பள்ளிகளுக்கு நிர்ணயித்த கட்டணம் மட்டும்தான்: நீதிபதி கோவிந்தராஜன்

சென்னை,

கட்டணம் தொடர்பாக மேல் முறையீடு செய்துள்ள பள்ளிகள் ஏற்கெனவே
நிர்ணயிக்கப்பட்ட கட்டணத்தையே வசூலிக்க வேண்டும் என்று நீதிபதி
கோவிந்தராஜன் கூறினார்.÷கட்டணம் தொடர்பாக பள்ளிகள் செய்துள்ள
மேல்முறையீடு பரிசீலிக்கப்பட்டு அடுத்த கல்வியாண்டில் (2011-12)
நிர்ணயிக்கப்படும் என்றும் அவர் தெரிவித்தார். தமிழகத்தில்
மெட்ரிக், நர்சரி என 10,084 தனியார் பள்ளிகள் உள்ளன. இவற்றுக்கு நீதிபதி
கோவிந்தராஜன் தலைமையிலான குழு கடந்த மே மாதம் கட்டணத்தை நிர்ணயம் செய்தது. சுமார்,
4,500 பள்ளிகள் கட்டணத்தை ஏற்றுக் கொண்ட நிலையில், மீதியுள்ள பள்ளிகள்
கட்டணத்தை உயர்த்த வேண்டும் என்று கூறி நீதிபதி கோவிந்தராஜன் குழுவிடம்
கடந்த ஜூன் மாதத்தில் மேல் முறையீடுகள் செய்திருந்தன. கட்டண
மேல்முறையீடு தொடர்பாக, சுமார் 10 ஆடிட்டர்கள் கூடுதலாக நியமிக்கப்பட்டு,
சம்பந்தப்பட்ட பள்ளிகள் அனுப்பிய ஆவணங்கள் அனைத்தும் விரிவாக ஆய்வு
செய்யப்பட்டு வந்தன. நீதிபதி கோவிந்தராஜன் கடந்த வாரம் கூறியது: பள்ளிகளின்
மேல்முறையீடுகளின் மீது விரைவில் முடிவெடுக்கப்பட்டு அவை சம்பந்தப்பட்ட
மாவட்ட முதன்மை கல்வி அலுவலர்களுக்கு அனுப்பி வைக்கப்படும் என்று
கூறினார். அதன்படி, மேல் முறையீடுகளின் மீது கடந்த வாரமே முடிவெடுக்கப்பட்டு அதன் விவரம் ரகசியமாக வைக்கப்பட்டுள்ளதாக கூறப்பட்டது. இந்த
நிலையில், நீதிபதி கோவிந்தராஜன் முதல்வர் கருணாநிதியை தலைமைச் செயலகத்தில்
செவ்வாய்க்கிழமை சந்தித்து கட்டண மேல்முறையீடு தொடர்பாக விவாதித்தார். எனினும், மேல்முறையீடு தொடர்பான முடிவு அறிவிக்கப்படவில்லை. இது
குறித்து நீதிபதி கோவிந்தராஜன் கூறியது: மேல்முறையீடு செய்துள்ள
பள்ளிகளுக்கு நேரில் சென்று, அவற்றின் தரம், உள்கட்டமைப்பு போன்றவை
தொடர்பாக ஆய்வு செய்ய வேண்டியுள்ளது. இதற்கு கூடுதல் கால அவகாசம்
தேவைப்படுகிறது. அதனால், மேல் முறையீடு செய்துள்ள பள்ளிகளுக்கான கட்டணம்
2011-12 கல்வி ஆண்டில் நிர்ணயம் செய்யப்படும். எனவே, மேல் முறையீடு
செய்துள்ள பள்ளிகளுக்கு கடந்த மே மாதம் என்ன கட்டணம் நிர்ணயம்
செய்யப்பட்டதோ அதையே அந்தப் பள்ளிகள் வசூலிக்க வேண்டும் என்றார்.