இடிந்து விழும் நிலையில் நகராட்சிப் பள்ளி!

திருவண்ணாமலை:
இடிந்து விழும் நிலையில் உள்ளது திருவண்ணாலை நகராட்சி முஸ்லிம் உருது
ஆரம்பப் பள்ளி. இதனால் மாணவர்களின் எண்ணிக்கை குறைந்து கொண்டே வருகிறது.
திருவண்ணாமலை நகராட்சிக்குட்பட்ட புதுத்தெரு பகுதியில் பத்துக்கும்
மேற்பட்ட தெருக்கள் உள்ளன. இப்பகுதியில் முஸ்லிம் மக்கள் அதிகளவில்
வசித்து வருகின்றனர். இவர்களின் குழந்தைகளின் நலன் கருதி கடந்த 1939-ம்
ஆண்டு முஸ்லிம் ஆரம்பப் பள்ளி தொடங்கப்பட்டது. ஏறக்குறைய 40 ஆண்டுகளாகவே
இப்பள்ளி தனியார் கட்டடத்தில் இயங்கி வருகிறது. சில ஆண்டுகளுக்கு
முன்னர் வரை 150 மாணவ, மாணவியர், 5 ஆசிரியர்களுடன் சிறப்பாக இயங்கி வந்த
இப்பள்ளியில், தற்போது வெறும் 25 மாணவ, மாணவியரும், 2 ஆசிரியர்கள் மட்டுமே
உள்ளனர். காரணம் பள்ளி சிதிலமடைந்து இடிந்துவிழும் நிலையில் உள்ளதுதான்.
இப் பள்ளியின் மேற்கூரையில் ஓடுகள் பெயர்ந்து, சூரிய ஒளி உள்ளே புகும்
நிலையில் உள்ளது. மழைக்காலத்தில் மாணவ, மாணவியர் உள்ளே தங்கி படிக்க
முடியாத நிலை. மண் சுவரோ இடிந்து வலுவிழந்து காணப்படுகிறது. பள்ளிக்கு
மின் இணைப்பும் இல்லை. இதனால் பெற்றோர்கள் எவரும் தங்கள் குழந்தைகளை
இப்பள்ளியில் சேர்க்க முன்வருவதில்லை. தொடக்கக் கல்வித் துறை அதிகாரிகள்,
அப்பகுதி பொதுமக்கள் பலமுறை நகராட்சி நிர்வாகத்திடம் கோரிக்கை மனு
அளித்தும் பயனில்லை. இப்பள்ளி வாடகைக் கட்டடத்தில் உள்ளதால் பள்ளியை
சீரமைக்க நகராட்சி நிர்வாகம் முன்வரவில்லை. இக்கட்டட உரிமையாளர் அப்துல்
முனாப் இதுதொடர்பாக கூறியது: பள்ளி குழந்தைகள் நலன் கருதி
கட்டடத்தை நகராட்சிக்கு வாடகைக்கு தந்தேன். முதலில் மாதம் ரூ.50 மட்டுமே
வாடகை தந்தனர். வாடகை கட்டணத்தை ஏற்றித் தரவேண்டும் எனக் கோரிக்கை
வைத்தேன். ஆனால் அதை நிறைவேற்றவில்லை. பின்னர் நீதிமன்றத்தில் வழக்கு
தொடர்ந்தேன். 13 ஆண்டுகள் போராட்டத்துக்கு பின் ரூ.500 மாத வாடகை தர
நகராட்சிக்கு நீதிமன்றம் உத்தரவிட்டது. ஆனால் அத்தீர்ப்பையும்
அதிகாரிகள் அமல்படுத்தவில்லை. உயர்த்தப்பட்ட வாடகைக் கட்டண நிலுவைத்
தொகையை பெற கடந்த 8 ஆண்டுகளாக போராடி வருகிறேன். மாத வாடகையை முறையாக
தந்தால் நானே பள்ளிக் கட்டடத்தை சீரமைப்பேன். கட்டடத்தை காலி செய்து
தருமாறு கூறினாலும் பதில் இல்லை என்றார். இதுதொடர்பாக மாவட்டத் தொடக்கக் கல்வி அலுவலர் கோபிதாஸ் கூறியது:
பள்ளியை சீரமைப்பது குறித்து நகர்மன்றத் தலைவரிடம் கேட்டுள்ளோம்.
நகர்மன்றத்தில் தீர்மானம் நிறைவேற்றி சீரமைப்பதாகத் தெரிவித்துள்ளார்.
வேறு இடம் கிடைத்தால் அனைவருக்கும் கல்வி இயக்கத்தின் கீழ் புதிய கட்டடம்
கட்ட நடவடிக்கை எடுக்கப்படும் என்றார். புறம்போக்கு இடம் உள்ளது.
அந்த இடத்திலோ அல்லது பள்ளி வாசல் அருகே உள்ள சிறிய இடத்திலோ புதிய
கட்டடங்கள் கட்டி பள்ளியை மாற்றலாம் என்கின்றனர் அப்பகுதி மக்கள்.