தனியார் பள்ளிகளில் அதிகமாக செலுத்திய கட்டணம் திரும்பக் கிடைக்குமா?

சென்னை,

தனியார் பள்ளிகளில் அதிகமாக செலுத்திய கட்டணம் திரும்பக் கிடைக்குமா என்ற
எதிர்பார்ப்பு பெற்றோர்களிடையே எழுந்துள்ளது. பல பள்ளிகளில்
நீதிபதி கோவிந்தராஜன் குழு நிர்ணயித்த கட்டணத்தைவிட கூடுதலாக கட்டணம்
வசூலிக்கப்பட்டுள்ளது. அவை தொடர்பான புகார்கள் மீது இதுவரை எந்த
நடவடிக்கையும் எடுக்கப்படவில்லை. மெட்ரிக், பிரைமரி, நர்சரி
பள்ளிகளுக்கு 2010-11-ம் கல்வி ஆண்டு முதல் 3 ஆண்டுகளுக்கான கட்டணத்தை
நீதிபதி கோவிந்தராஜன் குழு கடந்த மே மாதம் நிர்ணயித்தது. இதுதவிர, எந்தப்
பள்ளியும் மாதக் கட்டணம், பருவக் கட்டணம் போன்றவற்றை வசூல் செய்யக்கூடாது
என்றும், கட்டண நிர்ணயத்தால் பாதிக்கப்படும் பள்ளிகள் மேல்முறையீடு
செய்யலாம் என்றும் நீதிபதி குழு கூறியது. அதன்படி, பல பள்ளிகள்
கட்டண நிர்ணயத்தை எதிர்த்து மேல்முறையீடு செய்தன. இதற்கிடையே,
மேல்முறையீடு செய்த, மேல்முறையீடு செய்யாத பெரும்பாலான பள்ளிகள், நீதிபதி
நிர்ணயித்த கட்டணத்தைவிட மாணவர்களிடம் இருந்து மிக அதிகமாக கட்டணம் வசூல்
செய்துள்ளன. உதாரணமாக, சென்னை முகப்பேரில் உள்ள ஒரு தனியார்
பள்ளியில் 4-ம் வகுப்புக்கு ரூ.4,000 ஆண்டுக் கட்டணம் நிர்ணயிக்கப்பட்டது.
ஆனால், அந்தப் பள்ளியில் ரூ.11,000 வசூலிக்கப்பட்டுள்ளது. இது தவிர,
பருவக் கட்டணமும் வசூலிக்கப்படுகிறது. இப்படியாக பல பள்ளிகள் புகார்
பட்டியலில் உள்ளன. எனினும், அதிக கட்டண வசூல் தொடர்பாக 113
பள்ளிகள் மீது மட்டுமே கடந்த ஜூன் மாதத்தில் நீதிபதி கோவிந்தராஜன்
குழுவிடம் புகார் செய்யப்பட்டது. அவற்றில் 21 புகார்கள் மட்டுமே
விசாரிக்கப்பட்டு, 8 புகார்கள் உண்மை என தெரியவந்தது. இந்தப் பள்ளிகளின்
மீது நடவடிக்கை எடுக்க வேண்டும் என்று நீதிபதி கோவிந்தராஜன் பரிந்துரை
செய்தும்கூட, மேல்முறையீட்டைக் காரணம் காட்டி அவற்றின் மீது மெட்ரிக்
பள்ளிகள் இயக்குநரகம் இதுவரை எந்த நடவடிக்கையையும் எடுக்காமல் உள்ளது. இந்த
நிலையில், மேல்முறையீடு செய்துள்ள பள்ளிகளுக்கு அடுத்த ஆண்டுதான் முடிவு
தெரிவிக்கப்படும். அதனால், மேல்முறையீடு செய்துள்ள பள்ளிகளில் கடந்த மே
மாதம் என்ன கட்டணம் நிர்ணயம் செய்யப்பட்டதோ அதையே அந்தப் பள்ளிகள்
வசூலிக்க வேண்டும் என்று நீதிபதி கோவிந்தராஜன் செவ்வாய்க்கிழமை கூறினார். அப்படியானால்,
நீதிபதி நிர்ணயித்த கட்டணத்தைவிட கூடுதலாக கட்டணம் வசூலித்த பள்ளிகள்,
அந்தக் கூடுதல் கட்டணத்தை மாணவர்களுக்கு திருப்பி அளிக்குமா? அப்படி
அளிக்காதபட்சத்தில் கூடுதலாகச் செலுத்தப்பட்ட கட்டணம் சரிகட்டப்படுவது
எப்படி? மாணவர்களிடம் மாதக் கட்டணம், பருவக் கட்டணம் போன்றவற்றை
வசூலிக்கக் கூடாது என்று அறிவுறுத்தியும்கூட, பல தனியார் பள்ளிகள்
அவ்வாறான கட்டணங்களை வசூலிக்கின்றன. இத்தகைய பள்ளிகளின் மீது
எடுக்கப்படும் நடவடிக்கைதான் என்ன? இவ்வாறான கேள்விகள் பெற்றோரிடம்
எழுந்துள்ளன. இவற்றுக்கான பதிலைத் தர பள்ளிக் கல்வித் துறை தயங்குகிறது. எனவே, இந்த விஷயத்தில் அரசு உரிய, சரியான நடவடிக்கை எடுக்க வேண்டும் என்று பெற்றோர்கள் எதிர்பார்க்கின்றனர்.