கூண்டுகளில் வளர்க்கப்பட்ட கொடுவா மீன்கள் அறுவடை

நவீன் · நவீன் Thu Aug 12, 2010 9:22 am

காரைக்கால்:

காரைக்கால் ராஜிவ்காந்தி நீர்வாழ் உயிரின வளர்ப்பு
மையத்தில் கூண்டுகளில் வளர்க்கப்பட்ட கொடுவா மீன்கள் அறுவடை நேற்று
நடந்தது. காரைக்கால் கருக்களாச்சேரியில் ராஜிவ்காந்தி நீர்வாழ் உயிரின
வளர்ப்பு மையத்தில், சோதனை முயற்சியாக மெத்தை நண்டு, நோய் தாக்காத இறால்,
கல் நண்டு, கொடுவா மீன் ஆகியவை வளர்க்கப்படுகின்றன. 10 ஏக்கரில்
அமைக்கப்பட்ட பண்ணையில் நான்கு குளங்கள் வெட்டப்பட்டு மீன், இறால்,
நண்டுகள் வளர்க்கப்படுகின்றன. கடந்த ஆறு மாதங்களுக்கு முன் நாகை மாவட்டம்
தொடுவாய் கிராமத்தில் உள்ள மத்திய அரசின் மீன் குஞ்சுகள் வளர்ப்பு
மையத்தில் வாங்கப்பட்ட 5 செ.மீ., நீளம், 2 கிராம் எடையுள்ள 8,000 கொடுவா
மீன் குஞ்சுகள், 2.5 ஏக்கரில் அமைக்கப்பட்ட குளத்தில் 60 கூண்டுகளில்
விடப்பட்டு வளர்க்கப்பட்டன. மீன்களின் வளர்ச்சியைப் பொறுத்து, முதல் கட்ட
அறுவடை கடந்த மாதம் நடந்தது. 10 கூண்டுகளில் 300 கிலோ மீன்
பிடிக்கப்பட்டது. இரண்டாவது முறையாக நேற்று அறுவடை நடந்தது. இதில் 12
கூண்டுகளில் வளர்க்கப்பட்ட 400 கிலோ கொடுவா மீன்கள் பிடிக்கப்பட்டன.
மீன்கள் 500 கிராம் முதல் 1 கிலோ வரை எடை கொண்டதாக உள்ளன. பிடிக்கப்பட்ட
மீன்களுக்கு இயற்கையாக கிராம்பு மூலம் தயாரிக்கப்பட்ட மயக்க மருந்து கலந்த
நீரில் விடப்பட்டு பின் எடை போடப்பட்டது. எடைபோடும் போது துள்ளாமல்
இருப்பதற்காக இந்த மயக்க மருந்து அளிக்கப்படுகிறது. 10 நிமிடம்
மயக்கத்தில் இருக்கும் கொடுவா மீன்கள் உயிருடன் ஐஸ் பெட்டிகளில்
அடைக்கப்பட்டு ஏற்றுமதிக்கு தயாராக்கப்பட்டன. நேற்று பிடிக்கப்பட்ட கொடுவா
மீன்கள் பெங்களூருக்கு அனுப்பப்பட்டன. மீன் பண்னையில் கிலோ 175 ரூபாய்க்கு
கொடுவா மீன்கள் விற்கப்பட்டன. இது வெளி மார்க்கெட்டில் 250 முதல் 300
ரூபாய் வரை விற்கப்படும்.

கூண்டுகளில் வளர்க்கப்பட்ட கொடுவா மீன்கள் அறுவடை

கூண்டுகளில் வளர்க்கப்பட்ட கொடுவா மீன்கள் அறுவடை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக