்படும். இந்தியர்கள் அதிகமாக செல்லும் வளைகுடா நாடுகள், ஐரோப்பாவில் உள்ள சில நாடுகளில் இந்த நிதி அமைக்கப்பட்டுள்ளது.அமெரிக்கா,
பிரிட்டன், ஜெர்மனி, பிரான்ஸ், ஆஸ்திரேலியா, நியூசிலாந்து, மாலத்தீவு,
சிங்கப்பூர், பிலிப்பின்ஸ், போர்ச்சுகல், பிஜி, ஆப்கானிஸ்தான், மொரீஷஸ்,
தென்னாப்பிரிக்கா ஆகிய நாடுகளில் இந்த நிதி உதவி கிடைக்கும். மத்திய
அரசின் பட்ஜெட் ஒதுக்கீடு மூலம் இந்த நிதி அமைக்கப்பட்டுள்ளது.தவிர்க்க
முடியாத சூழ்நிலை ஏற்பட்டால் வெளிநாட்டில் உயிரிழக்கும் இந்திய நாட்டவரின்
சடலத்தை சொந்த ஊருக்கு கொண்டு போய் சேர்க்கவும் இந்த நிதி
பயன்படுத்தப்படும். கத்தாரிலிருந்து 199 இந்திய தொழிலாளர்களும் மலேசியாவிலிருந்து ஒருவரும் சொந்த நாட்டுக்கு அனுப்பப்பட உள்ளனர் என்றார் வயலார் ரவி. நாடாளுமன்றத்தில்
வெளியான வேறு சில தகவல்கள் வருமாறு: கல்வி உரிமை சட்டத்தை அமல்படுத்த
மாநிலங்களுக்கு ஆகும் செலவு முழுவதையும் மத்திய அரசே ஏற்கவேண்டும் என
மாநிலங்கள் தரப்பில் வந்த கோரிக்கையை மத்திய அரசு புதன்கிழமை நிராகரித்தது.இது
தொடர்பாக மக்களவையில் மனித ஆற்றல் மேம்பாட்டுத்துறை அமைச்சர் கபில் சிபல்
கூறியதாவது: கல்வி உரிமைச்சட்டம் தேசிய அளவில் அமல்படுத்தப்படும்
சிறப்புத் திட்டம். இதை நிறைவேற்ற தம்மிடம் உள்ள உபரி நிதியை மாநிலங்கள்
பயன்படுத்தலாம்.இந்த திட்டத்தை அமல்படுத்த ஆகும் செலவை முழுமையாக மத்திய அரசே ஏற்கவேண்டும் என பல்வேறு மாநில முதல்வர்கள் கடிதம் எழுதியுள்ளனர்.இத்திட்டத்துக்காக மத்திய அரசு | 2,31,000 கோடி ஒதுக்கியுள்ளது. இதற்கு மேல் மத்திய அரசு செய்ய முடியாது என்றார் கபில் சிபல்.துணைக்கேள்வி
ஒன்றுக்கு பதிலளிக்கையில் அவர் மேலும் கூறியதாவது: 5 அல்லது 6 ம்
வகுப்புக்கு செல்லும் நிலையில் ஏராளமான குழந்தைகள் அதோடு படிப்பை
நிறுத்திவிடுகின்றனர். இது தீவிர கவனம் செலுத்தவேண்டிய விஷயம். இது பற்றி
அமைச்சரவை ஆழ்ந்து பரிசீலிக்கிறது.எதற்காக மாணவர்கள் இடையிலேயே
படிப்பை நிறுத்துவிடுகிறார்கள் என்பது பற்றி அறிய கமிட்டி ஒன்றை
அமைத்துள்ளோம். இந்த கமிட்டியில் இடம்பெறுபவர்களில் முக்கால்வாசி பேர்
அந்தந்த பகுதிவாசிகள்தான்.பள்ளி செல்லும் குழந்தைகளின் தாயார் அனைவரும் இதில் உறுப்பினராக சேர்க்கப்படுவார்கள் என்றார் கபில் சிபல்.தொழிற்கல்வி
பயிற்சி நிறுவனங்கள் அமைக்க அன்னிய முதலீடு: தொழிற்கல்வி துறையின் கீழ்
நாடு முழுவதிலும் பயிற்சிப்பள்ளிகள் அமைக்க திட்டமிடப்பட்டுள்ளது. இதற்காக
அன்னிய முதலீட்டை அனுமதிக்க அரசு தயாராக உள்ளது.இத்தகைய பயிற்சி
பள்ளிகள் கிராமங்களில் அதிக அளவில் அமைக்கப்படும். அடுத்த ஆண்டுக்குள்
தேசிய தொழிற்கல்வி அமைப்பை உருவாக்க அரசு முடிவெடுத்துள்ளது என்றும் கபில்
சிபல் தெரிவித்தார்.