காஞ்சி வரதராஜ பெருமாள் கோயில் சுற்றுச் சுவரில் விரிசல்

காஞ்சிபுரம்,


காஞ்சிபுரம் வரதராஜ பெருமாள் கோயிலில் கருங்கற்களால் ஆன சுற்றுச்
சுவரில் விரிசல் ஏற்பட்டுள்ளது. மேலும் சுவரில் ஆங்காங்கே செடிகள்
முளைத்தும் வளர்ந்தும் வருகின்றன.÷காஞ்சிபுரம் நகரின் மையப்
பகுதியில் புகழ்பெற்ற வரதராஜபெருமாள் கோயில் உள்ளது. இக் கோயிலில்
பெருமாள் நின்ற கோலத்தில் மேற்கு நோக்கி நின்று காட்சி அளிக்கிறார். இக்
கோயிலை 11-ம் நூற்றாண்டில் முதலாம் குலோத்துங்க சோழன், விக்கிரம சோழன்
ஆகியோர் புதுப்பித்துள்ளனர். அதன் பின்னர் சோழப் பேரரசுகள் வீழந்து
விஜயநகர பேரரசுகள் காலங்களில் கிழக்கு கோபுரம், ஊஞ்சல் மண்டபம், கல்யாண
மண்டபங்கள் கோயிலில் நிறுவப்பட்டன.÷இக் கோயிலில் வைகாசி
பிரம்மோற்சவத்தில் திருத்தேர், கருடசேவை ஆகியவை பிரசித்தி பெற்ற
விழாக்கள் ஆகும். கோயிலில் மூலவருடன், நூறுகால் மண்டபம், தோஷம் போக்கும்
தங்கப் பல்லி ஆகியவை பக்தர்கள் விரும்பி தரிசிக்கும் இடங்கள். இக்
கோயிலைச் சுற்றி கருங்கற்கலால் ஆன பிரமாண்ட சுற்றுச்சுவர் உள்ளது.இக் கோயில் கோபுரம் தற்போது புதுப்பிக்கப்பட்டு வருகிறது. இது பக்தர்கள் மத்தியில் மகிழ்ச்சியை ஏற்படுத்தியுள்ளது.÷ஆனாலும்
கோயிலைச் சுற்றியுள்ள பிரமாண்ட சுவற்றில் விரிசல் ஏற்பட்டுள்ளது. சுவரில்
சில இடங்கள் உப்பியவாறு காணப்படுகின்றன. ஆங்காங்கே செடிகள் முளைத்தும்
வளர்ந்தும் வருகின்றன. இச் செடிகளை அகற்றாமல் இருப்பது சுற்றுச் சுவருக்கு
பாதிப்பை ஏற்படுத்தலாம் என்று பக்தர்கள் அஞ்சுகின்றனர்.÷கோபுரம்
புதுப்பிக்கும் காலத்திலேயே செடிகளை அப்புறப்படுத்தி சுற்றுச் சுவர்
பலவீனமாக உள்ள இடங்களை சரி செய்ய வேண்டும் என்று பக்தர்கள்
எதிர்பார்க்கின்றனர்.÷இதுகுறித்து தமிழ் மக்கள் பண்பாட்டு கழக
அமைப்பாளர் கோ.ரா.ரவி கூறியது: காஞ்சிபுரம் வரதராஜ பெருமாள் கோயில் போன்ற
ஒரு கோயிலை இக் காலங்களில் அமைப்பது என்பது இயலாத காரியம். கோயில் கோபுரம்
புதுப்பிக்கப்படும் நேரத்தில் கோயில் சுற்றுச் சுவரையும் பழுது பார்க்க
வேண்டும். சுவரில் பலவீனமான இடங்களையும், விரிசலையும் சரி செய்ய வேண்டும்.
சுவரில் முளைக்கும் செடிகளை இப்போதே அப்புறப்படுத்தினால் சுவர் மேலும்
பலவீனம் ஆகாமல் பாதுகாக்க முடியும் என்றார்.÷கோயில் நிர்வாகத்தின்
கூடுதல் பொறுப்பை கவனித்து வரும் காசாளர் கஜபதியிடம் கேட்டபோது அவர்
கூறியது: கோயில் சுற்றுச் சுவரில் உள்ள செடிகள் அகற்றப்பட்டு வருகின்றன.
தற்போது உள்புறத்தில் உள்ள செடிகள் அகற்றப்படுகின்றன. வெளிப்புறத்தில்
உள்ள செடிகளும் விரைவில் அகற்றப்பட்டு விடும். கோயில் சுற்றுச் சுவரில்
ஏற்கெனவே விரிசல் இருந்து அது சரி செய்யப்பட்டுள்ளது. வேறு எங்கேனும்
விரிசல் இருந்தால் அதுவும் உடனடியாக சரி செய்யப்படும் என்றார்.

உடனடி நடவடிக்கை எடுத்து மேலும் சேதங்கள் ஏற்படா வண்ணம் காப்பது அவசியம்.